Al tävels plo ted e dustod
Ols i, tävels plo ted e dustod, binols solats lanimälik kliga püdik kudadinas. Medamels bevü nets, bevü lemel e selel evedols anu mans nobälik. Dugolöl zifis, pagis e pagilis, aipolols vätopo benöfi e lelabi: danü dunöf olas labem publügik jenom. Ven al fin dela, potols tedadome olsik komitis pedagetöl skiliko, li-sevon kisi sibinos dis köv at slenik u su potakad klänik (ag! plo mödiks!) petegöl me numats e vöds volapükik? - Sibinos zib fablüdas, kelis vobaropam ätädom ya; sibinos lemeseds vobelas, bod de milats famülas; sibinos pelam peseföl pelüpa sunik: cänapaneds no ogekömoms pos plotet, kel mosumom konfidi; sibinos blefo vobam e klödat o.b: lieg it läna olsik!
Lesi! binols gudiko solats lanimälik, ols i.
E ven, pos yels luls lifa olsik evobols plo tedadom ot, fatän olas, keli estimols lai in musams snatik, no li-sötom lemesedön olis? Ibo, eyufols valüdiko vobi netik.
Stimi al mans at nobälik!
Stimi al tedatävels!
Stimi al pük bevünetik, pük tävela!
- La Rochelle.
Se Volapükabled Tälik 1888, Nüm: 3, Pads: 23-24.