*შიმე რე ასე
შიმე რე ასე ცა დო გვალა, ხიმფორ შუშელი,
შანგუშფერ გინოძ ელ დო მოლცუ, აკორინელე.
ჟი ცას თოლეფი ავარვალუ მუჭოთ დაჩხირი
დო დიხაშ უჩა შკაფანიას ქალაწიმელე.
ებირბილერე ოდიარე ებურაცხილი,
გურ ქიმეჩამუ, გამწუდგინუ, გამწოთინელე.
გილეგურგინას თე გარაგანქ ეკორშვინელქუ,
ვეშ მანგიორო ჩქიმ ტან მოკო თაქ ქუდვორჩენი,
შურუქალუო ადორებას მივოჯინექუ,
გოფშა ქიანა აწმაძირე ჩე თუთაშნერი.
ანკარელი რე ათე რინა, გესქვილ ოშიშა
დო ანჩხაბერო დუცჷ მუნოხუ ლენ ცა ქვერსემი,
ასე ბორჯი რე, გეჭოფასუ კინე ოჭიში,
ჯგირო ქურჩქილით, გვალეფიშე ღვარანც ერცქემი.
ცაშე ზიტყვეფი გუთმოცენა მეხიშკაკალო,
მუდაშა გენთხაფუ ფკოროცხითო ჭყონცჷ არგუნი,
მოჯგირეფიშე მოხვალამუ არძა სანგარო,
მეხინტკილიე ლასარ კირდე გურიშ მანგური.
სანყურე იჭუ, შერშილ ნარღით, შოლირ რინაშე,
სანწკელო ჩქინდა ბრელ მოურცუ, გინოტებული,
ირფელ გოკურცხუ, ნინა დირთუ კინე ჭვიმაშე,
კინ ქიმიძინანს მუთ ქიდიტენ ინოთებული.
ჩქიმდე გაღვენუ ულიებუ რინა შანილი,
ჩე ოჭმარესუ უჭურჭულანცუ შურიშ სქვამ კვინჩა,
ჩქიმ გორჩქინაშა თე ქიანას ჯგირო რჩქვანელი,
სარკო გოკონდა, თე მერეთის მა აწოიჩა.
ჩე ჯაქ გელუ-და უკულ ინა მუთუნც ვაჭოფე,
ჩე გოთანასუ უკმელაშე ოკო სხუნუა,
ლერსიშ ოსინთე გამკომინჯი, ხე გამთაჭოფე,
მა სი გიჩქუდას მითინიშა ვაისხუნუა,
ჩე ტორონჯისუ კინე ხეშა ქაშაიხუნუა.