ქ. სახელითა ღმრთისაითა, მეფეთა მეფისა კოსტანტინესგან და ძეთა ჩუენთა: დავით, გიორგი, ბაგრატ და დიმიტრისაგან. ნებითა და შეწევნითა ღმრთისათა, აფხაზთა და ქართველთა, კახთა, რანთა და სომეხთა მეფისა, შანშა და შირვანშა და ყოვლისა ჩრდილოეთისა საქართველოსა მტკიცედ ხელმწიფედ მპყრობელ-მქონებელთასა.
მოვიდეს წინაშე ჩუენისა ჩუენნი დიდად ერთგულნი და ძალისაებრ მათისა დიდად ნამსახურნი ფანიასშვილნი აღბუღა და ძმანი მისნი: ნუგზარ, სეფედავლე, ჩუბინ და კახაბერი. გუიაჯნეს და მოგუახსენეს, რათამცა ერთგულობა-ნამსახურთა მათთა სამუქფოდ ჩუენცა მათთუის წყალობა გუეყო და სიგლითა ამით შეგუეწყალნეს.
ვისმინეთ აჯა და მოხსენება მათი და მიუბოძეთ რუისს, საყდრის უბანს ელიასშვილი მისითა სასახლითა, ვენახითა, ჭურ-მარნითა, სახნავითა, ნასყიდითა, წყლითა, წისქუილითა, ჭალითა, სათიბითა, საფიჩხულითა, სანადიროთა, სახმრითა და უხმრითა, საძებრითა და უძებრითა და მისითა სამართლიანითა, სრულად და უკლებად.
დაიწერა წიგნი და სიგელი ესე ქკსა როთ, ხელითა მცხეთის ქადაგისა მახარებელისათა.