*ო ჯიმა ესაკე!
1.
ო ჯიმა ესაკე!
თოფი დო ლეკური ხეს დაკე,
სოთინი ტრუფა ქოძირა და,
ყაზახურო მიანჭე!
2.
ო ცირა, ქოიახე!
ჟი ოდა დო თუდო ხულა,
ვე გილათხა დო ვა დოღურა!
3.
ო ცირა, შანგიშ ფერი!
ქოპილუნა სქანიშენი;
ჩქიმი დო სქანი ჸოროფასი
ქოლასუნა ჯანიშენი.
4.
ელესია, მელესია,
ჩხომი ჭოფეს ღელესია, --
სუმი ჩილი მიქი მეჩუ
ჩქინი გიო ჸვერესია?
5.
პაპა მეურს გეგუთიშა,
ლეპარტიე მაღლაკიშა, --
სარხინოლეფი დოშუმერე,
ეუკუნით ტაბაკიშე.
6.
ელია, მელია მესანთელია,
გოგუა, ჩქოტუა, ლაღარაია...
7.
ბოში: -- "ვო ბჟაო, ვო თუთა, ვო ჩქიმი თამურია!
"წყარი რჩაო, ღვინი რჩაო,
"წყარიშ მელე დოგირჩაო?"
ცირა: -- "ჩიტი ოჩიტორსჷ დო
"მალაღური ღალიძგას, --
"ბოში, მუშე გილაღურუქ
"უდუღალებელი ზას?"
8.
ალიხე, მალიხე,
მალი-მალაღურიხე,
ზიკიხე, ზიკი ჭილახე,
მოროდინი მოციკახე,
ციკახე დო კვაშილახე,
უკულაში ლეჩახე დო
გინმოჯინი ზინწარეხე.
9.
მელე თურქები დო მელე რისეფი დო
მოლე აფხაზეფი... მოლე აფხაზეფი...
-- "ცირა, მიქჷ მერჩჷ ქორქიხეს მიქჷ მეჩუ
"თურქული აბაზეფი?" რუსული აბაზეფი?
-- "ბოში, მუს გონჯარჷ
"ჩქიმი ხეშ ნაღვაწეფი?"
10.
სქანი თოლი ჩქიმი სარკე,
სქანი გური ჩქიმი ტახტი;
უსქანეთი ჩქიმი რინა
ციხე რე ნდო ნაობახტი.
11.
მა ვა მოკო სიცოცხლე,
მოკო მალჲას დობღურე,
რადგან სქანი ჸოროფაშა
სოთინ ვა მატყობინე.
12.
მუჟანს ვორწყექ ვიჭუუქუ,
მუჟანს ვარი, გური ღურუ;
ელე ქომიწონებუ ნდა,
მელეხიშე გამჷნოვჩურუ.
13.
ჸოროფა რე სნეულება,
მაჸვილარი გურიშ ჭუა;
ჸოროფაშე დუდიშ დაცვა
ვა მაღორა, ვა მიწუა.
14.
ჸოროფილიშ გურიშენი
მუთუნ ბთქვი ნი,
ირი კოჩქ მიწუ "სუა!"
მუში ნებაშა გილუურცჷ
ჭყელი, ნკირილიში სქუა.
15.
დობღური და, დომიგარი,
დომთხორი საფულე,
სქანი სქვამი კუჩხეფითჷ
დიხა ქინმოჭაბულე.
16.
წყარისინდი წყარსჷ გეხე,
მიკორდე კოკობე.
ბოში, მუსუ მიჯინერქჷ?
ეგებას გოკორდე?
შურო ბედი ქოგიღუ ნდა,
ეგებ ვა დჷგოკორდე.
17.
მოკოდას, * მი მუჩანსჷ
დადიხე ცირა ნინუცას(ი)?
მუჭო თოლი უძიცანსჷ;
ბოში, ეგებ გოკოდას(ი)?
18.
მიჸორსჷ ნი, მინ ორე?
სქვამი ცირა ნინო რე.
აკოშკაშე გინორე,
ჩე ბჟალარა მიორე.
19.
საყვარელქ მემიდინჷ,
გურჸ მაჭუუ დაჩხირითჷ;
ჩქიმი გური ვჸეცოცხლებუ
ფარა, ორქო, ვარჩხილითჷ.
20.
ცირა, მუ სქვამი რექ!
ვარდიშ ფერი რექჷ დო
ვარდიშ ქაქანა.