A ra me noiza
A ra me noiza.
Co sto lustro bel de luna
vosto śone a caminà?
No te vies? varda ce una
me farasto chesta ca!
Presto donca śon te preo,
una bela éi da t' in dì…
Śon Marieta, te fesc meo
che a stà a ciasa o śì a dromì!
Duto taje inz' el paes,
dute drome come tasc,
no in coscienza se no te es
no te lascio mai pì in pasc!
Una sera can ciatone
come chesta in duto 'l an…
ce te par Marieta śone?
Gnero sci? … dà ca ra man!
No 'l é cioudo ancuoi, ne fiedo,
no 'l é vento, 'l é delver…
una neola ió no vedo…
'l é un bel tenpo, 'l é sinzier!
pagina:109
No te sentes ce aria fresca,
moe ra foies dei brascioi…
na rosada che rinfresca
par ra vares 'l outigoi…!
Par a cejes che res cianta
ra fouzigores ca e là…
Po… camina, no t' inpiantà…!
Asto voia de poussà?
Oh! Marieta ce una bela
ce una cara che to sos…
Te somees una stela,
anzi mile se te vos…!
T' as doi oce tanto biei…
i é lujentes come el fó…
no se ciata i so fardiei
ca in Anpezo, ne aneó.
Inze duto el to bel vis,
t' as un zerto nossicé…
me par de esse in paradis
co me scento pede te!
Se te disc una parola
de me voré n' fre de ben,
el me cuor el se consola
el me souta ca inz' el sen!
Te voi ben Maria t' el śuro,
un ben proprio da marì:
oh no zerto, no seguro
no t' in pos voré de pì!
Te me credes no 'l é vero?
un baujon non son mai stà:
te sas ben che son sinziero
che no son bon de t' inbroià…!