3 Febiweri 1933 baandie fi Rex Neklfoerd

3 Febiweri 1933 baandie fi Rex Neklfoerd (Nettleford) Chranslieshan frah “Cultural Action in Independence,” Jamaica in Independence: Essays on the Early Years

Outsaid a Kinston, chradishanal kolcha pravaid karispandin suos a enaji fi muos piipl. Bai ‘kolcha’ wi refa, in chuut, tu muo dah aatistik manifestieshan, ush mi admit se a di muos aksesobl a di kolcharal gudz tu yuman biin eniwe, weda az krieta ar az kansyuuma.

Di richnis a langwij (outsaid a iyuus fi lichicha), fi egzampl, potikiula rilivant ina Jumieka kies. Ah duo di frechrieshan a-gruo diipa uoba di ‘O’ Lebl fielyadem ina Ingglish Langwij ah di kas-kas get ata ah ata uoba weda di dayalek ab eni plies ina wi kolcharal yunivoers, iklier se gud sens wi afi priviel ina di lang ron. Di yuus a Tandad Ingglish fi ofishal ah faamal diskuos no intafier, aftaraal, wid di kaman yuusij a di tong kriet bai di Jumiekan piipl uoba chrii onjrid ier fi deh uona yuus ah fi diskraib deh uona rialiti.

Aal a dis nachral go for-for paas di poblik rikanishan gi tu Louise Bennett, di liidn puoyt ina di langwij, uu afta fiti ier a ar kraaf, shi a di libm suos fi skalali ah aatistik wok we invalv di Jumiekan langwij. Isief fi se dat fiit aknalij pedigrii az a buonifai tuentiet senchri kryuol tong (tengx tu Frederick Cassidy, R. B. LePage ah ada wandem wok) get elp az wel frah di rispek wa a-gruo fi tingz Jumiekan mongx Jumiekan demself sens Indipendans. A wah paint deh mis fi poerpos bai wah skuul a taat we a-luk fi huol bak Jumiekan frah di kiapasiti fi exasaiz deh krietib imajinieshan ah intilek ina wie wa projuus tingz a valyu yuniik ah difrah frah wa eh rigyaad az ‘high culture’ a-kom frah di himpiirial mechropuol. Api fi se, di pirit a self-ditoerminieshan priviel, alduo ishieki-shieki, ah di fuosiyobl fyuucha shuda chalinj fi mentien di intigriti a daa pirit, ef Jumiekan fi akuaya di shuorans we kompolchri fi buonifai chienj ah divelopment.