*ორთას ცანდი
ორთას ცანდი ეთმუოლუდ,
მუჭოთ ნაშარჲ ცხენიშ განთხჷ,
ვერწემჲ გვალაქ გოჩიონ დო
ჯალეფჲ თუდო ქჷდაფართხჷ.
თე შვანც ოზეს წჷმჷვორდი,
(ნოკობუე ირფელც ბედი),
ჩხანაშ რაჸვალჲ მონარტჷდ დო
ეშე, ცაშა იბჯინედი.
დიწკურ, მარა მუქ დიწკურუ,
მაშკურინუ უცფას თიშა,
მა გევორდი, მუჭოთ ჸურუ,
გურქ ვამაჩინ მუთუნიშა.
ქეგმოჭვემ დო ქეგმოვალჷ,
უკულჲ მეფხვადჲ, მუთჷ რდჷნი,
რინტუქ ოსკის ქიმთიტყობჷ,
აჲშახ დურღენს მიკურდჷნი.
მეძობელიშ იჸუ ღვარაქ,
ცაქ ორკოლით ჭვემა ობუ,
გოტყვაცჷ დო სუკიშ დუცუ,
ჭყონჲ ნოწკერო ეკოსოფუ.
უკულჲ ირფელქ ქიდეჸანუ,
მუ რდჷ თე ორთაშ მჷნაჩინა,
დო ჩქიმ ჭიჭე აბარწაშე
კინ ქუმაჭარ ჩხანაშ ჯინაქ.