Armiya (Qayıpnazarov)
Bekkem kúshli, er júrekli qıraǵı,
Elimizdiń jawınger jas qıranı,
Dushpanlarǵa qaytpay qarsı turadı,
Tabanlı el, birligi nıq Armiya.
Bir maqsette barlıǵı bir tilekli,
Qaytpaytuǵın qıran, batır júrekli,
Polat dene, qaytpas qurısh bilekli,
Watan ulı, el qorǵanı Armiya.
Shıńǵa shıǵıp kókke qaray órlegen,
Aydan asıp, kúnge quyash sermegen,
Bir baǵdardan beti qaytıp kórmegen,
Jeńilmes, qaharman, kúshli Armiya.
Bekkem qorǵan hesh waqıtta alınbas,
Bomba taslap, top atsa da jıǵılmas,
Kútá bekkem tiregimiz buzılmas,
Polattay nıq qorǵanımız Armiya.