Alma-Ata (Qayıpnazarov)
Alma-Ata, alma baǵlar ishinde,
Kórineseń kórikli gózzal pishinde,
Dosqa ashıq bosaǵańdı atlaǵan,
Ómirinshe saqlar seni esinde.
Men de júrmen sayran etip kósheńde,
Tolısıptı kórkiń menen, kúshiń de,
Jańa jaylarıńa gerbish qalanǵan,
Miynet zawqın kórdim hárbir kisińde.
Usha bası qar jamılıp, bult kiyip,
Biyik shıńlar moynın sozǵan zińkiyip,
Jatırıpsań Alatawǵa jambaslap,
Aq siyneńdi aspandaǵı kún súyip.
Biraq tawday qalǵımaysań túnlerde,
Saqshıday sergekseń barlıq kúnlerde,
Jıldan-jılǵa baratırsań jasarıp,
Jaslıǵıńday jaynap turar gúller de.
Shadlıq, quwanıshqa tolı kósheler,
Kúnler tınısh, tınısh aydın kesheler,
Qız jipektiń diydarınday kórkińdi,
Bir kóriwdi árman etken neshsheler.
Alma-Ata, alma baǵlar ishinde,
Kórineseń kórikli gózzal pishinde,
Dosqa ashıq bosaǵańdı atlaǵan,
Ómirinshe saqlar seni esinde.