A una Signora che cantava di musica
Fabi Vares (1570-1630)
A una Signora che cantava di musica
El m'è soltá on umor, Sora Cotá,
che faghem on duò tra vù e mì,
ma perchè el B moll fa brutt sentì
vuj che 'l faghem su on ton par B tirá.
Appont ghe n'hó chì vun accomodá
con la ciav che va su fina alla mi
e, se anch facess bisogn de deminuì,
coj sû gropitt in fond accavezzá.
Quest no l'è madrigal nè manch canzon,
ma l'è ona zerta sort d'ona mestura
che va battutta tutta in proporzion.
Sentí sta quarta falza che par dura,
la butta perciò dolza in semiton
tant più se tegní strensgia la mesura.
Battill senza paura,
tuill a prûv col master de Capella
che andarí tutt'in brûd, cara sorella.