Adam ushın (Qayıpnazarov)
Dáslepki qádemdi taslap jerińe,
Buxaralı doslar keldim elińe,
Kútip aldıńızlar maqtap baraman,
Tuwısqanıń qaraqalpaq elime.
Bul jańa dáwirden kuwat alıpsız,
Uqıplı qollardı iske salıpsız,
Qay úyge kirsem de dasturxan tolı,
Kelińiz, alıńız degen xalıqsız.
Miynet ettińizler, bul jeńis boldı,
Kumdı kóshirdińiz, shel egis boldı,
Jazıq dalalarǵa baǵlar kógertip,
Tókken terlerińiz mol jemis boldı.
Búgingi sawlatı Buxar ishiniń,
Kewlin toltıradı kórgen kisiniń,
Burınǵı, házirgi sheberlerińniń,
Bári adam ushın etken isiniń.