Ana (Qayıpnazarov)
Ana mehri máńgi saqlanar este,
Bala bawır bolsa, ana mehriyban.
Ómir shəmeninen úzip gúl dáste,
Taǵı qutlıqlayman, taǵı anajan!
Ana, bileseń be neshinshi ret,
Qutlıqladım usı bayram keliwden.
Saǵan jawar alǵıs, izzet həm húrmet.
Ananı ayrıqsha súygen kewilden.
Quwan ana, seni gúlge oraǵan,
Mendey ulların kóp, qızlarıń da kóp.
Bári aqıl, kúshin saǵan arnaǵan,
Bári húrmetleydi əziz ana dep.
Ullarıń, qızlarıń minnetdar sizge,
Óziń keltirgenseń bizdi dúnyaǵa.
Seniń qushaǵıńda jasaǵan bizge,
Sennen qımbat hesh nərse joq dúnyada.
Kiygizdiń, ishkizdiń kolıńda barın,
Ana qanday keń peyilseń saqıysań.
Sen meniń aqılım, sen meniń arım,
Júregime janımnan da jaqınsań.
Ana mehri məńgi oylanar este,
Bala bawır bolsa, ana mehriyban.
Ómir shəmeninen úzip gúl dəste,
Bayram menen qutlıqlayman anajan!