A Teodoro Cuesta

by Félix de Aramburu

Non t' amurnies, Tiadoro, nin t' amosques
Si tras d' afalagate por tos prendes
Algamara á escurrir por qué te viendes
Más caru qu' ha ponese el pan de rosques.
Tú la llengua semeyes que n' os bosques
Fala 'l páxaru pintu; tú arreciendes
A tumillo 'n tos coples; tú sosprendes
De mín y d' utros les maneres tosques;
Tú sabes más qu' un llibru de veyures
Y coses guapes; pero tanta cencia
Tú muncho por cuntala non te mueles
-Por qué ye, Tiadorín? Anque me xures
Que ye por flin ó flan, sé yo en concencia
Que yes un folganzán de siete sueles.