Att de contrizion
Carl'Antoni Tanz (1710-1762)
Att de contrizion
Signor, che stee coi brasc avert in cros,
par rezev quij che ghe v'han inciodæ,
degnee d'on sguard misericordios
chi ve se butta ai pee pien de pecchæ.
Sont stæ on ingræt, sont stæ on presontuos
a offend on Dia, a offend chi m'ha creæ,
ma piansgi: ma me 'n penti e a volta vos
recori a vù che m'hii tant soportæ.
Ah, se tanc vœult m'hii dæ temp da pentimm
l'è che 'l sangu, ch'avii spars, el vœur salvà
fin mì, che sont tra i pecator el primm.
O sangu, o mort! Signor, prima che mì
de la vostra bontæ torna abusà,
Signor, vuj prima millia vœult morì.