ᠮᡠᡴᡩᡝᠨ ᡳ ᡶᡠᠵᡠᡵᡠᠨ ᠪᡳᡨ᠌ᡥᡝ
| ᡥᠠᠨ ᡳ ᠠᡵᠠᡥᠠ ᠮᡠᡴᡩᡝᠨ ᡳ ᡶᡠᠵᡠᡵᡠᠨ ᠪᡳᡨ᠌ᡥᡝ ᡩᠠᡳᠴᡳᠩ ᡤᡠᡵᡠᠨ ᡳ ᡬᠠᠣᡯᡠᠩ |
This page contains Manchu script. If it is not displayed, click here.
ᡝᡵᡝ
ᠠᡶᠠᡥᠠ
ᠮᠠᠨᠵᡠ
ᡥᡝᡵᡤᡝᠨ ᠪᡝ
ᠪᠠᡴᡨᠠᠮᠪᡠᠮᠪᡳ᠉
ᠠᡳᡴᠠᠪᠠᡩᡝ
ᡨᡠᠸᠠᠮᡝ
ᠮᡠᡨᡝᡵᠠᡴᡡᠴᡳ
ᡠᠪᠠᡩᡝ
ᡩᠣᠰᡳᡵᡝᠣ᠉
Ere afaha Manju Hergen be baktambumbi. Aikabade tuwame muterakūci ubade dosireo.
ᡨᡠᡴᡳᠶᡝᠴᡠᠨ ᡳ
ᡤᡳᠰᡠᠨ (tukiyecun -i gisun)
[edit]ᠠᠮᠪᠠᠯᡳᠩᡤᡡ ᠮᡠᡴᡩᡝᠨ ᡶᡠᡴᠵᡳᠨ ᡳᠯᡳᠪᡠᡥᠠ᠈
ᠠᠮᠠᡵᡤᡳ ᠰᡳᠮᡳᠶᠠᠨ ᠪᡝ ᡩᠠᠯᡳᡵᠠᠪᡠᡥᠠ᠉
ᠠᠯᡳᠨ ᡩᡝᠨ᠈ ᠪᡳᡵᠠ ᠣᠨᠴᠣ᠈
ᠠᠪᡴᠠᡳ ᡶᡝᠵᡝᡵᡤᡳ ᡩᡝ ᡨᡠᠸᠠᡴᡡ ᡨᠣᡴᡨᠣᠪᡠᡥᠠ᠉
ᠠᠶᠠᠨ ᡨᠠᠰᡥᠠ ᠮᡠᡩᡠᡵᡳ ᡳ ᡤᡝᠰᡝ᠈
ᠠᠮᠪᡠᠯᠠ ᡶᡝᡵᡤᡠᠸᡝᠴᡠᡴᡝ ᠪᠠ ᠪᠠᠨᠵᡳᠨᠠᡥᠠ᠉
ᠠᠴᠠᠪᡠᠮᡝ ᡠᠯᠠᠨ ᡶᡝᡨᡝᠪᡠᡶᡳ᠈
ᠠᡴᡩᡠᠯᠠᠮᡝ ᡥᠣᡨᠣᠨ ᠰᠠᡥᠠᠪᡠᡥᠠ᠉
ᠠᠪᡴᠠ ᠨᠠ ᠪᡝ ᡩᡠᡵᠰᡠᠯᡝᠮᡝ᠈
ᠠ ᡝ ᠪᡝ ᠠᠯᡥᡡᡩᠠᡥᠠ᠉
ᠠᡳ ᠠᡳ ᡥᡡᡩᠠ ᠪᡝ ᡶᠠᡴᠰᠠᠯᠠᠮᡝ᠈
ᠠᠰᡥᠠᠨ ᡩᡝ ᡨᠠᡴᡨᡠ ᠪᡝ ᡩᠠᠪᡴᡡᡵᡳᠯᠠᡥᠠ᠉
ᠠᠮᠪᠠᡵᠠᠮᡝ ᡨᡝᠨ ᠪᡝ ᡳᠯᡳᠪᡠᡶᡳ᠈
ᠠᠮᠪᠠ ᡥᠠᠨ ᡳ ᡩᠣᡵᠣ ᠪᡝ ᠪᠠᡩᠠᡵᠠᠮᠪᡠᡥᠠ᠉
ambalinggū mukden fukjin ilibuha,
amargi simiyan be dalirabuha.
alin den, bira onco,
abkai fejergi de tuwakū toktobuha.
ayan tasha muduri -i gese,
ambula ferguwecuke ba banjinaha.
acabume ulan fetebufi,
akdulame hoton sahabuha.
abka na be dursuleme,
a e be alhūdaha.
ai ai hūda be dabkūrilaha.
ambarame ten be ilibufi,
amba han -i doro be badarambuha.
ᡩᡝᡵᡤᡳ
ᡥᡝᠰᡝ (dergi hese)
[edit]ᡩᡝᡵᡤᡳ ᡥᡝᠰᡝ ᠸᠠᠰᡳᠮᠪᡠᡥᠠᠩᡤᡝ᠈ ᠮᡠᠰᡝᡳ ᡤᡠᡵᡠᠨ ᡳ ᠮᠠᠨᠵᡠ ᡥᡝᡵᡤᡝᠨ᠈ ᠮᡠᡩᠠᠨ ᡩᠠ ᠵᡳᠯᡤᠠᠨ ᡩᡝ ᠠᠴᠠᠨᠠᡥᠠ᠈ ᡩᡠᡵᠰᡠᠨ
abkai wehiyehe juwan ilaci aniya uyun biyai juwan juwe de, dorgi yamun de dergi hese wasimbuhangge, musei gurun -i manju hergen, mudan da jilgan de acanaha, dursun enduringge -i deribuhe ci banjinaha turgunde, enculeme arara, holbome arara, jijun labdu, jijun komso ojorongge, gemu ini cisui lak seme acanambi, damu fukjingga hergen -i dursun, daci udu banjibuha bicibe, akūmbume yongkiyahakū ofi, boobai, doron de, kemuni da hergen be baitalambi, bi julge be kimciha šolo de, ambasa hafasa de jorišame tacibufi, hacinggai dursun -i fukjingga hergen banjibume arabure de, amabsa bithe cagan be aname baicafi, julgei durun be songkolome yarume, gūsin juwe hacin banjibufi, geli mini araha mukden -i fujurun be, manju nikan fukjingga hergen -i araki seme baime wesimbuhe, ede manju hergen be badarambuci ombime, julgei fukjingga hergen be suwaliyame ulaci ombi, amaga jalan de iletuleme tuwabuci ojoro be dahame, baiha songkoi yabubufi, uthai fuheng, wang io dun be uheri tuwara hafan, akdun, jiyang pu be aisilame tuwara hafan obufi, acabume tuwara, sarkiyame arara hafasa be kimcime sonjofi, ere baita be hūdun wacihiyakini sehe.
ᡥᠠᠨ ᡳ
ᠠᡵᠠᡥᠠ
ᠮᡠᡴᡩᡝᠨ ᡳ
ᡶᡠᠵᡠᡵᡠᠨ
ᠪᡳᡨᡥᡝ (han -i araha mukden -i fujurun bithe)
[edit]ᡴᡝᠮᡠᠨᡳ ᡩᠣᠨᠵᡳᡥᠠᠩᡤᡝ᠈ ᠠᠮᠠ ᡝᠮᡝ ᡳ ᠮᡠᠵᡳᠯᡝᠨ ᠪᡝ ᠮᡠᠵᡳᠯᡝᠨ ᠣᠪᡠᡵᡝᠩᡤᡝ᠈ ᠠᠪᡴᠠᡳ ᡶᡝᠵᡝᡵᡤᡳ ᠠᡥᡡᠨ ᡩᡝᠣ ᡩᡝ ᠰᡝᠩᡤᡳᠮᡝ ᠠᡴᡡᠩᡤᡝ ᠠᡴᡡ᠉ ᠮᠠᡶᠠᡵᡳ ᡳ ᠮᡠᠵᡳᠯᡝᠨ ᠪᡝ ᠮᡠᠵᡳᠯᡝᠨ ᠣᠪᡠᡵᡝᠩᡤᡝ᠈ ᠠᠪᡴᠠᡳ ᡶᡝᠵᡝᡵᡤᡳ ᠮᡠᡴᡡᠨ ᡳ ᠨᡳᠶᠠᠯᠮᠠ ᡩᡝ ᡥᠠᠵᡳ ᠠᡴᡡᠩᡤᡝ ᠠᡴᡡ᠈ ᠠᠪᡴᠠ ᠨᠠ ᡳ ᠮᡠᠵᡳᠯᡝᠨ ᠪᡝ ᠮᡠᠵᡳᠯᡝᠨ ᠣᠪᡠᡵᡝᠩᡤᡝ᠈ ᠠᠪᡴᠠᡳ ᡶᡝᠵᡝᡵᡤᡳ ᡳᡵᡤᡝᠨ ᡨᡠᠮᡝᠨ ᠵᠠᡴᠠ ᠪᡝ ᡥᠠᡳᡵᠠᡵᠠᡴᡡᠩᡤᡝ ᠠᡴᡡ ᠰᡝᡥᡝᠪᡳ᠉ ᡝᡵᡝ ᡤᡳᠰᡠᠨ ᠪᡝ ᠨᡳᠶᠠᠯᠮᠠ ᡨᠣᠮᡝ ᡴᡳᠴᡝᡶᡳ ᠠᠴᠠᠮᠪᡳᠮᡝ᠈ ᡝᠵᡝᠨ ᠣᡥᠣ ᠨᡳᠶᠠᠯᠮᠠ ᡩᡝ ᡥᠣᠯᠪᠣᠪᡠᡥᠠᠩᡤᡝ ᡝᠯᡝ ᡠᠵᡝᠨ᠉ ᡨᡠᡨᡨᡠ ᠰᡝᠮᡝ᠈ ᡳᠯᠠᠨ ᡤᡳᠰᡠᠨ ᡳ ᡩᠣᡵᡤᡳ᠈ ᡤᡝᠯᡳ ᠮᠠᡶᠠᡵᡳ ᡳ ᠮᡠᠵᡳᠯᡝᠨ ᠪᡝ ᠮᡠᠵᡳᠯᡝᠨ ᠣᠪᡠᡵᡝ ᠪᡝ ᠣᠶᠣᠩᡤᠣ ᠣᠪᡠᡥᠠᠪᡳ᠉ ᠠᡳᠨᠴᡳ ᠮᠠᡶᠠᡵᡳ ᡳ ᠮᡠᠵᡳᠯᡝᠨ ᠪᡝ ᠮᡠᠵᡳᠯᡝᠨ ᠣᠪᡠᠴᡳ᠈ ᡠᡵᡠᠨᠠᡴᡡ ᡶᡠᡴᠵᡳᠨ ᠨᡝᡳᡥᡝᠩᡤᡝ ᠮᠠᠩᡤᠠ ᠰᡝᠮᡝ ᡤᡡᠨᡳᠮᡝ᠈ ᡧᠠᠩᡤᠠᠨ ᠪᡝ ᡨᡠᠸᠠᡴᡳᠶᠠᡵᠠᠩᡤᡝ ᠵᠠ ᠠᡴᡡ ᠪᡝ ᠰᠠᡶᡳ᠈ ᡤᡝᠯᡝᠮᡝ ᡤᡝᠯᡝᠮᡝ ᠣᠯᡥᠣᠮᡝ ᠣᠯᡥᠣᠮᡝ᠈ ᠠᠪᡴᠠ ᡩᡝ ᡤᡳᠩᡤᡠᠯᡝᠮᡝ ᡳᡵᡤᡝᠨ ᠪᡝ ᡤᠣᠰᡳᠮᡝ᠈ ᡨᡝᡵᡝᠴᡳ ᠠᡥᡡᠨ ᡩᡝᠣ ᡩᡝ ᡩᡠᡵᡠᠨ ᠣᡶᡳ᠈ ᡤᡠᡵᡠᠨ ᠪᠣᠣ ᠪᡝ ᡩᠠᠰᡳᡵᡝᠩᡤᡝ᠈ ᡠᡨᡥᠠᡳ ᠠᠮᠠ ᡝᠮᡝ ᡳ ᠮᡠᠵᡳᠯᡝᠨ ᠪᡝ ᠮᡠᠵᡳᠯᡝᠨ ᠣᠪᡠᡥᠠᠩᡤᡝ᠉ ᡳᡵᡤᡝᠨ ᡩᡝ ᡠᡥᡝ᠈ ᠵᠠᡴᠠ ᡩᡝ ᠠᠴᠠᠨ ᠣᠵᠣᡵᠣᠩᡤᡝ᠈ ᡠᡨᡥᠠᡳ ᠠᠪᡴᠠ ᠨᠠ ᡳ ᠮᡠᠵᡳᠯᡝᠨ ᠪᡝ ᠮᡠᠵᡳᠯᡝᠨ ᠣᠪᡠᡥᠠᠩᡤᡝ᠈ ᡴᡠᠩᡯᡳ ᡳ ᡥᡝᠨᡩᡠᡥᡝᠩᡤᡝ᠈ ᡨᡝᠨ ᡳ ᠸᡝᠴᡝᠨ᠈ ᠪᠣᡳᡥᠣᠵᡠ ᠸᡝᠴᡝᠨ ᡳ ᡩᠣᡵᠣᠯᠣᠨ᠈ ᠵᡠᠸᠠᡵᡳ ᠸᡝᠴᡝᠨ᠈ ᠪᠣᠯᠣᡵᡳ ᡳ ᠵᡠᡵᡤᠠᠨ ᠪᡝ ᡤᡝᡨᡠᡴᡝᠯᡝᡥᡝ ᡩᡝ᠈ ᡤᡠᡵᡠᠨ ᠪᡝ ᡩᠠᠰᡳᡵᡝᠩᡤᡝ ᡶᠠᠯᠠᠩᡤᡡ ᠪᡝ ᡨᡠᠸᠠᡵᠠ ᠠᡩᠠᠯᡳ ᡴᠠᡳ ᠰᡝᡥᡝᠪᡳ᠉ ᠮᠠᡶᠠᡵᡳ ᠵᡠᡴᡨᡝᡥᡝᠨᡝ᠈ ᠵᡠᠸᠠᡵᡳ ᠸᡝᠴᡝᠨ᠈ ᠪᠣᠯᠣᡵᡳ ᠸᡝᠴᡝᠨ ᡳ ᡴᠣᠣᠯᡳ ᠰᡝᡵᡝᠩᡤᡝ᠈ ᠶᠠᡵᡤᡳᠶᠠᠨ ᡳ ᠨᡝᠨᡝᡥᡝ ᡥᠠᠨ ᠰᠠᡳ ᠮᡠᠵᡳᠨ ᠪᡝ ᠰᡳᡵᠠᡥᠠ ᠪᠠᡳᡨᠠ ᠪᡝ ᠸᠠᠰᡳᠮᠪᡠᡵᡝ ᠠᠮᠪᠠ ᡝᠨᡨᡝᡥᡝᠮᡝ᠈ ᡨᡠᡨᡨᡠ ᠰᡝᠮᡝ᠈ ᡝᠨᡩᡠᡵᡳᠩᡤᡝ ᠨᡳᠶᠠᠯᠮᠠ ᠠᠮᠪᠠ ᡩᠠᠪᠠᠨ ᡳ ᠵᡳᠵᡠᡥᠠᠨ ᠪᡝ ᡩᡠᡵᠰᡠᠯᡝᠮᡝ᠈ᡝᡳᡶᡠ ᠠᡵᠠᡵᠠ ᠮᠣᠣ ᡨᡝᠪᡠᡵᡝ ᠪᡝ ᡩᡝᡵᡳᠪᡠᡥᡝ ᠴᡳ ᡝᠪᠰᡳ᠈ ᠮᡠᠩᡤᠠᠨ ᡩᡝ ᠠᠴᠠᠨᠠᡵᠠ ᡴᠣᠣᠯᡳ᠈ ᡥᠠᠨ᠋ ᡤᡠᡵᡠᠨ ᡳ ᡶᠣᠨ ᠴᡳ ᠠᡳᡶᡳᠨᡳ ᡠᡨᡨᡠ ᠪᡳᡥᡝᠪᡳ᠉ ᠮᡠᠰᡝᡳ ᡤᡠᡵᡠᠨ ᠪᠣᠣᡳ ᡶᡠᡴᠵᡳᠨ ᡩᡝᡵᡳᠪᡠᡥᡝ ᠮᡠᡴᡩᡝᠨ ᡳ ᠪᠠ᠈ ᡠᡨᡥᠠᡳ ᠵᡝᠣ ᡤᡠᡵᡠᠨ ᡳ ᠪᡳᠨ᠈ ᡴᡳ ᡳ ᠪᠠ᠈ ᡥᡡᠸᠠᠩ ᡩᡳ ᡶᠣᡵᡤᠣᠨ ᡳ ᡴᡳᠶᠣᠣ ᡧᠠᠨ ᠠᠯᡳᠨ ᡳ ᠠᡩᠠᠯᡳ᠉ ᠰᡝᡳᠪᡝᠨᡳ
ᡥᠠᠨ ᠮᠠᡶᠠ᠈ ᠨᡳᠨᠵᡠ ᡝᠮᡠ ᠠᠨᡳᠶᠠᡳ ᠰᡳᡩᡝᠨᡩᡝ᠈ ᡳᠯᠠᠨ ᠮᡠᡩᠠᠨ
ᠮᡠᠩᡤᠠᠨ ᡩᡝ ᡩᠣᡵᠣᠯᠣᠮᡝ ᡤᡝᠨᡝᡶᡳ᠈ ᡥᡳᠶᠣᠣᡧᡠᠨ ᡤᡳᠩᡤᡠᠨ ᠪᡝ ᠠᡴᡡᠮᠪᡠᡥᠠ᠉
ᡥᠠᠨ ᠠᠮᠠ ᠰᠣᠣᡵᡳᠨ ᡩᡝ ᡨᡝᡶᡳ᠈ ᡝᡳᡨᡝᠨ ᠪᠠᡳᡨᠠ ᠪᡝ ᡳᠴᡝᠮᠯᡝᠮᡝ᠈ ᡳᠨᡝᠩᡤᡳᡩᠠᡵᡳ ᡧᠣᠯᠣ ᠪᠠᡥᠠᡴᡡ ᠪᡳᠮᡝ᠈ ᠵᡳᠩ ᠸᠠᡵᡤᡳ ᠵᡝᠴᡝᠨ ᡩᡝ ᠪᠠᡳᡨᠠ ᠪᡳᡶᡳ᠈ ᡶᡳᡩᡵᡝ ᡤᠠᠨᠠᡵᠠ ᡩᡝ ᠵᠣᠪᠣᡥᠣ ᠰᡝᡵᡝ ᡩᠠᡩᡝ᠈
ᠸᠠᠩ ᠣᡥᠣ ᡶᠣᠨᡩᡝ᠈
ᡥᠠᠨ ᠮᠠᡶᠠ ᡳ ᡥᡝᠰᡝᡳ
ᠮᠠᡶᠠᡵᡳ ᠮᡠᠩᡤᠠᠨ ᡩᡝ ᡩᠣᡵᠣᠯᠣᠮᡝ ᡤᡝᠨᡝᡥᡝ ᠪᠠ ᠪᡳᠰᡳᡵᡝ ᠵᠠᡴᠠᡩᡝ᠈ ᡨᡠᡨᡨᡠ ᠵᡠᠸᠠᠨ ᡳᠯᠠᠨ ᠠᠨᡳᠶᠠᡳ ᡩᠣᠯᠣ᠈ ᡝᡵᡝ ᡩᠣᡵᠣᠯᠣᠨ ᠪᡝ ᡩᡝᡵᡳᠪᡠᡥᡝᡴᡡ᠉ ᠮᡳᠨᡳ ᠠᠵᡳᡤᡝ ᠪᡝᠶᡝ᠈ ᠠᠮᠪᠠ ᡩᠣᡵᠣ ᠪᡝ ᠰᡳᡵᠠᠮᡝ ᠠᠯᡳᡶᡳ᠈ ᡝᡵᡩᡝᠮᡠ ᠠᠴᠠᠪᡠᠮᡝ ᠮᡠᡨᡝᡵᠠᡴᡡ ᠣᠵᠣᡵᠠᡥᡡ ᠰᡝᠮᡝ᠈
ᠮᠠᡶᠠᡵᡳ ᡳ ᠵᠣᠪᠣᡶᡳ ᡩᡝᡵᡳᠪᡠᡥᡝ ᡳᠯᡳᠪᡠᡥᠠᠩᡤᡝ ᠪᡝ ᡧᡠᠮᡳᠯᠠᠮᡝ ᡤᡡᠨᡳᠮᡝ᠈ ᡳᠨᡝᠩᡤᡳᡩᠠᡵᡳ ᠰᡳᡨᡥᡡᠮᡝ ᡴᡳᠴᡝᠮᡝ᠈ ᡝᠨᡩᡠᡵᡳ ᡨᡝᡨᡠᠨ ᠪᡝ ᡤᡳᠩᡤᡠᠯᡝᠮᡝ ᡨᡠᠸᠠᡴᡳᠶᠠᠮᠪᡳ᠉ ᡤᡡᠨᡳᠴᡳ᠈ ᠮᡠᡴᡩᡝᠨ ᠰᡝᡵᡝᠩᡤᡝ᠈ ᠠᠪᡴᠠᡳ ᠪᠠᠨᠵᡳᠪᡠᡥᠠ ᡨᡝᠨ ᡳ ᠪᠠ᠉
ᡝᠨᡨᡝᡥᡝᠮᡝ ᠮᡠᠩᡤᠠᠨ᠈
ᡥᡡᡨᡠᡵᡳᠩᡤᠠ ᠮᡠᠩᡤᠠᠨ᠈
ᡝᠯᡩᡝᠩᡤᡝ ᠮᡠᠩᡤᠠᠨ ᠴᠣᠯᡤᠣᡵᠣᡦᡳ ᡥᠠᡵᡤᠠᡧᠠᠴᡳ ᠠᠴᠠᠮᠪᡳᠮᡝ᠈ ᠠᡳᡴᠠ ᠪᡝᠶᡝ ᠸᡝᠴᡝᡵᡝ ᠪᠠᡳᡨᠠ ᡩᡝ ᠨᡳᡴᡝᠨᡝᡵᠠᡴᡡ ᠣᠴᡳ᠈ ᠠᡳᠨᡳ ᡤᡳᠩᡤᡠᠨ ᡠᠨᡝᠩᡤᡳ ᠪᡝ ᡨᡠᠴᡳᠪᡠᡶᡳ ᠠᠮᠠᡤᠠᠩᡤᠠ ᡠᡵᠰᡝ ᡩᡝ ᡨᡠᠸᠠᠪᡠᠮᠪᡳᠨᡳ᠈ ᡠᡨᡨᡠ ᠣᡶᡳ᠈ ᠠᠪᡴᠠᡳ ᠸᡝᡥᡳᠶᡝᡥᡝ ᠰᠠᡥᠠᡥᡡᠨ ᡠᠯᡤᡳᠶᠠᠨ ᠠᠨᡳᠶᠠ ᠪᠣᠯᠣᡵᡳ᠈
ᡥᡡᠸᠠᠩ ᡨᠠᡳᡥᡝᠣ ᠪᡝ ᡤᡳᠩᡤᡠᠯᡝᠮᡝ ᡝᡵᡧᡝᠮᡝ᠈ ᡤᡝᠮᡠᠨ ᡥᡝᠴᡝᠨ ᠴᡳ ᠵᡠᡵᠠᡶᡳ᠈ ᠮᡠᠰᡝᡳ ᡶᡝ ᡤᡝᠮᡠᠯᡝᡥᡝ ᠪᠠᡩᡝ ᡳᠰᡳᠨᠵᡳᡶᡳ᠈ ᡥᡳᠶᠣᠣᡧᡠᠩᡤᠠ ᡤᡡᠨᡳᠨ ᠪᡝ ᠠᡴᡡᠮᠪᡠᠮᡝ᠈ ᠮᠠᡶᠠᡵᡳ ᡳ ᠰᠣᠩᡴᠣ ᠪᡝ ᡥᠠᡵᡤᠠᡧᠠᡥᠠ᠉ ᡝᡵᡝ ᡳᠯᡩᡠᠨ ᡩᡝ ᡳᠯᠠᠨ ᠪᡳᡵᠠᡳ ᠠᡴᡩᡠᠨ ᠪᡝᡴᡳ᠈ ᡳᡵᡤᡝᠨ ᡨᡠᠮᡝᠨ ᠵᠠᡴᠠ ᡳ ᡤᡠᠯᡠ ᠨᠣᠮᡥᠣᠨ᠈ ᠵᡝᡴᡠ ᡠᠰᡳᠨ ᡳ ᡥᡠᠸᡝᡴᡳ ᠰᠠᡳᠨ᠈ ᡝᡳᡨᡝᠨ ᡥᠠᠴᡳᠨ ᡳ ᠪᠠᠶᠠᠨ ᡝᠯᡤᡳᠶᡝᠨ ᠪᡝ ᠠᠨᠠᠮᡝ ᡨᡠᠸᠠᡶᡳ᠈ ᠶᠠᡵᡤᡳᠶᠠᠨ ᡳ ᠠᠪᡴᠠᡳ ᡳᡴᡨᠠᠮᠪᡠᡥᠠ ᡤᡠᡵᡠᠨ᠈ ᡥᠠᠨ ᡳ ᠶᡝᠨᡩᡝᡥᡝ ᡧᠣᡧᠣᡥᠣᠨ ᡳ ᠪᠠᠪᡝ ᠰᠠᡥᠠ᠉ ᠰᡝᡳᠪᡝᠨᡳ ᡴᡳᠮᠴᡳᡶᡳ ᠪᠣᡩᠣᡶᡳ ᠪᡳᠨ ᡳ ᠪᠠᡩᡝ ᡨᡝᡥᡝ ᠰᡝᠮᡝ᠈ ᡧᠣᠣ ᠺᠠᠩ ᡤᡠᠩ᠈ ᡤᡠᠩ ᠯᡳᠣ ᠪᡝ ᠮᠠᡴᡨᠠᡥᠠ᠈ ᡳᠰᡳᡶᡳ ᠸᠠᠯᡳᠶᠠᡶᡳ ᡴᡳ ᡳ ᠪᠠᡩᡝ ᡨᡝᠪᡠᡥᡝ ᠰᡝᠮᡝ ᠵᡝᠣ ᡤᡠᡵᡠᠨ ᡳ ᡨᡠᡴᡳᠶᡝᠴᡠᠨ ᡩᡝ ᡨᠠᡳ ᠸᠠᠩ ᠪᡝ ᡠᠴᡠᠯᡝᡥᡝᠩᡤᡝ᠈ ᡤᡝᠮᡠ
ᡩᡝᡵᡤᡳ ᠠᠪᡴᠠᡳ ᡥᠠᠨ ᡳ ᡝᠩᡤᡝᠯᡝᠮᡝ ᠪᡠᠯᡝᡴᡠᡧᡝᡵᡝ᠈ ᡶᡝᠵᡝᡵᡤᡳ ᡳᡵᡤᡝᠨ ᡩᡝ ᡝᠵᡝᠨ ᡩᠠ ᠣᡥᠣ ᠪᡝ ᠴᡳᠪᡨᡠᡳ ᡤᡡᠨᡳᠨ ᡳᠰᡳᠪᡠᡥᠠᡴᡡᠩᡤᡝ ᠠᡴᡡ ᠪᡳᡥᡝᠪᡳ᠈ ᡨᡠᡨᡨᡠ ᠣᡶᡳ ᠵᠠᡴᠠ᠈ ᡶᡠᠵᡠᡵᡠᠨ ᡳᡵᡤᡝᠪᡠᡥᡝ ᡩᡝ ᡳᠯᡝᡨᡠᠯᡝᠪᡠᠮᠪᡳ᠉ ᠪᠠᡳᡨᠠ᠈ ᡨᡠᡴᡳᠶᡝᠴᡠᠨ ᠠᡵᠠᡥᠠ ᡩᡝ ᠠᠯᡤᡳᠮᠪᡠᠮᠪᡳ᠈ ᡠᠪᠠᡩᡝ ᠰᠠᠴᡳ ᡨᡝᡨᡝᠨᡩᡝᡵᡝ᠈ ᡝᡴᡳᠰᠠᡴᠠ ᡤᡳᠰᡠᡵᡝᡵᠠᡴᡡ ᠣᠴᡳ ᠣᠮᠪᡳᠣ᠉ ᡨᡠᡨᡨᡠ ᡶᡠᠵᡠᡵᡠᠨ ᡳᡵᡤᡝᠪᡠᡥᡝ᠈ ᡶᡠᠵᡠᡵᡠᠨ ᡳ ᡤᡳᠰᡠᠨ᠈
ᡠᠯᡤᡳᠶᠠᠩᡤᠠ ᠠᠨᡳᠶᠠᡳ ᠣᡵᠣᠨ ᡩᡝ ᡨᡝᡳᠰᡠᠯᡝᡥᡝ ᠠᠨᡳᠶᠠ᠈ ᠯᡳᡵᡤᠠ ᡠᠰᡳᡥᠠ ᡝᡵᡩᡝ ᡩᡠᠯᡳᠮᠪᠠᡩᡝ ᠣᡥᠣ ᡝᡵᡳᠨ᠈ ᠯᠠᡴᠴᠠᠨ ᡳ ᠰᡳᡵᠠᠪᡠᠨ ᡳ ᠠᠯᡳᠣᡳ ᡩᡝ ᠠᠴᠠᠨᠠᡥᠠ᠈ ᡧᠠᠨᠶᠠᠨ ᡧᠠᡥᡡᠨ ᡳ ᡝᡵᡤᡳ ᠪᡝ ᠠᠯᡳᡥᠠ ᡠᠴᡠᡵᡳ᠈ ᠰᠠᡳᠨ ᡳᠨᡝᠩᡤᡳ ᠰᠣᠨᠵᠣᡶᡳ᠈ ᡤᡳᡵᡩᠠᠨ ᡨᡠᡴᡳᠶᡝᡶᡳ᠈ ᡩᡝᠶᡝᡵᡝ ᠮᡠᡩᡠᡵᡳ ᡤᡝᠰᡝ ᠮᠣᡵᡳᠨ ᡨᠣᡥᠣᡶᡳ᠈ ᠴᡳᠩᡤᡳᠯᠠᡴᡡ ᡥᠣᠩᡤᠣᠨ ᡨᡠᡥᡝᠪᡠᡶᡳ᠈ ᠮᡳᠶᠠᠮᡳᡥᠠᠩᡤᡝ ᡨᡝᡵ ᠰᡝᠮᡝ᠈ ᠶᠠᠩᠰᡝᠯᠠᡥᠠᠩᡤᡝ ᠯᡝᡵ ᠰᡝᠮᡝ᠈ ᠪᠣᠴᠣᠩᡤᠣ ᠨᡳᠣᡵᠣᠨ ᡳ ᡤᡝᠰᡝ ᡨᡝᠮᡤᡝᡨᡠᠨ ᡤᡠᠸᡝᠨᡩᡝᡵᡝ ᡧᡝ ᡳ ᡤᡝᠰᡝ ᡴᡳᠯᡨᠠᠨ ᡨᡠᡴᡳᠶᡝᡶᡳ᠈ ᡶᡝᡵᡤᡠᠸᡝᠴᡠᡴᡝ ᠵᡝᠴᡝᠨ ᡳ ᠪᠠᠪᡝ ᡧᡠᡵᡩᡝᠮᡝ᠈ ᡤᡳᡵᡥᠠ ᡠᠰᡳᡥᠠ ᠸᡝᡳᠰᡥᠠ ᡠᠰᡳᡥᠠ ᡳ ᡨᡝᡳᠰᡠ ᠪᡝ ᠶᠠᠪᡠᠮᡝ᠈ ᠮᡠᠰᡝᡳ ᡩᠠ ᡤᡝᠮᡠᠯᡝᡥᡝ ᠪᠠᡩᡝ ᡳᠰᡳᠨᡳᠵᡳᡶᡳ᠈
ᠮᠠᡶᠠᡵᡳ ᠮᡠᠩᡤᠠᠨ ᡩᡝ ᡠᠯᠠᡥᠠ ᠸᠠᠮᡝ ᠸᡝᠴᡝᡥᡝ᠈ ᡶᡝᡵᡤᡠᠸᡝᠴᡠᡴᡝ ᠰᡠᡴᡩᡠᠨ ᠪᡝ ᡤᡡᠨᡳᠮᡝ᠈
ᡝᡵᡩᡝᠮᡠᡳ ᠰᡝᠯᡤᡳᠶᡝᠨ ᠪᡝ ᡥᠠᡵᡤᠠᡧᠠᠮᡝ᠈ ᡩᠣᡵᠣᠯᠣᠨ ᠪᡝ ᠶᠣᠩᡴᡳᠶᠠᠪᡠᠮᡝ ᡤᡡᠨᡳᠨ ᠪᡝ ᠠᡴᡡᠮᠪᡠᡥᠠ ᠮᠠᠩᡤᡳ᠈ ᡩᠣᡵᠣᠩᡤᠣ ᠰᠣᠣᡵᡳᠨ ᡩᡝ ᠸᡝᠰᡳᡶᡳ᠈ ᠠᠮᠪᠠᠰᠠ ᡥᠠᡶᠠᠰᠠ ᠪᡝ ᠶᠠᠮᡠᠯᠠᠪᡠᡥᠠ᠈ ᡶᡠᡴᠵᡳᠨ ᡳᠯᡳᠪᡠᡥᠠᠩᡤᡝ ᡠᠮᡝᠰᡳ ᠵᠣᠪᠣᡥᠣ ᠪᡝ ᡤᡡᠨᡳᠮᡝ ᡩᡝᡵᡳᠪᡠᠮᡝ ᡨᠣᡴᡨᠣᠪᡠᡥᠠ ᠠᠮᠪᠠ ᡩᠣᡵᠣ ᠪᡝ ᡴᡳᠮᠴᡳᡶᡳ᠈ ᠠᡳ᠈ ᠠᠪᠰᡳ ᠸᡝᠰᡳᡥᡠᠨ᠈ ᡝᡵᡝ ᠶᠠᡵᡤᡳᠶᠠᠨ ᡳ ᠪᠣ ᡳ ᠪᠠ ᠴᡳ ᡩᡝᡵᡳᠪᡠᡥᡝ ᡯᡳ ᡥᠠᠯᠠᠩᡤᠠ ᠶᡝᠨ ᡤᡠᡵᡠᠨ ᠴᡳ ᠴᠣᠯᡤᠣᡵᠣᡴᠣ᠈ ᡥᠣᠣ ᡤᡳᠩ ᡤᡝᠮᡠᠨ ᡩᡝ ᡨᡝᡥᡝ ᡤᡳ ᡥᠠᠯᠠᠩᡤᠠ᠈ ᠵᡝᠣ ᡤᡠᡵᡠᠨ ᠴᡳ ᡩᡠᠯᡝᡴᡝ ᠰᡝᠮᡝ ᡶᡝᡵᡤᡠᠸᡝᡥᡝ ᠰᡝᡳᠪᡝᠨᡳ ᡦᡳᠩ ᡥᡳᠣᡳ ᡩᡝᡵᡤᡳ ᡝᡵᡤᡳᠩᡤᡝ ᠪᡝ ᠶᠠᡩᠠᠯᡳᠩᡤᡡ ᠰᡝᠮᡝ ᡩᠠᡵᡳᡥᠠ᠈ ᠠᠨ ᠴᡠ ᠸᠠᡵᡤᡳ ᡝᡵᡤᡳᠩᡤᡝ ᠪᡝ ᡩᠠᠪᠠᠪᡠᡥᠠ ᠰᡝᠮᡝ ᠪᠠᠰᡠᡥᠠ ᠪᡳᡥᡝ᠈ ᡝᡵᡝᠴᡳ ᡝᠪᡝᡵᡳ ᠨᡳᠩᡤᡝ᠈ ᡤᡠᡵᡠᠨ ᠵᡠᠸᠠᠨ ᠵᡠᠸᡝ ᠣᠮᡝ ᡶᠠᡴᠴᠠᡶᡳ᠈ ᡤᠣᠯᠣᡳ ᠪᡝᡳᠰᡝ ᠨᡳᠩᡤᡠᠨ ᠨᠠᡩᠠᠨ ᠣᠮᡝ ᠠᠴᠠᡶᡳ᠈ ᠮᡠᠴᡳᡥᡳᠶᠠᠨ ᡳ ᡤᡝᠰᡝ ᡳᠯᡳᡥᠠ᠈ ᡥᡝᠩᡴᡝ ᡳ ᡩᡝᠨᡩᡝᠴᡝᡥᡝ ᠪᠠ ᠣᠴᡳ᠈ ᡝᠯᡝ ᠪᡠᠶᠠ ᠰᡠᠪᠰᡳ ᡥᡡᠯᡥᡳ ᠯᠠᠮᡦᠠ᠈ ᡩᠠᠪᡠᡶᡳ ᡤᡳᠰᡠᡵᡝᠴᡳ ᠣᠵᠣᡵᠠᡴᡡ ᠪᡳᠮᡝ᠈ ᠮᡝᠩ ᡤᡳᠶᠠᠨ᠈ ᡦᡳᠩ ᡯᡳ᠈ ᡨᠠᡳ ᠴᡠᠩ ᠨᡳ ᠵᡝᡵᡤᡳ ᡠᡵᠰᡝ᠈ ᡝᠯᡝᠮᠠᠩᡤᠠ ᠶᠣᠣ ᡥᠠᠨ᠋᠈ ᠯᡠᠩ ᡩᡳ ᡳ ᡴᠠᠮᠨᡳ᠈ ᡩᠠᠪᠰᡠᠨ ᠣᠮᠣ ᠪᡝᡥᡝ ᡳ ᡥᡡᠴᡳᠨ ᡳ ᠪᠠᠶᠠᠨ᠈ ᡳ ᠨᡳ ᡩᡝᠶᡝᠨ᠈ ᡨᡳᠶᠠᠨ ᠯᡳᠶᠠᠩ ᡤᡠᡵᡠᠩ ᠨᡳ ᠰᠠᡳᡴᠠᠨ᠈ ᡳᠯᠠᠨ ᠵᡠᡵᡤᠠᠨ ᠰᡠᠨᠵᠠ ᠰᠠᠯᠵᠠ ᠵᡠᡤᡡᠨ ᡳ ᡳᠯᡤᠠᠪᡠᡥᠠ ᠪᡝ ᡴᡡᠸᠠᠰᠠᡩᠠᠮᡝ ᡨᡠᠴᡳᠪᡠᡥᡝᠩᡤᡝ᠈ ᠴᡳᠩᡴᠠᡳ ᡶᡳᠰᡝᠮᠪᡠᠮᡝ ᠪᠠᡩᠠᡵᠠᠮᠪᡠᠮᡝ ᡶᠠᡴᠰᡳᡩᠠᠮᡝ ᠯᡝᠣᠯᡝᠴᡝᡥᡝᠪᡳ᠈ ᡨᡝᠰᡝ ᠠᡳ ᡥᠠᠴᡳᠨ ᡳ ᡨᡠᡴᡳᠶᡝᠴᡝᠮᡝ ᡤᡳᠰᡠᡵᡝᠴᡳᠪᡝ᠈ ᠠᡩᠠᡵᠠᠮᡝ ᠠᠪᡴᠠᡳ ᠪᠠᠨᠵᡳᠪᡠᡥᠠ ᡥᠠᠨ ᡳ ᡤᡝᠮᡠᠨ᠈ ᡠᠮᠠᡳ ᠴᡳᠩ ᡥᡡᠩ᠈ ᠸᡝᡳ ᡧᡠ ᠪᡝ ᠪᠠᡳᠪᡠᡥᠠᡴᡡᠩᡤᡝ ᡩᡝ ᡩᡠᡳᠪᡠᠯᡝᠴᡳ ᠣᠮᠪᡳᠨᡳ᠈ ᡨᡝᡵᡝᠴᡳ ᠪᡳᡨᡥᡝᡳ ᠰᠠᡳᠰᠠ ᡩᡝ ᡶᡠᠵᡠᡵᡠᠯᠠᠮᡝ᠈ ᠨᡳᡵᡠᡤᠠᠨ ᡩᠠᠩᠰᡝ ᡩᡝ ᠪᠠᡳᠴᠠᡶᡳ᠈ ᡧᡠ ᠠᡴᡡ ᡩᡝ ᠮᠠᠩᡤᠠᡧᠠᡵᠠᡴᡡ᠈ ᠮᡠᡵᡠᡧᡝᠮᡝ ᡶᡠᠵᡠᡵᡠᠨ ᡳᡵᡤᡝᠪᡠᡴᡳ ᠰᡝᠮᡝ᠈ ᠮᡠᠵᡳᠯᡝᠨ ᡤᡳᡵᡴᡡᡶᡳ ᡤᡡᠨᡳᠮᡝ ᡤᡡᠨᡳᠮᡝ ᠠᡵᠠᡥᠠ᠈ ᡝᠮᡴᡝ ᠪᡝ ᠪᠠᡥᠠᠴᡳᠪᡝ ᡨᠠᠩᡤᡡ ᠪᡝ ᠮᡝᠯᡝᠪᡠᠮᠪᡳ ᡩᡝᡵᡝ᠈ ᠮᡠᠰᡝᡳ ᡩᠠᡳᠴᡳᠩ ᡤᡠᡵᡠᠨ ᡳ ᡨᡠᡴᡨᠠᠨ ᡶᠣᠨᡩᡝ᠈ ᡤᠣᠯᠮᡳᠨ ᡧᠠᠨᠶᠠᠨ ᠠᠯᡳᠨ ᠴᡳ ᡶᡠᡴᠵᡳᠨ ᡩᡝᡵᡳᠪᡠᡥᡝ ᡶᡝᡵᡤᡠᠸᡝᠴᡠᡴᡝ ᠰᡠᡴᡩᡠᠨ ᡳᠰᠠᡥᠠᠩᡤᡝ᠈ ᡠᠮᡝᠰᡳ ᡝᠯᡩᡝᠩᡤᡝ ᡠᠮᡝᠰᡳ ᡥᡡᡨᡠᡵᡳᠩᡤᠠ᠈ ᡨᠠᠮᡠᠨ ᡤᡝᠪᡠᠩᡤᡝ ᠣᠮᠣ ᡧᡠᡵᡩᡝᠮᡝ ᠵᠠᡴᡡᠨᠵᡠ ᠪᠠ ᠪᡳ᠈ ᠶᠠᠯᡠ᠈ ᡥᡡᠨᡨᡠᠩ᠈ ᠠᡳᡥᡠ ᠰᡝᡵᡝ ᡳᠯᠠᠨ ᡠᠯᠠ ᡨᡠᠴᡳᡴᡝᠪᡳ᠈
ᡝᠨᡩᡠᡵᡳ ᡤᡝᡤᡝ ᠠᠪᡴᠠᡳ ᠨᠣᠨ᠈ ᡶᡠᠯᡤᡳᠶᠠᠨ ᡨᡠᠪᡳᡥᡝ ᠠᡧᡠᡶᡳ ᠨᡠᠩᡤᡝᡥᡝ ᡩᡝ᠈
ᡝᠨᡩᡠᡵᡳᠩᡤᡝ ᠵᡠᡳ ᠪᠠᠨᠵᡳᡥᠠ᠈
ᠠᠪᡴᠠ ᡤᡳᠣᡵᠣ ᠰᡝᠮᡝ ᡥᠠᠯᠠ ᠪᡠᡶᡳ᠈ ᠸᡝᠰᡳᡥᡠᠯᡝᠮᡝ ᠠᡳᠰᡳᠨ ᠰᡝᡥᡝ᠉ ᠠᠰᡳᡥᡳᠶᠠᠮᡝ ᡤᡝᡨᡝᡵᡝᠮᠪᡠᠮᡝ ᡨᡝᠶᡝᡵᠠᡴᡡ ᠵᡳᡵᡤᠠᡵᠠᡴᡡ ᠣᠵᠣᡵᠣ ᠵᠠᡴᠠᡩᡝ᠈ ᡨᡝᠨᡳ ᠶᡝᡥᡝ᠈ ᡥᠣᡳᡶᠠ᠈ ᠵᠠᡳᡶᡳᠶᠠᠨ᠈ ᡶᡠᠰᡳ ᡳ ᠪᠠ ᠪᡝ ᠪᠠᡥᠠ᠈ ᡨᡝᡵᡝᠴᡳ ᠯᡳᠶᠣᠣ ᠶᠠᠩ ᠨᡳ ᠪᠠᡩᡝ ᡥᠣᡨᠣᠨ ᠸᡝᡳᠯᡝᡶᡳ᠈ ᡩᡝᡵᡤᡳ ᡝᡵᡤᡳ ᡤᡠᡵᡠᠨ ᡳ ᡩᠠ ᠣᡥᠣᠪᡳ᠈ ᠠᠪᡴᠠᡳ ᡥᡡᡨᡠᡵᡳ ᠪᡝ ᠵᡳᡵᠠᠮᡳᠯᠠᡶᡳ᠈ ᡤᡝᠯᡳ ᡤᡠᠩᡤᡝ ᠪᡝ ᠪᠠᡩᠠᡵᠠᠮᠪᡠᡴᡳ ᠰᡝᠮᡝ ᠣᡶᡳ᠈ ᠠᠪᡴᠠᡳ ᡶᡠᠯᡳᠩᡤᠠᡳ ᠵᡠᠸᠠᠨᠴᡳ ᠠᠨᡳᠶᠠ᠈ ᡥᠠᡴᠰᠠᠨ ᠪᡝ ᡨᡠᠸᠠᠮᡝ ᡩᡠᠯᡳᠮᠪᠠ ᡩᡝ ᡨᡝᡵᡝ ᠪᡝ ᠪᠣᡩᠣᠮᡝ᠈ ᡧᡝᠨ ᠶᠠᠩ ᠨᡳ ᠪᠠ ᠪᡝ᠈ ᠶᡝᠨᡩᡝᡵᡝ ᠰᡠᡴᡩᡠᠨ ᡳ ᠪᠣᡵᡥᠣᡥᠣ ᠪᠠ ᠰᡝᠮᡝ᠈ ᡠᡨᡥᠠᡳ ᠮᡠᡴᡩᡝᠨ ᡳ ᡥᠣᡨᠣᠨ ᠸᡝᡳᠯᡝᡶᡳ᠈ ᡶᡠᡵᡩᠠᠨ ᡳ ᠸᠠᡵᡤᡳ ᠪᠠ ᠪᡝ ᡥᠠᡥᡡᡵᠠᡥᠠ᠈ ᡨᡠᡨᡨᡠ ᡝᡵᡝ ᠪᠠ ᠨᠠ ᠪᡝ ᡤᡳᠰᡠᡵᡝᠴᡳ᠈ ᡠᡩᡠ ᠴᡳᠨ ᡤᡠᡵᡠᠨ᠈ ᡥᠠᠨ᠋ ᡤᡠᡵᡠᠨ ᠴᡳ ᡩᡝᡵᡳᠪᡠᡶᡳ᠈ ᠰᡳᡵᠠᠨ ᠰᡳᡵᠠᠨ ᡳ ᠰᡠᡳ ᡤᡠᡵᡠᠨ᠈ ᡨᠠᠩ ᡤᡠᡵᡠᠨ᠈ ᠵᠠᡳ ᡩᠠᡳᠯᡳᠶᠣᠣ ᡤᡠᡵᡠᠨ᠈ ᠠᡳᠰᡳᠨ ᡤᡠᡵᡠᠨ ᡩᡝ ᡳᠰᡳᡨᠠᠯᠠ ᠪᡳᡥᡝᠩᡤᡝ ᠰᡝᠴᡳᠪᡝ᠈ ᠠᡵᠪᡠᠨ ᡩᡠᡵᠰᡠᠨ ᠪᡝ ᡴᡳᠮᠴᡳᡶᡳ᠈ ᠮᡠᠰᡝᡳ ᡤᡠᡵᡠᠨ ᠵᡳᠩ ᡳᠴᡝᠮᠯᡝᡵᡝ
ᠸᡝᠰᡳᡥᡠᠨ ᡶᠣᡵᡤᠣᠨ᠈ ᡝᠨᡨᡝᡴᡝ ᡶᡝᡵᡤᡠᠸᡝᠴᡠᡴᡝ ᡥᡡᡨᡠᡵᡳ ᠪᡝ ᠠᠯᡳᡥᠠᠩᡤᡝ ᡩᡝᠮᠪᡝᡳ ᡧᡠᠮᡳᠨ᠈ ᠸᡝᠰᡳᡥᡠᠨ ᠸᡝᡳᠰᡥᠠ ᡠᠰᡳᡥᠠ ᡳ ᠵᡠᠸᠠᠨᠴᡳ ᡩᡠᠯᡝᡶᡠᠨ ᡩᡝ ᡨᡝᡳᠰᡠᠯᡝᡥᡝᠪᡳ᠈ ᠶᠠᡵᡤᡳᠶᠠᠨ ᡳ ᡨᠠᠰᡥᠠ ᡳ ᠣᡵᠣᠨ ᡳ ᡩᠣᡤᠣᠨ ᡳ ᡝᠩᡤᡝᠯᡝᡥᡝ ᠪᠠ᠈ ᠰᡠᠩᡤᠠᡵᡳ ᠪᡳᡵᠠᡳ ᡝᠯᠪᡝᡥᡝ ᠪᠠᠪᡝ ᠠᠯᡳᡥᠠᠩᡤᡝ᠈ ᡥᠠᡩᠠᡥᠠ ᡠᠰᡳᡥᠠ ᠴᡳ ᠰᠠᠨᡩᠠᠯᠠᠪᡠᡥᠠᠩᡤᡝ ᡠᠮᡝᠰᡳ ᡥᠠᠨᠴᡳ᠈ ᡝᡵᡝ ᡳᠨᡠ ᡧᠣᠣ ᠪᡝ ᡳ ᡨᡝᡵᡝ ᠪᠠᠪᠶᠣᡝ ᡨᡠᠸᠠᠮᡝ᠈ ᡶᠣᠶᠣᡩᠣᡥᠣ ᡩᠠᡵᡳ ᠯᠣ ᡳ ᠪᠠ ᠪᡝ ᠵᠣᡵᡳᡥᠠ᠈ ᡶᡠᠩ ᠴᡡᠨ ᡤᡳᠶᡡᠨ ᡳ ᠠᡵᡤᠠ ᠠᠯᡳᠪᡠᡶᡳ᠈ᠯᡳᠣ ᡥᡝᠣ ᡳ ᠶᠠᡵᡠᠮᡝ ᡧᠠᠩᡤᠠᠪᡠᡥᠠ ᠴᡳ ᠠᡳ ᡝᠨᠴᡠ᠈ ᡨᡝᡵᡝᠴᡳ ᡥᠠᠰᡥᡡ ᡝᡵᡤᡳ ᠴᠣᠣᡥᡳᠶᠠᠨ ᡤᡠᡵᡠᠨ ᠪᡝ ᡥᠠᡶᡳᡨᠠᠮᡝ᠈ ᡳᠴᡳ ᡝᡵᡤᡳ ᡧᠠᠨᠠᡥᠠ ᡩᡝ ᠨᡳᡴᡝᠨᡝᡶᡳ᠈ ᠠᠮᠠᡵᡤᡳ ᡧᠠᠨᠶᠠᠨ ᠠᠯᡳᠨ ᠪᡝ ᡩᠠᠯᡳᡴᡡ ᠣᠪᡠᡶᡳ᠈ ᠵᡠᠯᡝᡵᡤᡳ ᠯᠣᠣᡥᠠ ᠪᡳᡵᠠ ᠪᡝ ᡴᡡᠸᠠᡵᠠᡥᠠ᠈ ᠠᠮᠪᠠ ᠮᡝᡩᡝᡵᡳ ᡠᠯᠠᠨ ᡳ ᡤᡝᠰᡝ ᠣᡶᡳ᠈ ᠴᠠᠯᡤᡳᠮᡝ ᡩᡝᠪᡝᠮᡝ ᠪᡳᠯᡨᡝᠮᡝ ᡩᡝᠯᡳᡧᡝᠮᡝ᠈ ᡥᠣᠣ ᠰᡝᠮᡝ ᡝᠶᡝᠮᡝ᠈ ᡥᡡᠸᠠᡳ ᠰᡝᠮᡝ ᠸᠠᠰᡳᠮᡝ᠈ ᡥᡡᠸᠠᠩᡤᠠᡵ ᡥᡡᠸᠠᠯᠠᡵ ᠰᡝᠮᡝ ᠰᡠᠴᡠᠨᡝᠮᡝ ᠶᠣᠩᡤᠣᡵ ᡥᠣᠩᡤᠣᡵ ᠰᡝᠮᡝ ᡨᠣᡵᡤᡳᠮᡝ᠈ ᡧᡠᠨ ᠪᡝ ᠣᠪᠣᡵᠣ ᡠᠰᡳᡥᠠ ᠪᡝ ᠰᡳᠯᡤᡳᠶᠠᡵᠠ ᡤᡝᠰᡝ ᡩᡝᠰᡝᡵᡝᡦᡳ᠈ ᡨᡝᡵᡝᡳ ᡩᡝᡵᡳᠪᡠᠨ ᠪᡝ ᡴᡳᠮᠴᡳᡵᡝ ᡩᡝ ᠮᠠᠩᡤᠠ᠈ ᡩᡝᡵᡤᡳ ᡝᡵᡤᡳ ᡳᠨᡩᠠᡥᡡᠨ ᡨᠠᡴᡡᡵᠠᡵᠠ ᡤᠣᠯᠣ ᡩᡝ ᠠᡴᡡᠨᠠᡶᡳ᠈ ᠠᠮᠠᡵᡤᡳ ᡝᡵᡤᡳ ᡥᠣᠨᡳᠨ ᠠᡩᡠᠯᠠᡵᠠ ᠵᡝᠴᡝᠨ ᡩᡝ ᠨᡳᡴᡝᡨᡝᠯᡝ᠈ ᠮᡠᠰᡝᡳ ᠣᠮᠣᡥᠣᡳ ᠪᡳᡤᠠᠨ ᡶᡝᠰᡥᡝᠯᡝᠮᡝ᠈ ᠮᡠᠰᡝᡳ ᠣᡩᠣᠯᡳ ᠰᡠᠰᡠ ᠪᡝ ᠪᠠᡩᠠᡵᠠᠮᠪᡠᠮᡝ᠈ ᡩᡝᡴᡝᠨ ᠣᠯᡥᠣᠨ᠈ ᠨᡠᡥᠠᠯᡳᠶᠠᠨ ᠨᡳᠶᠣ ᡳ ᠪᠠ᠈ ᡧᠠᡵᡳ ᠰᡳᡵᡳ ᠠᠯᠠᡳ ᡠᠰᡳᠨ᠈ ᠯᠠᡴᠴᠠᡥᠠ ᠵᡝᠴᡝᠨ ᡩᡝ ᡳᠰᡳᡨᠠᠯᠠ ᠨᡝᡳᡶᡳ᠈ ᠠᠮᠪᠠ ᠵᡠᡴᡨᡝᡥᡝᠨ ᡩᡝ ᡶᡳᠶᠠᠨᠵᡳ ᠣᠪᡠᡥᠠᠩᡤᡝ᠈ ᡨᡠᠮᡝᠨ ᠪᠠ ᡶᡠᠨᠴᡝᠮᠪᡳ᠈ ᡠᠪᠠᡳ ᠠᠯᡳᠨ ᠣᠴᡳ᠈ ᡨᡳᠶᡝᠯᡳᠶᠠᠨ᠈ ᠰᡳᠯᡳᠶᠠᠨ ᡩᠠᠪᠠᡤᠠᠨ᠈ ᡦᡳᠩᡦᡳ᠈ ᡥᡳᠶᠠᠨᡠᠩ ᠠᠯᡳᠨ᠈ ᠮᡠᠴᠠ᠈ ᠰᡳᠮᡠᠨ ᡩᠠᠪᠠᡤᠠᠨ᠈ ᡩᡠᠩᡧᡠᠨ᠈ ᠵᡠᡵᡠᡨᡠ ᠠᠯᡳᠨ᠈ ᠴᠣᠯᡤᠣᡵᠣᡴᠣᠩᡤᡝ ᡩᡠᡴᡩᡠᡵᡝᠮᡝ ᠴᠣᡴᠴᠣᡥᠣᠨ᠈ ᡩᠠᠪᡴᡡᡵᡳᠯᠠᡥᠠᠩᡤᡝ ᠵᡠᡵᠴᡝᠨᠵᡝᠮᡝ ᠰᡝᡥᡝᡥᡠᡵᡳ᠈ ᡥᠠᡴᠰᠠᠨ ᠨᡳᠩᡤᡝ ᡥᡝᡴᡩᡝᡵᡝᠮᡝ ᡥᠠᡳᠯᠠᠰᡥᡡᠨ᠈ ᡶᡳᠶᡝᠨᡨᡝᡥᡝᠵᡝᡥᡝᠩᡤᡝ ᡶᡳᠶᡝᡵᡝᠨᡝᠮᡝ ᡤᠠᡴᠠᡵᠠᠰᡥᡡᠨ᠈ ᡴᡝᠰ ᠨᡳᠩᡤᡝ ᠴᠣᡴᠴᠣᡵᠣᠮᡝ ᡧᠣᡴᡧᠣᡥᠣᠨ᠈ ᡝᠩᡤᡝᠯᡝᠰᡥᡠᠨ ᠨᡳᠩᡤᡝ ᡤᡠᡴᡩᡠᡵᡝᠮᡝ ᠴᠣᡴᠴᠣᡥᠣᠨ᠈ ᡧᡠᠨ ᠪᡳᠶᠠ ᠪᡝ ᡥᡠᠸᡝᠵᡝᠮᡝ ᡩᠠᠯᡳᠮᡝ᠈ ᡨᡝᠩᡤᡳᠨ ᡠᠯᠠ ᡩᡝ ᠰᡝᡴᡳᠶᡝᠨ ᠣᡶᡳ ᡝᡴᡳᠶᡝᡥᡝᠩᡤᡝ᠈ ᡶᡝᡵᡤᡠᠸᡝᠴᡠᠨ ᠪᡝ ᡳᠰᠠᡶᡳ ᠰᡳᡵᡝᠨᡝᠮᡝ ᠴᠣᠯᡤᠣᡵᠣᡴᠣ ᠪᡳᠮᡝ᠈ ᡤᡝᠯᡳ ᠰᠠᡳᡴᠠᠨ ᠪᡝ ᠶᠣᠩᡴᡳᠶᠠᠪᡠᠮᡝ ᡩᡝᠨ ᠸᡝᠰᡳᡥᡠᠨ ᠣᡥᠣᠪᡳ᠈ ᡨᡠᡨᡨᡠ ᡩᡠᡳᠨ ᠪᡝᡨᡥᡝ ᠵᡠᠸᡝ ᠠᠰᡥᠠᠩᡤᠠᡳ ᡩᡠᠸᠠᠯᡳ᠈ ᠠᠮᠪᠠ ᠸᡝᠵᡳ ᠯᡠᡴᡠ ᠣᡵᡥᠣ ᡩᡝ ᠪᡳᠰᡳᡵᡝᠩᡤᡝ᠈ ᡝᡵᡝᡳ ᡩᠣᠯᠣ ᡩᡝᡵ ᠰᡝᠮᡝ ᠪᠠᠨᠵᡳᡥᠠᡴᡡᠩᡤᡝ ᠠᡴᡡ᠈ ᠪᡝᡨᡥᡝᠩᡤᡝᡳ ᡩᡠᠸᠠᠯᡳ ᠣᠴᡳ᠈ ᡨᠠᠰᡥᠠ᠈ ᠶᠠᡵᡥᠠ᠈ ᠯᡝᡶᡠ᠈ ᠨᠠᠰᡳᠨ᠈ ᡨᠠᡥᡳ᠈ ᠴᡳᡥᡝᡨᡝᡳ᠈ ᠪᡠᡥᡡ᠈ ᠰᡳᡵᡤᠠ᠈ ᡤᡳᠣ᠈ ᠮᡳᠶᠠᡥᡡᡨᡠ᠈ ᠨᡳᠣᡥᡝ᠈ ᠵᠠᡵᡥᡡ᠈ ᡨᡝᠮᡝᠨ᠈ ᡤᡠᡵᡤᡠ᠈ ᡩᠣᠪᡳ᠈ ᠮᠠᠯᠠᡥᡳ᠈ ᠮᠠᠩᡤᡳᠰᡠ᠈ ᡝᠯᠪᡳᡥᡝ᠈ ᡩᠠᡴᡩᠠ ᡩᠠᡴᡩᠠ ᠰᡝᡵᡝ ᠠᠯᠠᡴᡩᠠᡥᠠ᠈ ᠵᠣᡵᡥᠣ ᠰᡳᠩᡤᡝᡵᡳ᠈ ᠠᡴᠵᠠᠮᠪᡠᠯᡠ᠈ ᡴᡠᡵᡝᠨᡝ᠈ ᠰᡝᡴᡝ ᡳᠴᠠᠩᡤᠠ ᠪᡳᠮᡝ ᡤᡳᠨᠴᡳᡥᡳᠶᠠᠨ᠈ ᡝᡵᡝᠴᡳ ᡤᡡᠸᠠ᠈ ᡳᡥᠠᠨ᠈ ᠮᠣᡵᡳᠨ᠈ ᡥᠣᠨᡳᠨ᠈ ᡠᠯᡤᡳᠶᠠᠨ ᡳ ᠵᡝᡵᡤᡳ ᡳᠨᡝᠩᡤᡳᡩᠠᡵᡳ ᠪᠠᡳᡨᠠᠯᠠᡵᠠᠩᡤᡝ ᠣᠴᡳ᠈ ᡤᠠᡧᠠᠨ ᡶᠠᠯᡤᠠ ᡩᡝ ᡶᡳᡥᡝᡨᡝᠯᡝ᠈ ᡩᡝᡩᡠᠴᡝᡵᡝ ᡳᠯᡳᠴᠠᡵᠠᠩᡤᡝ ᡩᡝᡵ ᠰᡝᠮᠪᡳ᠈ ᠠᠰᡥᠠᠩᡤᠠᡳ ᡩᡠᠸᠠᠯᡳ ᠣᠴᡳ᠈ ᡠᠯᡥᡡᠮᠠ᠈ ᠨᡠᡨᡠᡵᡠ᠈ ᠨᡳᠣᠩᠨᡳᠶᠠᡥᠠ᠈ ᠨᡳᠶᡝᡥᡝ᠈ ᠯᠠᠮᡠᠨ ᡤᡡᠸᠠᠰᡳᡥᡳᠶᠠ᠈ ᠸᡝᡳᠵᡠᠨ᠈ ᠪᡠᠯᡝᡥᡝᠨ᠈ ᠮᡠᡴᡝ ᡨᠠᠰᡥᠠᡵᡳ᠈ ᡶᠠᡴᡡ ᡩᡝ ᡨᠣᠮᠣᡵᠣ ᡴᡡᡨᠠᠨ᠈ ᠸᠠᡴᠠᠨ᠈ ᡩᡠᡩᡠ ᠴᡳᠪᡳᠨ᠈ ᡶᡳᠶᠣᡵᡥᠣᠨ᠈ ᠰᠠᡴᠰᠠᡥᠠ᠈ ᡴᡡᡵᠴᠠᠨ᠈ ᡤᡳᠶᠠᡥᡡᠨ᠈ ᠰᡳᠯᠮᡝᠨ᠈ ᡩᠠᠮᡳᠨ᠈ ᡳᡨᡠᠯᡥᡝᠨ᠈ ᡥᠣᠣᡥᠠᠨ᠈ ᡤᡡᠯᡳᠨ᠈ ᠴᡝᠴᡳᡴᡝ᠈ ᠰᡳᠩᡤᡝᡵᡳ ᡳ ᡠᠪᠠᠯᡳᠶᠠᡴᠠ ᠰᡠᠸᠠᠶᠠᠨ ᠮᡠᡧᡠ᠈ ᡤᡝᠴᠴᡝᠨ ᡩᡝ ᡩᡝᠶᡝᡵᡝ ᡧᠠᠨᠶᠠᠨ ᠨᡳᠣᠩᠨᡳᠶᠠᡥᠠ᠈ ᡤᡝᠯᡳ ᡧᠣᠩᡴᠣᠨ ᠰᡝᡵᡝᠩᡤᡝ ᠪᡳ᠈ ᠰᠠᡥᠠᠯᡳᠶᠠᠨ ᡠᠯᠠᡳ ᠪᠠᠴᡳ ᡨᡠᠴᡳᡴᡝᠪᡳ᠈ ᠸᡝᠵᡳ ᡩᡝ ᡩᠠᠰᡳᡥᡳᠴᡳ᠈ ᡤᠠᡵᡠ ᡳ ᠠᡴᠰᠠᡵᠠᠩᡤᡝ ᡦᡠᡨᡠ ᡦᠠᡨᠠ᠈ ᡨᠠᠯᠠ ᡩᡝ ᡶᠣᡵᡳᠴᡳ᠈ ᡤᡡᠯᠮᠠᡥᡡᠨ ᡳ ᠪᡠᡵᡠᠯᠠᡵᠠᠩᡤᡝ ᠪᡠᡴᡨᠠ ᠪᠠᡴᡨᠠ᠈ ᡝᡵᡝᠴᡳ ᡤᡡᠸᠠ᠈ ᡴᡠᠸᡝᠴᡳᡥᡝ᠈ ᠵᡝᠯᡝᠮᡝ᠈ ᡨᡠᡵᡳ ᠴᡝᠴᡳᡴᡝ᠈ ᡴᠠᡵᡴᠠ ᠴᡝᠴᡳᡴᡝ᠈ ᡳᠵᡳᡶᡠᠨ ᠨᡳᠶᡝᡥᡝ ᠣᠴᡳ᠈ ᠪᡠᡵ ᠪᠠᡵ ᠰᠣᡵ ᠰᠠᡵ ᠰᡝᠮᡝ᠈ ᡩᡝᡴᡩᡝᠮᡝ ᡩᡝᠶᡝᠮᡝ ᡩᡝᠪᠰᡳᡨᡝᠮᠪᡳ᠈ ᠣᡵᡥᠣ ᠣᠴᡳ᠈ ᡥᠠᠮᡤᡳᠶᠠ᠈ ᠰᡠᡳᡥᠠ᠈ ᠠᠮᡨᠠᠩᡤᠠ ᠣᡴᠵᡳᡥᠠ᠈ ᡠᠯᡥᡡ᠈ ᡩᠠᡵᡥᡡᠸᠠ᠈ ᡶᡳᠴᠠᡴᡡ ᠣᡵᡥᠣ᠈ ᡩᠠᡵᡥᡡᠸᠠ ᠣᡵᡥᠣ᠈ ᡝᠯᠪᡝᠨ᠈ ᠨᠣᠨᠣ᠈ ᠵᡳ ᡳᠯᡥᠠ᠈ ᠰᡠᡳᡥᡝᡳ ᡤᡝᠰᡝ ᠪᡠᠯᡥᠠ ᠣᡵᡥᠣ᠈ ᡝᡵᡳᠨ ᠪᡝ ᠰᠠᡵᠠ ᠮᠠᡳᠯᠠᠨ᠈ ᡶᠣᡵᡤᠣᠨ ᠪᡝ ᡝᠵᡝᡵᡝ ᠮᠣᠣᠶᡝᠨ ᡳᠯᡥᠠ᠈ ᡩᠠᠮᡠ ᠣᡵᡥᠣᡩᠠ ᠰᡝᡵᡝᠩᡤᡝ᠈ ᡳᠯᠠᠨ ᡳᠯᠠᠨ ᡳ ᡤᠠᡵᡤᠠᠨᠠᡶᡳ᠈ ᠰᡠᠨᠵᠠ ᠰᡠᠨᠵᠠ ᡳ ᠠᠪᡩᠠᡥᠠ ᠪᠠᠨᠵᡳᡵᡝᠩᡤᡝ᠈ ᠶᠠᠯᠠ ᠨᠠ ᡳ ᡶᡝᡵᡤᡠᠸᡝᠴᡠᡴᡝ ᠰᡠᡴᡩᡠᠨ ᠪᡝ ᠪᠠᡥᠠᡶᡳ᠈ ᡩᠣᡵᡤᡳᡩᡝᡵᡳ ᡨᡠᠰᠠ ᠠᡵᠠᡵᠠ ᡤᡠᠩᡤᡝ ᡩᡝ ᠠᠴᠠᠨᠠᡥᠠ᠈ ᡤᡝᠯᡳ ᡶᡳᠶᡝᠯᡝᠰᡠ᠈ ᠨᡳᠶᠠᠨᠴᡳᡵᡳ ᡥᠠᠮᡤᡳᠶᠠ᠈ ᠪᠠᠨᡩᠠ ᡥᠠᡵᠠ᠈ ᠠᠪᡠᠨᠠ᠈ ᠮᠠᡳᠯᠠᠨ ᡳ ᡠᠰᡝ᠈ ᠰᡳᡵᡝᠨᡝᡥᡝ ᠮᠠᡳᠯᠠᠨ᠈ ᡤᡝᠮᡠ ᠨᡳᠮᡝᡴᡠ ᠪᡝ ᡩᠠᠰᠠᠴᡳ ᠣᠮᠪᡳ᠈ ᠪᡠᠵᠠᠨ ᠣᠴᡳ᠈ ᠰᡠᠨᠵᠠᡨᠠ ᠰᠠᡨᠠ ᡳ ᠵᠠᡴᡩᠠᠨ᠈ ᡨᡠᠮᡝᠨ ᠠᠨᡳᠶᠠᡳ ᠮᠠᡳᠯᠠᠰᡠᠨ᠈ ᡩᠠᠪᡴᡡᡵᡳ ᡥᠠᡩᠠ ᡩᡝ ᠠᠪᡴᠠ ᠪᡝ ᡩᠠᠯᡳᠮᡝ᠈ ᠯᡠᡴ ᠰᡝᠮᡝ ᠸᡝᠵᡳ ᠪᠠᠨᠵᡳᠨᠠᡶᡳ᠈ ᡥᠠᠯᡳ ᠪᡝ ᡝᠯᠪᡝᠮᡝ᠈ ᠨᡳᠣᠸᠠᠩᡤᡳᠶᠠᡴᠠᠨ ᡧᡠᠩᡤᠠᠶᠠᠨ ᠰᡳᠩᡤᡝᡵᡳ ᡧᠠᠨ ᠮᠣᠣ ᠴᡳ ᠴᠣᠯᡤᠣᡵᠣᡦᡳ᠈ ᠨᡳᠣᡥᠣᡴᠣᠨ ᠠᠶᠠᠨ ᡶᠣᡩᠣᡥᠣ ᠮᠣᠣ ᠪᡝ ᡝᠮᡳᠯᡝᠮᠪᡳ᠈ ᠠᠮᠪᠠ ᠵᠠᠯᡤᠠᠰᡠ ᠮᠣᠣ᠈ ᠵᠠᡴᡡᠨ ᠮᡳᠩᡤᠠᠨ ᠠᠨᡳᠶᠠ ᠪᡝ ᠨᡳᠶᡝᠩᠨᡳᠶᡝᡵᡳ ᠣᠪᡠᠮᠪᡳ᠈ ᠠᠨᡳᠶᠠ ᡤᠣᡳᡩᠠᡥᠠ ᠮᡠᠰᡳᡥᠠ ᠮᠣᠣ ᠪᠠᡳᡨᠠᡴᡡ ᡨᡠᡵᡤᡠᠨ ᡩᡝ ᠵᠠᠪᡧᠠᠪᡠᡥᠠᠪᡳ᠈ ᡶᡠᠯᠠᡵᠵᠠᡵᠠ ᡤᡠᡳᠯᡝᡥᡝ᠈ ᡶᡠᠯᠠᡥᡡᡵᡳ ᡨᠣᡵᠣ ᠨᡳᠣᠸᠠᡵᡳ ᠨᡳᠣᠸᠠᡵᡳ᠈ ᡧᠠᡥᡡᡴᠠᠨ ᡥᠠᠩᡴᡳ ᠮᠣᠣ᠈ ᠰᡠᠸᠠᠶᠠᡴᠠᠨ ᡤᡡᡵᡤᡳᠨ ᠮᠣᠣ ᡤᡳᠯᡨᠠ ᡤᡳᠯᡨᠠ᠈ ᠠᠯᡳᠨ ᡳ ᡝᠨᡳᡵᡥᡝᠨ ᡠᡥᡠᡴᡝᠨ ᠪᡳᠮᡝ ᠰᡠᠩᡤᡝᠯᠵᡝᠮᡝ ᠣᡶᡳ᠈ ᡧᡠᠰᡳᡥᠠ ᠠᡵᠠᠴᡳ ᠰᠠᡳᠨ᠈ ᠠᠮᡳᡩᠠ ᠨᡳᠮᠠᠯᠠᠨ ᠮᠣᠣᡳ ᠨᡳᠶᠠᡥᠠᡵᠠ ᠪᡝ ᡤᠠᡳᡶᡳ᠈ ᠪᡳᠶᠣᠣ ᡩᡝ ᡠᠯᡝᠪᡠᠴᡳ ᠣᠮᠪᡳ᠈ ᠣᠯᡥᠣᠨ ᠪᠠ ᡳ ᠰᠠᡳᠨ ᠵᠠᡴᠠ ᠯᠠᠪᡩᡠ ᠰᡝᠴᡳ᠈ ᠮᡝᡩᡝᡵᡳ ᡩᠣᡵᡤᡳ ᡥᠠᠴᡳᠩᡤᠠ ᠵᠠᡴᠠ ᡤᡝᠯᡳ ᡝᠯᡤᡳᠶᡝᠨ᠈ ᠮᡠᠵᡠᡥᡠ᠈ ᡥᠠᡳᡥᡡᠸᠠ᠈ ᠵᡝᠯᡠ᠈ ᠠᠨᠸᠠᠨ᠈ ᠰᠠᡵᠠᡤᠠᠵᡳ ᠨᡳᠮᠠᡥᠠ᠈ ᠣᠩᡤᠣᡧᠣᠨ᠈ ᡨᠠᡴᡡ᠈ ᡩᠠᡶᠠᡥᠠ᠈ ᡧᠠᠨᠶᠠᠨ ᠨᡳᠰᡳᡥᠠ᠈ ᠣᠣᠴᠠ᠈ ᡥᡡᠸᠠᡵᠠ᠈ ᠠᠵᡳᠨ᠈ ᠯᠠᡥᠠ᠈ ᡠᠶᠠᡧᠠᠨ᠈ ᡩᡠᠸᠠᡵᠠ᠈ ᠮᡝᡳᡥᡝᡨᡠ᠈ ᡶᠠᡴᠴᠠᡵᠠᠯᠠᠮᡝ ᡴᠠᠮᠴᡳᡵᡝ ᡴᠠᠯᡶᡳᠨᡳ᠈ ᡩᡝᡴᡩᡝᡵᡝᠯᡝᠮᡝ ᡳᡵᡠᡵᡝ ᡨᡠᠪᡝᡥᡝ᠈ ᠯᠣᡥᠣ ᠶᠠᠩᠰᡝᠯᠠᠴᡳ ᠣᠵᠣᡵᠣ ᡶᡝᡨᡥᡝ ᠨᠣᡥᠣ ᡩᡠᠯᠠᠨ ᠨᡳᠮᠠᡥᠠ᠈ ᠪᡠᡵᡤᠠᡳ ᠰᡳᠰᡳᡶᡳ ᡶᡳᠶᠠᡴᡡᠴᡳ ᠠᠴᠠᡵᠠ ᠨᡳᠣᠮᠣᡧᠣᠨ᠈ ᡤᠣᠯᠮᡳᠨ ᡝᠮᡠ ᠵᡠᡩᠠ ᡳᠰᡳᡵᡝ ᡳᡥᠠᠨ ᠨᡳᠮᠠᡥᠠ᠈ ᡠᡧᡝ ᡳ ᡤᡝᠰᡝ ᡠᠰᠠᡨᠠ ᠪᡳᠰᡳᡵᡝ ᡤᡳᠶᠠᠯᡨᡠ᠈ ᠸᡝᡥᡝ ᡩᡝ ᠯᠠᡨᡠᠴᡳ ᠣᠵᠣᡵᠣ ᠰᠠᠯᡠ ᠪᡳᠰᡳᡵᡝ ᠨᡳᠣᠮᡝᡵᡝ᠈ ᠰᡝᠯᡝᡳ ᠨᡳᠩᡤᡳᠶᠠ ᡳ ᡤᡝᠰᡝ ᠠᠩᡤᠠ ᠪᠠᠨᠵᡳᡥᠠ ᡥᠠᡩᠠᡥᠠᠨ ᠨᡳᠰᡳᡥᠠ᠈ ᠵᠠᡳ ᠰᠠᠩᡤᡠᠵᡳ᠈ ᠮᠠᠯᡨᠠ᠈ ᠮᡝᡩᡝᡵᡳ ᡝᡳᡥᡝᠨ᠈ ᡤᡝᠣᡧᡝᠨ᠈ ᠨᠠᠮᡠ ᡠᠯᡤᡳᠶᠠᠨ᠈ ᠯᡝᡴᡝᡵᡥᡳ᠈ ᡥᡠᡨᡥᡠᡥᡳ᠈ ᠮᡝᡩᡝᡵᡳ ᡩᠣᡵᡤᠣᠨ ᡳ ᠵᡝᡵᡤᡳᠩᡤᡝ᠈ ᠴᠣᠯᡴᠣᠨ ᠪᠣᠯᠵᠣᠨ ᡩᡝ ᡨᡠᠴᡳᠮᡝ ᡩᠣᠰᡳᠮᡝ᠈ ᠮᡠᡴᡝᡳ ᠸᡝᡵᡝᠨ ᡩᡝ ᡩᡝᡴᡩᡝᠮᡝ ᡳᡵᡠᠮᡝ ᠪᡳ᠈ ᠨᡳᠣᠸᠠᠩᡤᡳᠶᠠᠨ ᠮᡠᡩᡠᡵᡳ ᡴᡠᡴᡠᠯᡠ ᠰᡝᡥᡝᡥᡠᡵᡳ ᡳᠯᡳᠴᡳ ᡨᡠᡤᡳ ᡩᡝᡴᡩᡝᠮᠪᡳ᠈ ᡶᡠᠯᡤᡳᠶᠠᠨ ᠮᡠᡥᡡᠯᡠ ᡠᠨᠴᡝᡥᡝᠨ ᠮᡳᡩᠠᠯᠵᠠᠴᡳ ᠪᠣᠯᠵᠣᠨ ᠮᡳᠯᠠᡵᠠᠮᠪᡳ᠈ ᠠᠨᡳᠶᠠ ᡤᠣᡳᡩᠠᡥᠠ ᡨᠠᡥᡡᡵᠠ ᡩᡝ ᠨᡳᠴᡠᡥᡝ ᠪᠠᠨᠵᡳᡶᡳ᠈ ᡠᠶᡠᠨ ᡥᠠᠴᡳᠨ ᡳ ᡝᠯᡩᡝᠨ ᠠᠪᡴᠠ ᡩᡝ ᠵᡝᡵᡴᡳᡧᡝᠮᠪᡳ᠈ ᡶᡝᡵᡤᡠᠸᡝᠴᡠᡴᡝ ᠰᠠᡳᡴᠠ ᠪᠣᡵᡥᠣᡶᡳ᠈ ᡤᡠ ᡶᡳᠶᠠᡥᠠᠨ ᠪᠠᠨᠵᡳᠮᠪᡳ᠈ ᡠᡩᡠ ᠠᠯᡳᠨ ᡳ ᠨᠣᠮᡠᠨ᠈ ᠨᠠ ᡳ ᡝᠵᡝᡨᡠᠨ ᡩᡝ ᠰᡝᠮᡝ ᠠᡴᡡᠨᠠᠮᡝ ᡨᡠᠴᡳᠪᡠᠮᡝ ᠮᡠᡨᡝᡥᡝᡴᡡᠪᡳ᠈ ᡝᠨᡨᡝᡴᡝ ᠰᠠᡳᠨ ᠪᠠ ᠠᠪᠰᡳ ᡶᡝᡵᡤᡠᠸᡝᠴᡠᡴᡝ᠈ ᠠᠯᠠ ᠪᡳᡤᠠᠨ ᡠᠪᠠᡧᠠᠮᠪᡳ ᡨᠠᡵᡳᠮᠪᡳ᠈ ᡠᠰᡳᠨ ᠰᡝᠴᡳ ᡠᠵᡠᡳ ᠵᠠᡳ᠈ ᠪᠣᡳᡥᠣᠨ ᠰᡝᠴᡳ ᡠᠮᡝᠰᡳ ᡥᡠᠸᡝᡴᡳ᠈ ᡥᠠᡳ ᠴᡝᠩ ᡥᡳᠶᠠᠨ ᠪᡝ ᡧᡠᡵᡩᡝᠮᡝ᠈ ᡬᠠᡳ ᡦᡳᠩ ᡥᡳᠶᠠᠨ ᡩᡝ ᠨᡳᡴᡝᠨᡝᠮᡝ᠈ ᠯᡳᠶᠣᠣ ᠶᠠᠩ ᠵᡝᠣ ᠪᡝ ᡩᠠᠪᠠᠮᡝ᠈ ᠰᡳᠣᠸᠠᠨ ᠴᡝᠩ ᡥᡝᠴᡝᠨ ᠪᡝ ᡴᠠᠮᠴᡳᠮᡝ᠈ ᡥᡠᠨᡝᡥᡝ ᠪᡳᡵᠠ ᠪᡝ ᡠᠮᡳᠶᡝᠰᡠᠨ᠈ ᠶᡝᠨᡩᡝᠨ ᡳ ᠪᠠ ᠪᡝ ᠠᡩᠠᠰᡠᠨ ᡳ ᡤᡝᠰᡝ ᠣᠪᡠᡥᠠ ᡨᠣᠨᡩᠣᡴᠣᠨ ᠠᠮᠪᠠ ᠵᡠᡤᡡᠨ ᠨᡝᠴᡳᠨ ᠨᡝᡳᡤᡝᠨ᠈ ᡧᡝᡥᡠᡴᡝᠨ ᠪᡳᡤᠠᠨ ᡨᠠᠯᠠ ᠪᡠᡵ ᠪᠠᡵ ᠰᡝᠮᡝ᠈ ᠰᠠᡳᠨ ᡶᡝᡵᡤᡠᠸᡝᠴᡠᠨ ᡳ ᠠᠮᠪᡠᠯᠠ ᠪᠣᡵᡥᠣᠮᡝ ᡳᠰᠠᡥᠠᠩᡤᡝ᠈ ᠶᠠᠯᠠ ᡥᡳᠵᠠ ᡥᡠᠵᡠᡴᡠ ᡳ ᡤᡝᠰᡝ᠈
ᠠᠪᡴᠠ ᠨᠠ ᡳ ᠸᡝᠮᠪᡠᠮᡝ ᡥᡡᠸᠠᠯᡳᠶᠠᠮᠪᡠᡥᠠ ᠪᠠ᠉ ᠠᠪᡴᠠᡳ ᡥᠠᠨ ᡤᠣᠰᡳᠮᡝ ᡩᡝᡵᡤᡳ ᠪᠠᡵᡠ ᡨᡠᠸᠠᡶᡳ᠈ ᡠᠪᠠᡩᡝ ᡩᠠᡳᠴᡳᠩ ᡤᡠᡵᡠᠨ ᡩᡝ ᠪᡠᡶᡳ᠈ ᡨᡠᠮᡝᠨ ᠠᠨᡳᠶᠠ ᡩᡝ ᡳᠰᡳᡨᠠᠯᠠ ᡥᠠᠨ᠋ ᡤᡠᡵᡠᠨ ᡳ ᡦᡝᡳ ᡶᡠᠩ ᠨᡳ ᡤᡝᠰᡝ ᠪᠠ ᠣᠪᡠᡥᠠ᠉ ᠠᡳᡴᠠ ᠪᠣᡳᡥᠣᠨ ᡳ ᡴᡝᠮᠨᡝᡴᡠ ᠮᠣᠣ ᡳ ᡴᡝᠮᠨᡝᡴᡠ ᠪᡝ ᠵᠠᡶᠠᡶᡳ ᠪᠣᡩᠣᠮᡝ ᠣᠨᠴᠣ ᡤᠣᠯᠮᡳᠨ ᠪᡝ ᡴᡝᠮᠨᡝᠮᡝ᠈ ᠮᡳᠰᡥᠠᠨ ᠵᡠᡧᡠᡵᡠ ᠪᡝ ᡩᠠᡥᠠᠮᡝ ᠶᠣᡥᠣᡵᠣᠨ ᠪᡳᡵᠠ ᠪᡝ ᡥᠠᡶᡠᠮᠪᡠᡥᠠ᠈ ᠠᡵᠠᠮᡝ ᡩᡝᡵᡳᠪᡠᡥᡝ ᠰᡝᠮᡝ ᡠᠴᡠᠯᡝᡥᡝ ᡝᠯᡥᡝ ᠣᡥᠣ ᠰᡝᠮᡝ ᡳᡵᡤᡝᠪᡠᡥᡝ ᠪᠠᠪᡝ ᠣᠴᡳ᠈ ᡤᡝᠯᡳ ᠪᠠᡥᠠᡶᡳ ᠮᡠᡵᡠᡧᡝᠮᡝ ᡩᠣᠨᠵᡳᡥᠠ᠉ ᠠᠪᡴᠠᡳ ᡩᡠᠯᡳᠩᡤᠠ ᠰᡠᡵᡝ ᡥᠠᠨ ᡳ ᡶᠣᡵᡤᠣᠨ ᠴᡳ᠈ ᠠᠮᠪᠠᡵᠠᠮᡝ ᡳᠯᡝᡨᡠᠯᡝᠮᡝ ᠠᠮᠪᠠᡵᠠᠮᡝ ᠰᡳᡵᠠᠮᡝ᠈ ᡶᡝ ᡧᡝᠨ ᠶᠠᠩ ᠨᡳ ᠪᠠ ᠪᡝ ᡩᠠᡥᠠᠮᡝ᠈ ᠮᡠᠰᡝᡳ ᡳᠴᡝ ᡩᡠᡵᡠᠨ ᠪᡝ ᠪᠠᡩᠠᡵᠠᠮᠪᡠᠮᡝ᠈ ᠠᠪᡴᠠ ᠪᡝ ᡩᡠᠰᡠᠯᡝᠮᡝ ᠨᠠ ᠪᡝ ᡴᡝᠮᠨᡝᠮᡝ᠈ ᡤᡝᠩᡤᡳᠶᡝᠨ ᡳ ᡳᠴᡳ ᡶᠣᡵᡳᡶᡳ ᡝᡵᡳᠨ ᠪᡝ ᡠᠯᠠᡥᠠ᠈ ᠪᠠᡩᠠᡵᠠᠮᠪᡠᠮᡝ ᠮᡳᠯᠠᡵᠠᠮᡝ ᠵᠠᡴᡡᠨ ᡩᡠᡴᠠ ᠨᠣᠩᡤᡳᡶᡳ᠈ ᡨᠣᠨᡩᠣᠯᠣᠮᡝ ᠮᡠᡩᠠᠯᡳᠮᡝ ᡠᠶᡠᠨ ᠠᠮᠪᠠ ᠵᡠᡤᡡᠨ ᠪᡝ ᡥᠠᡶᡠᠮᠪᡠᠮᡝ᠈ ᡠᠨᠴᡝᡥᡝᠨ ᡳ ᡶᡠ ᠪᡝ ᡨᡝᡵ ᠰᡝᠮᡝ ᡨᡝᡴᠰᡳᠨ᠈ ᡥᠣᡨᠣᠨ ᡳ ᡴᡝᡵᡠᠮᡠ ᠪᡝ ᡴᡝᠰ ᠰᡝᠮᡝ ᡩᡝᠨ ᠣᠪᡠᠮᡝ ᠸᡝᡳᠯᡝᡥᡝ᠈
ᠮᡠᡥᡝᠯᡳᠶᡝᠨ ᠮᡠᡥᡠᠨ ᠪᡝ ᡤᡠᠸᠠᠯᡳ ᠵᡠᠯᡝᡵᡤᡳ ᡩᡝ ᡳᠯᡳᠪᡠᡵᡝᡩᡝ᠈ ᡤᡳᠨᠴᡳᡥᡳᠶᠠᠨ ᠪᠣᠯᡤᠣ ᠣᠪᡠᠮᡝ ᡧᡠᡵᡩᡝᠮᡝ ᡶᡠ ᡴᡡᠸᠠᡵᠠᠮᡝ ᠵᠠᡶᠠᡶᡳ᠈ ᡤᡳᠩᡤᡠᠯᡝᠮᡝ ᡳᡥᠠᠨ ᡨᡠᠸᠠ ᠪᡝ ᠮᡠᡥᠠᠯᡳᠶᠠᡶᡳ ᠮᡠᡴᡩᡝᠮᠪᡠᠮᡝ ᡩᡝᡳᠵᡳᠮᡝ ᡤᡠ ᠠᠯᡳᠪᡠᠮᡝ ᡩᡝᡶᡝᠯᡳᠩᡤᡠ ᠵᠠᡶᠠᡶᡳ᠈ ᠶᡡᠨ ᡥᠣ ᡴᡠᠮᡠᠨ ᠪᡝ ᡩᡝᡵᡳᠪᡠᠮᡝ᠈ ᠪᡳᠶᠣᠣᡥᠠ ᠵᠠᠨᠴᡠᡥᡡᠨ ᡠᠰᡳᡥᠠᡳ ᡤᡝᠰᡝ ᡠᡳᡥᡝᠩᡤᡝ ᡳᡥᠠᠨ ᠪᡝ ᡩᠣᠪᠣᠮᡝ᠈ ᠸᠠ ᠰᡠᡴᡩᡠᠨ ᠰᡠᡴᠵᡳᡝᡵᡝ ᠪᡝ ᠪᠠᡳᠮᡝ᠈ ᠵᡠᡴᡨᡝᡵᡝ ᡥᠠᠴᡳᠨ ᠪᡝ ᡳᠯᡝᡨᡠᠯᡝᡥᡝᠪᡳ᠉ ᡤᡝᠴᡝᠨ ᠰᡳᠯᡝᠩᡤᡳ ᠪᡝ ᡶᡝᡥᡠᡥᡝᡩᡝ᠈ ᠨᡳᠶᡝᠩᠨᡳᠶᡝᡵᡳ ᠪᠣᠯᠣᡵᡳ ᡶᠣᡵᡤᠣᡧᠣᡵᠣ ᠰᡝᠮᡝ᠈ ᡥᡳᠣ ᠰᡝᠮᡝ᠈ ᠪᡠᡵᡠ ᠪᠠᡵᠠ ᡳ ᡤᡝᠰᡝ ᡤᡡᠨᡳᠮᡝ᠈ ᠪᠣᠯᡤᠣ ᡤᡠᡵᡠᠩ ᡩᡝ ᡩᡝᡵᡳᠪᡠᠮᡝ ᠵᡠᡴᡨᡝᠮᡝ᠈ ᠰᡳᠯᡤᡳᠶᠠᠮᡝ ᠣᠪᠣᡶᡳ ᡨᡠᡳᠯᡝᡶᡳ ᠪᡠᠵᡠᡥᠠᠩᡤᡝ ᠪᡝ ᡩᠣᠪᠣᠮᡝ᠈ ᠮᡠᡴᡝᡳ ᠨᡠᡵᡝ᠈ ᡠᠨᡨᡠᡥᡠᠨ ᠰᡳᠯᡝ ᡳ ᠸᡝᠴᡝᡵᡝ ᠵᠠᡴᠠᡩᡝ᠈
ᠸᡝᠨ ᡯᡠᠩ ᡥᠠᠨ᠈
ᡧᡝᠨ ᡯᡠᠩ ᡥᠠᠨ ᡠᡨᡥᠠᡳ ᡝᠪᡠᠨᠵᡳᡶᡳ ᠠᠯᡳᠮᡝ ᡤᠠᡳᡥᠠ᠉ ᠠᠪᡴᠠᡳ ᡧᡠᡵᡩᡝᠵᡝᠨ ᡳ ᡩᠠ ᡠᠵᡠᡳ ᡠᠰᡳᡥᠠ ᡩᡝ ᡨᡝᡳᠰᡠᠯᡝᠪᡠᠮᡝ᠈ ᡥᠠᠨ ᡳ ᠶᠠᠮᡠᠨ ᠪᡝ᠈ ᠸᡝᡳ ᠶᠠᠩ ᡤᡠᡵᡠᠩ ᠨᡳ ᡤᡝᠰᡝ ᠴᡳᠨ ᡳ ᠸᡝᡳᠯᡝᡶᡳ᠈ ᠠᡴᡩᡠᠨ ᠰᠠᡳᡴᠠᠨ᠈ ᡳᠯᠠᠨ ᡩᡝᠶᡝᠨ ᠪᡝ ᡩᠠᠪᡴᡡᡵᡳᠯᠠᡶᡳ ᠠᠪᡴᠠᡳ ᡩᡠᡴᠠᡳ ᡤᡝᠰᡝ ᠵᡠᡵᡠᠯᡝᡥᡝ᠈ ᡳᠰᠠᠨᠵᡳᡵᡝ ᡩᡠᡴᠠ ᠪᡝ ᡨᡝᠮᡤᡝᡨᡠᠯᡝᡥᡝ᠈ ᡳᠰᠠᠨᠵᡳᡵᡝ ᡩᡠᡴᠠᡳ ᡤᡝᠪᡠ ᠠᡳ ᠰᡝᠴᡳ᠈ ᡧᡠ ᡳ ᡝᡵᡩᡝᠮᡠᡳ ᡩᡠᡴᠠ᠈ ᠴᠣᠣᡥᠠᡳ ᡤᡠᠩᡤᡝ ᡳ ᡩᡠᡴᠠ ᡳᠨᡠ᠈ ᡩᡝᠶᡝᠨ ᡳ ᡤᡝᠪᡠ ᠠᡳ ᠰᡝᠴᡳ᠈ ᡩᡠᠯᡳᠮᠪᠠ ᡩᡝ ᠸᡝᠰᡳᡥᡠᠨ ᡩᠠᠰᠠᠨ ᡳ ᡩᡝᠶᡝᠨ ᡳᠨᡠ᠈ ᠰᡠᡴᡩᡠᠨ ᠪᡝ ᡥᠠᡵᡤᠠᡧᠠᡵᠠ ᡩᡝᠨ ᡨᠠᡴᡨᡠ ᡩᡝ᠈ ᡤᠠᡵᡠᡩᠠᡳ ᡤᡝᡵᡠᡩᡝᡳ ᠰᡝᡵᡝ ᡥᡝᡵᡤᡝᠨ ᠯᠠᡴᡳᠶᠠᡥᠠᠪᡳ᠈ ᠠᠮᠠᡵᡤᡳ ᡤᡠᡵᡠᠩ ᠪᡝ᠈ ᠵᠠᡴᠰᠠᠩᡤᠠ ᡨᡝᠨ ᡠᠰᡳᡥᠠ ᡩᡝ ᡨᡝᡳᠰᡠᠯᡝᠪᡠᠮᡝ᠈ ᠠᠴᠠᡶᡳ ᡥᡡᠸᠠᠯᡳᠶᠠᡴᠠ ᡤᡡᠨᡳᠨ ᠪᡝ ᡤᠠᡳᠮᡝ᠈ ᡤᡝᠩᡤᡳᠶᡝᠨ ᡝᠯᡥᡝ ᡤᡠᡵᡠᠩ ᠰᡝᡥᡝ᠈ ᡤᡝᠯᡳ ᡥᡡᠸᠠᠯᡳᠶᠠᠰᡠᠨ ᡩᠣᡵᠣᠩᡤᠣ ᡤᡠᡵᡠᠩ᠈ ᡩᠠ ᡤᠣᠰᡳᠨ ᡳ ᡤᡠᡵᡠᠩ ᠸᡝᡳᠯᡝᡶᡳ᠈ ᠸᡝᠨ ᠪᡝ ᡤᡠᡵᡠᠨ ᠪᠣᠣ ᡩᡝ ᠰᡝᠯᡤᡳᠶᡝᡥᡝᠪᡳ᠈ ᡩᠠᠮᡠ ᡤᡠᠯᡠ ᠣᡶᡳ ᡝᠯᡥᡝ ᠣᡥᠣ᠈ ᠴᠣᡥᠣᠮᡝ ᠠᡴᡩᡠᠨ ᠣᡶᡳ ᠰᠠᡳᠨ ᠣᡥᠣ᠈ ᠠᡳᡴᠠ ᡶᠠ ᠵᡝᡵᡤᡠᠸᡝᠨ ᠪᡝ ᠶᠠᠩᠰᡝᠯᠠᠮᡝ ᡶᠣᠯᠣᡥᠣ ᠴᠣᠯᡳᡥᠠ ᠪᡳᡥᡝᠣ᠈ ᠠᡳᡴᠠ ᠮᡠᠯᡠ ᠰᠣᠨ ᠪᡝ ᠮᡳᠶᠠᠮᡳᠮᡝ ᡝᠯᡩᡝᠩᡤᡝ ᠰᠠᡳᡴᠠᠨ ᠣᠪᡠᡥᠠ ᠪᡳᡥᡝᠣ᠈ ᠠᡳᡴᠠ ᠯᡠᠩ ᡧᡝᠣ ᠠᠯᡳᠨ ᡳ ᡨᠣᡴᡩᠣᡥᠣᠨ ᠴᠣᡴᠴᠣᡥᠣᠨ ᠠᠪᠪᡝ ᡩᠠᠰᠠᡨᠠᡶᡳ ᠸᡝᡳᠯᡝᡥᡝ ᠪᡳᡥᡝᠣ᠈ ᠠᡳᡴᠠ ᡤᠠᡵᡠᡩᠠᡳ ᡳ ᠠᠰᡥᠠ ᠰᠠᡵᠠᡥᠠ ᡤᡝᠰᡝ ᡩᡝᠨ ᠸᡝᠰᡳᡥᡠᠨ ᡳ ᠠᡵᠠᡵᠠ ᠪᡳᡥᡝᠣ᠉ ᡝᡵᡝ ᡥᠣᠨᠣ ᡤᡡᠨᡳᠨ ᠪᡳᡶᡳ ᡴᡝᠮᡠᠩᡤᡝ ᠮᠠᠯᡥᡡᠨ ᠣᡴᡳ ᠰᡝᡥᡝᠩᡤᡝ ᠸᠠᡴᠠ ᠪᡳᠮᡝ᠈ ᡨᠣᠣ ᡨᠠᠩ ᠨᡳ ᡶᠣᡵᡤᠣᠨ ᡩᡝ ᠯᠠᡴ ᠰᡝᠮᡝ ᠠᠴᠠᠨᠠᡥᠠᠪᡳ᠈ ᠸᡝᠰᡳᡥᡠᠨ ᡩᠠᠰᠠᠨ ᡳ ᡩᡝᠶᡝᠨ ᠪᡝ ᠵᡠᠯᡝᠰᡳ ᡶᠣᡵᠣᠪᡠᠮᡝ᠈ ᠵᡠᠸᠠᠨ ᠣᡵᡩᠣ ᠪᡝ ᠰᠠᡵ ᠰᡝᠮᡝ ᡶᠠᡳᡩᠠᠮᡝ ᠸᡝᡳᠯᡝᡶᡳ᠈ ᡩᠠᠴᡳᠯᠠᠮᡝ ᡴᡝᠮᠨᡝᠮᡝ ᡳᠨᡝᠩᡤᡳᡩᠠᡵᡳ ᠠᡳᠰᡳᠯᠠᠮᡝ ᡳᠨᡝᠩᡤᡳᡩᠠᡵᡳ ᠮᡠᡨᡝᠪᡠᠮᡝ ᡝᠵᡝᠨ ᠠᠮᠪᠠᠨ ᡳ ᡝᠮᡠ ᡝᡵᡩᡝᠮᡠᡳ ᠰᠠᡳᠨ ᠪᡝ᠈ ᠶᠠᠮᡠᠨ ᡳ ᡩᡠᡴᠠ ᠴᡳ ᠵᠠᡴᡡᠨ ᡩᡝᡵᡝᡳ ᠯᠠᡴᠴᠠᡥᠠ ᠵᡝᠴᡝᠨ ᡩᡝ ᡳᠰᡳᠪᡠᠮᡝ ᠪᠠᡩᠠᡵᠠᠮᠪᡠᡥᠠᠪᡳ᠉ ᠸᡝᠰᡳᡥᡠᠨ ᠴᠣᠯᠣ ᡨᡠᡴᡳᠶᡝᡶᡳ᠈ ᠰᡠᠴᡠᠩᡤᠠ ᠠᠨᡳᠶᠠ ᠪᡝ ᡨᠣᡴᡨᠣᠪᡠᡶᡳ᠈ ᠠᠪᡴᠠᡳ ᡥᡡᡨᡠᡵᡳ ᠪᡝ ᠠᠯᡳᡥᠠ᠈ ᡨᡝᡵᡝᠴᡳ ᠵᡠᠸᡝ ᡤᠠᠯᠠᡳ ᡨᡝᡳᠰᡠ ᠪᡝ ᡨᠣᡴᡨᠣᠪᡠᠮᡝ᠈ ᠵᠠᡴᡡᠨ ᡤᡡᠰᠠᡳ ᠪᠠᠪᡝ ᡶᠠᡴᠰᠠᠯᠠᠮᡝ᠈ ᠰᡠᠸᠠᠶᠠᠨ᠈ ᡧᠠᠨᠶᠠᠨ᠈ ᡶᡠᠯᡤᡳᠶᠠᠨ᠈ ᠯᠠᠮᡠᠨ ᠪᡝ᠈ ᡤᡠᠯᡠ ᠨᡳᠩᡤᡝ ᡴᡠᠪᡠᡥᡝ ᠨᡳᠩᡤᡝ ᠣᠪᡠᠮᡝ᠈ ᠰᡠᠩᡤᠠᡵᡨᡠ ᡠᠰᡳᡥᠠ ᡳ ᠠᡵᠪᡠᠨ ᠪᡝ ᡩᡠᡵᠰᡠᠯᡝᠮᡝ᠈ ᡶᡠ ᡥᡳ ᡳ ᠨᠣᠮᡠᠨ ᡳ ᡨᠣᠨ ᠪᡝ ᠰᠣᠩᡴᠣᠯᠣᠮᡝ᠈ ᠰᡠᠸᠠᠯᡳᠶᠠᡤᠠᠨᠵᠠᡵᠠ ᡨᡝᡥᡝᡵᡝᠪᡠᡵᡝ ᡴᡡᠪᡠᠯᡳᠨ ᠪᡝ ᡶᠣᡵᡤᠣᡧᠣᠮᡝ᠈ ᡠᠶᡠᠨ ᡤᡠᡵᡠᠨ ᠨᡳ ᡶᡝᡵᡤᡠᠸᡝᠴᡠᡴᡝ ᠪᡝ ᠵᠠᡶᠠᠮᡝ᠈ ᠠᠮᠪᠠ ᡝᠨᡩᡠᡵᡳᠩᡤᡝ ᡳ ᡶᡠᡴᠵᡳᠨ ᡴᠣᠣᠯᡳ ᡨᠣᡴᡨᠣᠪᡠᡥᠠᠩᡤᡝ᠈ ᠠᡧᡧᠠᡥᠠᡩᠠᡵᡳ ᠠᠪᡴᠠᡳ ᠠᡵᠪᡠᠨ ᡩᡝ ᠠᠴᠠᠨᠠᡥᠠᠪᡳ᠈ ᡝᡵᡝ ᡠᡨᡥᠠᡳ ᡥᠠᠯᠠᡶᡳ ᠪᡳᡨᡥᡝ ᡨᡝᠮᡤᡝᡨᡠ ᠠᡵᠠᡵᠠ ᡩᡝ᠈ ᡶᠠᡨᡥᠠ᠈ ᠪᡝᡩᡝᡵᡳ ᠪᡝ ᡨᡠᠸᠠᡥᠠᠩᡤᡝ ᠠᡩᠠᠯᡳ ᠪᡳᡥᡝᠪᡳ᠈ ᡶᡳᠶᠠᠨᠵᡳ ᡩᠠᠯᡳᡴᡡ ᡳᠯᡳᠪᡠᡶᡳ᠈ ᡠᠵᡝᠨ ᡩᡝ ᡨᡝᡶᡳ ᠸᡝᡳᡥᡠᡴᡝᠨ ᠪᡝ ᡴᠠᡩᠠᠯᠠᡵᠠ ᠵᠠᡴᠠᡩᡝ᠈ ᡶᡠᠯᡝᡥᡝ ᡤᠠᡵᡤᠠᠨ ᡨᠠᠩᡤᡡ ᠵᠠᠯᠠᠨ ᡩᡝ ᡳᠰᡳᡨᠠᠯᠠ᠈ ᠮᡠᠰᡝᡳ ᠠᠪᡴᠠᡳ ᡶᡳᠰᡝᠨ ᡳ ᡠᡴᠰᡠᠨ ᠪᡝ ᠪᠠᡩᠠᡵᠠᠮᠪᡠᡥᠠ᠉ ᡩᠣᡵᠣ ᡩᡝ ᠠᡳᠰᡳᠯᠠᡥᠠ ᡤᡠᠩᡤᡝ ᠣᠴᡳ ᡶᡳᠣᠩᡩᠣᠨ᠈ ᡝᡳᡩᡠ᠈ ᡥᡳᡶᡝ ᠰᡝᡵᡝᠩᡤᡝ᠈ ᡤᡠᠩᡤᡝ ᠰᡳᠶᠣᠣ ᡥᠣ᠈ ᠵᠠᠩ ᠯᡳᠶᠠᠩ ᠴᡳ ᠴᠣᠯᡤᠣᡵᠣᡴᠣ᠈ ᠵᠠᡳ ᡨᡝᡥᡝᡳ ᡥᡝᠪᡝᡧᡝᡥᡝᠩᡤᡝ ᠪᡳ᠈ ᡤᡳᡩᠠᡥᠠ᠈ ᡶᠣᠨᡩᠣᠯᠣᡥᠣᠩᡤᡝ ᠪᡳ ᠯᡝᡵ ᠰᡝᠮᡝ ᡩᡝᡵ ᠰᡝᠮᡝ᠈ ᡨᡝᡳᠰᡠ ᡨᡝᡳᠰᡠ ᡥᡡᠰᡠᠨ ᠪᡠᠮᡝ ᡶᠠᡧᡧᠠᡥᠠᠩᡤᡝ ᡠᠮᡝᠰᡳ ᠯᠠᠪᡩᡠ᠈ ᡨᡝᡵᡝ ᡤᠠᡵᡠᡩᠠᡳ ᡩᡝ ᠨᡳᡴᡝᡥᡝ᠈ ᠮᡠᡩᡠᡵᡳ ᡶᠠᠰᡳᡥᠠ ᡤᡝᠰᡝᠩᡤᡝ ᠣᠴᡳ᠈ ᡤᡝᠯᡳ ᠰᡝᠵᡝᠨ ᡩᡝ ᡨᡝᠪᡠᠮᡝ ᡥᡳᠶᠠᠰᡝ ᡳ ᠮᡳᠶᠠᠯᡳᡵᡝ ᡤᡝᠰᡝ ᠠᠮᠪᡠᠯᠠ ᠪᡳᡥᡝ᠈ ᡨᡝᡵᡝᠴᡳ ᡤᡠᡵᡠᠨ ᡳ ᠪᡳᡨᡥᡝ ᠪᡝ ᠪᠠᠨᠵᡳᠪᡠᡶᡳ᠈ ᡧᡠ ᡨᠠᠴᡳᡥᡳᠶᠠᠨ ᠪᡝ ᡩᡝᡵᡳᠪᡠᠮᡝ ᠶᡝᠨᡩᡝᠪᡠᠮᡝ᠈ ᠵᡠᡤᡡᠨ ᠪᡝ ᠪᠠᡩᠠᡵᠠᠮᠪᡠᠮᡝ ᡤᡳᠰᡠᠨ ᠪᡝ ᡠᠪᠠᠯᡳᠶᠠᠮᠪᡠᠮᡝ᠈ ᠶᠠᠶᠠ ᡥᠠᠴᡳᠨ ᠪᡝ ᡩᡠᡵᠰᡠᡴᡳᠯᡝᠮᡝ ᡨᡠᠴᡳᠪᡠᡵᡝ ᡩᡝ᠈ ᡩᠠᠮᡠ ᡩᠠᡥᠠᡳ ᠰᡝᡵᡝᠩᡤᡝ ᠶᠠᡵᡤᡳᠶᠠᠨ ᡳ ᠠᠴᠠᠪᡠᠮᡝ ᡩᡠᡳᠯᡝᡵᡝ ᡨᡠᡧᠠᠨ ᠪᡝ ᠠᡴᡡᠮᠪᡠᠮᡝ ᠮᡠᡨᡝᡥᡝ ᡠᡩᡠ ᠯᠠᡴᠴᠠᡥᠠ ᠵᡝᠴᡝᠨ ᠰᡝᠮᡝ ᡠᡵᡠᠨᠠᡴᡡ ᡥᠠᡶᡠᠮᠪᡠᡥᠠ᠈ ᡠᡨᡥᠠᡳ ᠰᡝᡵ ᠰᡝᡵᡝ ᡨᡠᡵᡤᡠᠨ ᠰᡝᠮᡝ ᡳᠨᡠ ᡳᠯᡝᡨᡠᠯᡝᠪᡠᡥᡝ᠉ ᠵᠠᡳ ᡨᡝᡳᠰᡠ ᡨᡝᡳᠰᡠ ᠪᡝᠶᡝᡳ ᠠᡶᠠᡵᠠ ᠪᠠ ᠣᠴᡳ᠈ ᠸᠠᠩ ᠣᡥᠣ ᠨᡳᠶᠠᠯᠮᠠ ᡩᡝ ᠪᠠᡴᠴᡳᠨ ᠠᡴᡡ ᠣᡶᡳ᠈ ᠪᡠᡵᡩᡝᠮᡝ ᠴᡳᡵᠠᠯᠠᠴᡳ ᡨᠠᠩᡤᡡ ᡥᠣᡨᠣᠨ ᡶᠠᡴᠵᡳᠨ ᡠᡶᠠᡵᠠᠪᡠᡥᠠ᠈ ᡨᡝᠮᡤᡝᡨᡠᠨ ᡳ ᠵᠣᡵᡳᡥᠠ ᡳᠴᡳ ᡳᠯᠠᠨ ᠵᠠᠰᡝ ᠰᡝᠯᡤᡳᠶᡝᡥᡝ ᠪᡳᡨᡥᡝ ᡩᡝ ᡨᠣᡴᡨᠣᡥᠣ᠈ ᠵᡠᡵᡤᠠᠩᡤᠠ ᠣᡶᡳ ᠠᠮᠠᠰᡳ ᡨᡠᠸᠠᡧᠠᡥᠠᡴᡡ᠈ ᠪᠠᡨᡠᡵᡠ ᠣᡶᡳ ᡴᡡᠸᠠᡵᠠᠨ ᡩᠠᠪᡴᡡᡵᡳᠯᠠᡵᠠ ᠪᡝ ᠪᠠᡳᠪᡠᡥᠠᡴᡡ᠈ ᡝᡵᡩᡝ ᡩᡠᡳᠨ ᠮᡝᡩᡝᡵᡳ ᠪᠠᡳᠩᡤᡝ ᠪᡝ ᡩᠠᡥᠠᠪᡠᡨᠠᠯᠠ ᡝᠯᠵᡝᡥᡝᠩᡤᡝ ᠠᡴᡡ᠈ ᠮᡳᠩᡤᠠᠨ ᠵᡠᠯᡤᡝ ᠴᡳ ᡝᠪᠰᡳ ᡨᡝᡥᡝᡵᡝᠩᡤᡝ ᠠᡴᡡ᠈ ᡨᡠᡨᡨᡠ ᠵᠠᠯᠠᠨ ᡥᠠᠯᠠᠮᡝ ᠰᡳᡵᠠᡵᠠ ᡥᠠᡶᠠᠨ ᡧᠠᠩᠨᠠᡶᡳ᠈ ᡝᠰᡝᡳ ᠵᠣᠪᠣᡥᠣ ᡶᠠᡧᡧᠠᡥᠠ ᡩᡝ ᡴᠠᡵᡠᠯᠠᠮᡝ ᠨᠠᡩᠠᠨ ᡠᠰᡳᡥᠠᡳ ᡶᡝᠰᡳᠨ ᠠᠮᠠᠰᡳ ᠵᠣᡵᡳᠮᡝ᠈ ᠪᠣᠯᠣᡵᡳ ᡩᡠᠯᡝᡶᡳ ᡨᡠᠸᡝᡵᡳ ᠣᡥᠣ ᠮᠠᠩᡤᡳ᠈ ᠠᠯᠠᡳ ᡩᠣᡵᡤᡳ ᡩᡝ ᠠᠪᠠᠯᠠᠮᡝ᠈ ᠮᡠᠰᡝᡳ ᠴᠣᠣᡥᠠᡳ ᠠᡤᡡᡵᠠ ᠪᡝ ᡩᠠᠰᠠᡨᠠᠴᡳ᠈ ᡥᡡᠸᠠᠰᠠᡵ ᠰᡝᡵᡝᠩᡤᡝ ᠪᠣᠴᠣᠩᡤᠣ ᠨᡳᠣᡵᠣᠨ ᡳ ᡤᡝᠰᡝ ᠸᠠᡩᠠᠨ᠈ ᠯᡝᡵ ᠰᡝᡵᡝᠩᡤᡝ᠈ ᡤᡝᠯᡶᡳᠶᡝᠨ ᠨᡳᠣᡵᠣᠨ ᡳ ᡤᡝᠰᡝ ᡨᡠᡥᡝᠪᡠᡴᡠ᠈ ᡥᡡᠸᠠᡵ ᠰᡝᡵᡝᠩᡤᡝ᠈ ᡨᠠᠯᠮᠠᠨ ᠴᡳ ᠴᠣᠯᡤᠣᡵᠣᡴᠣ ᡨᡠᡵᡠᠨ᠈ ᡧᡠᠸᠠᡳ ᠰᡝᡵᡝᠩᡤᡝ ᡨᡠᡤᡳ ᡩᡝ ᠰᡠᠴᡠᠨᠠᡵᠠ ᡤᡳᡵᡩᠠᠨ᠈ ᠠᠮᠠᡵᡤᡳᠩᡤᡝ ᠠᡩᠠᡥᠠ ᠰᡝᠵᡝᠨ᠈ ᠵᡠᠯᡝᡵᡤᡳᠩᡤᡝ ᠶᠠᡵᡠᡵᡝ ᡤᠠᠵᠠᡵᠴᡳᠯᠠᡵᠠᠩᡤᡝ᠈ ᠮᡠᠰᡝᡳ ᡠᠵᡳᠨ ᡩᠠᡥᠠᠨ ᠪᡝ ᠶᠠᠯᡠᠮᡝ᠈ ᡨᡝᡵᡝ ᠴᠣᠯᡳᡥᠠ ᠰᡝᠵᡝᠨ ᠪᡝ ᠪᠠᡳᡨᠠᠯᠠᡥᠠᡴᡡ ᠪᡳᡥᡝ᠉ ᠵᡝᠪᡝᠯᡝ ᡝᡵᡤᡳ ᠪᡝᡩᡝᡵᡝᠪᡠᡵᠠᡴᡡ ᡩᠠᠴᡠᠨ ᠰᡳᡵᡩᠠᠨ᠈ ᡩᠠᠰᡥᡡᠸᠠᠨ ᡝᡵᡤᡳ ᡨᠠᡴᠰᡳᠪᡠᡵᠠᡴᡡ ᡠᠯᡤᠠ ᠪᡝᡵᡳ ᡳ ᡤᡳᠶᠣᠪ ᠰᡝᠮᡝ ᡤᠠᠪᡨᠠᡧᠠᡵᠠᠩᡤᡝ᠈ ᠠᡴᠵᠠᠨ ᡳ ᡩᡠᡵᡤᡝᡵᡝ ᡤᡝᠰᡝ᠈ ᠰᡳᡵᡝᠨᡝᠮᡝ ᡩᠠᡥᠠᠯᠠᡵᠠᠩᡤᡝ᠈ ᡠᠰᡳᡥᠠ ᡳ ᡝᠶᡝᡵᡝ ᠠᡩᠠᠯᡳ᠈ ᡝᡩᡝ ᡤᡝᠯᡳ ᠸᠠᠩ ᠯᡳᠶᠠᠩ ᠨᡳ ᠵᡠᠯᡥᡡ ᠠᠯᡳᠪᡠᡵᡝ ᠰᡳᠶᠠᠨ ᠣ ᡳ ᠰᡝᠵᡝᠨ ᠵᠠᡶᠠᡵᠠ ᠪᡝ ᠠᡳ ᠪᠠᡳᠪᡠᡵᡝ ᠪᠠᠪᡳ᠉ ᡨᡝᡵᡝᠴᡳ ᡠᡴᠰᡳᠯᡝᡥᡝ ᡨᠠᠩᡤᡡ ᡨᡠᠮᡝᠨ ᠴᠣᠣᡥᠠ᠈ ᠰᠠᠰᠠ ᡤᡳᠶᠠᡥᡡᠨ ᠪᡝ ᠮᠠᡴᡨᠠᠮᡝ᠈ ᡳᠨᡩᠠᡥᡡᠨ ᠪᡝ ᠴᡠᡴᡠᠯᡝᠮᡝ᠈ ᠣᡵᡳᠨ ᠪᡝ ᠨᡳᠣᠯᡥᡠᠮᠪᡠᠮᡝ᠈ ᡨᠠᡳ ᡧᠠᠨ ᠠᠯᡳᠨ ᠪᡝ ᡨᠠᡴᡨᡠ ᠨᠣᡥᠣ ᠰᡝᠵᡝᠨ ᠣᠪᡠᡥᠠ ᠰᡝᡥᡝ ᠪᡝ ᠪᠠᠰᡠᡥᠠ᠈ ᠠᠮᠪᠠ ᠮᡝᡩᡝᡵᡳ ᠪᡝ ᠠᡴᡩᠠᠯᠠᠮᡝ᠈ ᠠᠰᡠ ᠰᠠᡵᠠᠮᡝ ᠶᠠᠪᡠᡥᠠ ᠰᡝᡥᡝᠩᡤᡝ᠈ ᡤᡝᠯᡳ ᠠᡳ ᡩᠠᠪᡠᡶᡳ ᡤᡳᠰᡠᡵᡝᡵᡝ ᠪᠠᠪᡳ᠉ ᡨᡠᡨᡨᡠ ᡩᡝᡵ ᠰᡝᠮᡝ᠈ ᡨᡝᡵ ᠰᡝᠮᡝ᠈ ᠯᡝᡵ ᠰᡝᠮᡝ᠈ ᡶᠠᡵ ᠰᡝᠮᡝ ᠵᠣᡵᡳᠨ ᠪᡝ ᡨᠣᡴᡨᠣᠪᡠᡶᡳ ᡤᠠᠪᡨᠠᡥᠠᡩᠠᡵᡳ ᡨᠠᠪ ᠰᡝᡵᡝ ᠵᡳᠯᡤᠠᠨ ᡳ ᠰᠠᠰᠠ ᡨᡠᡥᡝᠪᡠᡥᡝ ᠪᡳᡤᠠᠨ ᡩᡝ ᡥᡳᠶᠠᠨᠴᡳᠯᠠᡥᠠ ᠰᡝᠰᡳᠯᡝᡥᡝ ᠮᠠᡶᡠᡨᠠ ᠪᡝ ᡶᠠᠴᠠᠪᡠᠮᡝ᠈ ᠶᡝᡵᡠ ᡩᡝ ᠰᠣᠮᡳᠮᡝ ᡨᠣᠮᠣᡥᠣ ᠮᠠᠩᡤᡳᠰᡠ ᠪᡝ ᡩᡝᡴᡩᡝᠪᡠᠮᡝ᠈ ᡶᡳᠶᡝᠯᡝᡴᡠ ᡩᡝ ᠠᡳᡥᠠᡩᠠᡵᠠ ᠴᡠᠮᠴᡠᡵᠠᡵᠠ ᠪᡠᡴᡠᠨ ᠪᡝ ᠠᡴᠰᠠᠪᡠᠮᡝ᠈ ᡩᠠᡴᡩᠠ ᡩᠠᡴᡩᠠ ᠪᡳᡤᠠᠨ ᡳ ᡤᡡᠯᠮᠠᡥᡡᠨ ᠪᡝ ᠪᠣᡧᠣᠮᡝ᠈ ᠮᡝᡳᡵᡝᠨ ᡧᠠᡩᠠᡨᠠᠯᠠ ᡤᠠᠯᠠ ᠯᡠᠰᡠᡨᡝᠯᡝ ᠪᠠᡥᠠ ᠪᡳᠮᡝ᠈ ᡶᡝᠨᡳᠶᡝᠨ ᡶᡝᠨᡳᠶᡝᠨ ᡳ ᡤᡠᡵᡤᡠ᠈ ᡴᡝᠮᡠᠨᡳ ᠠᠯᡳᠨ ᡩᡝ ᠰᡳᡵᡝᠨᡝᠮᡝ ᠪᡳᡤᠠᠨ ᡩᡝ ᠰᡝᡴᡨᡝᠮᡝ᠈ ᠵᡠᠸᠠᡵᡳ ᠣᡵᡥᠣ ᡳ ᡤᡝᠰᡝ ᡶᠣᠰᠣᡵ ᠰᡝᠮᡝ ᠪᡳ᠈ ᡨᡠᡨᡨᡠ ᡳᠯᠠᠨ ᡩᡝᡵᡝᡳ ᡴᠠᡵᠠ ᡩᠣᡵᠣᡳ ᠠᠪᠠᠯᠠᠮᡝ᠈ ᠶᠣᠣᠨᡳ ᠸᠠᡵᠠᡴᡡ ᠪᡝ ᡨᡠᠸᠠᠪᡠᠮᡝ᠈ ᡤᡝᠯᡳ ᡤᠣᠴᡳᡴᠠ᠈ ᡴᠣᡵᡩᠣᠩᡤᠣ ᡥᠠᡶᠠᠰᠠ ᡩᡝ ᠠᡶᠠᠪᡠᡶᡳ᠈ ᠶᠠᡵᡥᠠ ᡳ ᡠᠨᠴᡝᡥᡝᠨ ᠪᡝ ᡨᠠᡨᠠᠮᡝ᠈ ᡨᠠᠰᡥᠠ ᡳ ᡠᠵᡠ ᠪᡝ ᡤᡳᡩᠠᠮᡝ ᠠᡴᡩᡠᠨ ᡳ ᠯᡝᡶᡠ ᠪᡝ ᠵᠠᡶᠠᠮᡝ᠈ ᠪᡳᡤᠠᠨ ᡳ ᠰᠠᡴᡩᠠ ᠪᡝ ᠸᠠᠮᡝ᠈ ᠪᠠᡨᡠᡵᡠ ᡥᠠᡥᠠᠰᡳ ᡴᠠᠰ ᡴᡳᠰ ᠰᡝᠮᡝ ᠠᡵᠪᡠᡧᠠᡵᠠ ᠪᡝ ᡨᡠᠸᠠᠮᡝ᠈ ᡝᠰᡥᡠᠨ ᡤᡠᡵᡤᡠ ᡳ ᡳᠴᡝ ᠨᡳᠶᠠᡵᡥᡡᠨ ᠪᡝ ᠰᡝᠯᠠᠮᡝ ᠪᠠᡥᠠ ᠮᠠᠩᡤᡳ᠈ ᡨᡝᠨᡳ ᠮᡠᠰᡝᡳ ᠪᡠᡨᠠᡥᠠ ᠠᠮᠪᠠ ᡤᡠᡵᡤᡠ ᠪᡝ ᠠᠯᡳᠪᡠᠮᡝ᠈ ᡨᡝᡵᡝ ᠠᡵᠴᠠᠮᡝ ᠸᠠᡥᠠᠩᡤᡝ ᠪᡝ ᠸᠠᠯᡳᠶᠠᡶᡳ᠈ ᠰᠣᠨᠵᠣᡥᠣ ᡠᠵᡠ ᠵᡝᡵᡤᡳ ᠸᠠᡥᠠᠩᡤᡝ᠈ ᠶᠠᡵᡤᡳᠶᠠᠨ ᡳ ᡥᠠᠰᡥᡡ ᡝᡵᡤᡳ ᠴᠣᠮᠪᠣᠯᡳ ᡳ ᡶᡝᠶᡝᡳᠩᡤᡝ ᠣᠴᡳ᠈ ᠮᠠᡶᠠᡵᡳ ᠵᡠᡴᡨᡝᡥᡝᠨ ᡩᡝ ᠪᠠᡳᡨᠠᠯᠠᡵᠠ ᠵᠠᠯᡳᠨ᠈ ᡴᠠᡨᠠᠪᡠᡶᡳ ᠮᠣᠣᠰᡳᡨᡠᠨ ᡩᡝ ᡨᡝᠪᡠᡵᡝ᠈ ᡧᠣᠯᠣᡵᠣ ᠴᡳᡨᡠᡵᡝ ᡩᡝ ᠣᠪᡠᡶᡳ᠈ ᠰᡳᡵᠠᠮᡝᠩᡤᡝ ᠪᡝ ᠠᠨᡨᠠᡥᠠᠰᠠ ᡩᡝ ᠪᡝᠯᡥᡝᡥᡝ ᠮᠠᠩᡤᡳ᠈ ᡨᡝᠨᡳ ᡩᠣᡵᡤᡳ ᠪᡠᡩᠠᡳ ᠪᠣᠣᡩᡝ ᠪᡝᠨᡝᡥᡝ᠈ ᠪᠠᡥᠠᠩᡤᡝ ᠪᡝ ᠰᠠᠯᠠᠮᡝ ᡧᠠᠩ ᡳᠰᡳᠪᡠᡵᡝ ᡩᡝ ᡨᡝᡵᡤᡝᠴᡳ᠈ ᠠᠯᠪᠠᠰᠠ ᡳ ᠵᡝᡵᡤᡳ ᠪᡠᠶᠠ ᡠᡵᠰᡝ ᡩᡝ ᠠᡴᡡᠨᠠᡥᠠ᠈ ᡝᡵᡝ ᠴᠣᡥᠣᠮᡝ ᠠᠪᡴᠠ ᠨᠠ ᡳ ᠠᡳᠰᡳ ᠪᡝ ᡩᠠᡥᠠᠮᡝ᠈ ᠴᠣᠣᡥᠠᡳ ᡠᡵᠰᡝ ᠪᡝ ᠨᡳᠶᠠᠨᠴᠠᠩᡤᠠ ᠣᠪᡠᠮᡝ ᡠᡵᡝᠪᡠᡥᡝᠩᡤᡝ ᠣᡶᡳ᠈ ᡨᡠᡨᡨᡠ ᠠᡶᠠᠴᡳ ᡝᡨᡝᡥᡝ᠈ ᠸᡝᠴᡝᠴᡳ ᡥᡡᡨᡠᡵᡳ᠈ ᠪᡝ ᠠᠯᡳᡥᠠ᠈ ᠵᡠᠯᡤᡝᡳ ᠣᡨᠣᡵᡳᠯᠠᡵᠠ᠈ ᡠᠯᡠᠨ ᡤᡳᡩᠠᡵᠠ᠈ ᠰᠠᡥᠠᡩᠠᡵᠠ᠈ ᡥᠣᡳᡥᠠᠯᠠᡵᠠ ᡩᠣᡵᠣᠯᠣᠨ ᠪᡝ ᡳᠯᡝᡨᡠᠯᡝᡥᡝᠩᡤᡝ᠉ ᠠᡳᠨᠠᡥᠠᡳ ᡨᡝᠨᡨᡝᡴᡝ ᡳᠯᠠᠨ ᡝᡵᡳᠨ ᡳ ᡠᠰᡳᠨ ᡳ ᠵᡝᡴᡠ ᠪᡝ ᡨᠣᠣᡴᠠᠪᡠᡥᠠ᠈ ᡨᠠᠩᡤᡡ ᡥᠠᠯᠠ ᡳ ᡥᡠᠸᡝᡴᡳ ᡠᠰᡳᠨ ᠪᡝ ᡝᠵᡝᠯᡝᡥᡝ᠉ ᠨᡳᠮᠠᠯᠠᠨ ᠮᠣᠣ ᡨᡝᠪᡠᡥᡝ ᠪᠠᠪᡝ ᠰᡠᠰᡠᠩᡤᡳᠶᠠᡥᠠ᠈ ᠰᠠᡥᠠᡩᠠᡵᠠ ᠠᠪᠠᠯᠠᡵᠠ ᡴᡡᠸᠠᡵᠠᠨ ᠪᡝ ᠪᠠᡩᠠᡵᠠᠮᠪᡠᡥᠠ᠈ ᡯᡳ ᡥᡳᠣᡳ ᡶᡠᠵᡠᡵᡠᠨ᠈ ᡧᠠᠩ ᠯᡳᠨ ᠶᠠᡶᠠᠨ ᡳ ᡶᡠᠵᡠᡵᡠᠨ ᡳ ᡩᠠᡵᡳᡥᠠᠩᡤᡝ ᠠᡩᠠᠯᡳ᠈ ᠪᡳᡥᡝᠪᡳ᠉ ᡥᠣᡧᠣᡳ ᡝᠵᡝᡨᡝ ᡶᡝᠨᡳᠶᡝᠨ ᡶᡝᠨᡳᠶᡝᠨ ᡳ ᠠᠴᠠᡶᡳ ᡤᠣᠯᠣᡳ ᠪᡝᡳᠰᡝ ᠣᠯᡥᠣᡧᠣᡥᠣ ᡩᠠᡩᡝ ᠣᠯᡥᠣᡧᠣᠮᡝ ᠠᠯᠪᠠᠨ ᠵᠠᡶᠠᠮᡝ ᡥᠠᡵᡤᠠᡧᠠᠨᠵᡳᡥᠠ ᡤᡳᠩᡤᡠᠨ ᠣᠯᡥᠣᠪᠠ ᡳ ᠶᠠᠮᡠᠨ ᡩᡝ ᠶᠠᠪᡠᡥᠠ᠉ ᡝᡳᠴᡳ ᡥᡝᠩᡴᡳᡧᡝᠮᡝ ᡤᡝᡤᡝ ᠵᠣᡵᡳᡵᡝ ᠪᡝ ᠪᠠᡳᡥᠠ᠈ ᡝᡳᠴᡳ ᠮᡠᠵᡳᠯᡝᠨ ᡥᡠᠩᡴᡝᡵᡝᠮᡝ ᠰᠠᡵᡤᠠᠨ ᠵᡠᡳ ᠰᠣᠨᠵᠣᡵᠣ ᠪᡝ ᠪᠠᡳᡥᠠᠩᡤᡝ ᡩᡝ᠈ ᡠᠶᡠᠨ ᠮᡠᡩᠠᠨ ᡩᡝᡵᡳᠪᡠᡵᡝ ᡴᡠᠮᡠᠨ᠈ ᠵᠠᡴᡡᠨ ᡥᠠᠴᡳᠨ ᡳ ᠠᠮᡨᠠᠩᡤᠠ ᠪᠣᠣᡥᠠ ᡳ ᠰᠠᡵᡳᠯᠠᡥᠠᠪᡳ᠈ ᡥᡡ ᡥᠠᠨ ᠶᡝ ᡳ ᡩᡝᠯᡝ ᡥᠠᡵᡤᠠᡧᠠᠨᠵᡳᡥᠠ ᠴᡳ ᡩᡠᠯᡝᡶᡳ᠈ ᡤᡳᠶᡝᡳ ᠯᡳᡳ ᡳ ᠶᠠᠮᡠᠨ ᡩᡝ ᠮᠠᡴᠰᡳᡥᠠ ᠴᡳ ᠴᠣᠯᡤᠣᡵᠣᡶᡳ᠈ ᡩᠣᡵᡤᡳ ᡨᡠᠯᡝᡵᡤᡳᠩᡤᡝ ᠪᡝ ᡠᡥᡝᡵᡳᠯᡝᡶᡳ ᡝᠮᡠ ᠪᠣᠣ ᠣᡥᠣᠩᡤᡝ᠈ ᠮᡳᠨᡳ
ᠮᠠᡶᠠᡵᡳ ᠴᡳ ᡠᡨᡥᠠᡳ ᡠᡨᡨᡠ ᠪᡳᡥᡝ ᡴᠠᡳ᠉ ᠠᡴᡩᡠᠨ ᠣᠪᡠᠴᡳ ᠠᠴᠠᡵᠠ ᠪᠠ ᠣᠴᡳ᠈ ᡩᠠᠯᡳᠩᡥᠣ ᠰᡝᡵᡝ ᠪᠠ᠈ ᡝᠮᡠ ᡳᡴᡳᡵᡳ ᡥᡠᠸᡝᡴᡳ ᠰᠠᡳᠨ ᠣᠨᠴᠣ ᠯᡝᠯᡳ᠈ ᠨᡳᠶᠠᠨᠴᡳᡥᠠ ᠣᠩᡴᠣ ᠯᡝᡵ ᠰᡝᠮᡝ ᠰᡝᡴᡨᡝᠮᡝ ᠪᠠᠨᠵᡳᡥᠠᠪᡳ᠈ ᠵᡠᠸᠠᡵᡳ ᡶᠣᡵᡤᠣᠨ ᡩᡝ ᠵᡝᠴᡝᠨ ᡳ ᠪᠠᡩᡝ ᡤᠠᠯᠮᠠᠨ ᠠᡴᡡ᠈ ᠨᡳᠶᡝᠩᠨᡳᠶᡝᡵᡳ ᡶᠣᡵᡤᠣᠨ ᡩᡝ ᡧᡝᡵᡳ ᠮᡠᡴᡝ ᠪᡳᠯᡤᡝᡧᡝᠮᡝ ᡩᡝᠯᡳᡧᡝᠮᠪᡳ᠈ ᡨᡠᡨᡨᡠ ᠣᡶᡳ᠈ ᠶᠣᡥᠣᡵᠣᠨ ᡤᠣᠴᡳᡴᠠ ᠮᠣᡵᡳᠰᠠ᠈ ᠪᠠᠨᠵᡳᡥᠠ ᡶᡠᠰᡝᡴᡝᠩᡤᡝ ᡠᠮᡝᠰᡳ ᠯᠠᠪᡩᡠ᠈ ᡨᡝᡵᡝ ᡴᠠᡵᠠ᠈ ᠠᠯᡥᠠ᠈ ᠰᡠᡳᡥᠠ ᡶᡠᠯᠠᠨ᠈ ᡴᡡᠸᠠ ᠠᠯᡥᠠ᠈ ᠵᡝᡵᡩᡝ᠈ ᡨᠣᠯᠪᠣᡨᡠ᠈ ᡴᠠᡳᠯᡠᠨ᠈ ᠪᠣᡵᠣ ᡶᡠᠯᠠᠨ᠈ ᡴᡝᡳᡵᡝ᠈ ᡨᠣᠰᡳ᠈ ᠰᡝᠪᡝᡵᡳ᠈ ᡴᡡᠸᠠ ᡴᠠᡵᠠ ᡶᡠᠯᠠᠨ᠈ ᡶᡠᠯᠠᠨ᠈ ᠰᠠᡵᠯᠠ᠈ ᠪᡠᡵᡠᠯᡠ ᡝᡴᡳᠰᠠᡴᠠ ᡩᡝᡩᡠᡵᡝᠩᡤᡝ ᡩᡝᡩᡠᠮᠪᡳ᠈ ᡴᡠᡨᡠᡵ ᠰᡝᠮᡝ ᠶᠠᠪᡠᡵᡝᠩᡤᡝ ᠶᠠᠪᡠᠮᠪᡳ᠈ ᡩᠠᠮᡠ ᡶᠣᡵᠣᠮᡳᠮᡝ ᠶᠠᠪᡠᡵᡝ ᡩᡝ ᠪᠠᡳᡨᠠᠩᡤᠠ ᠰᡝᡵᡝ ᠠᠩᡤᠠᠯᠠ᠈ ᡥᠣᡵᠣᠨ ᠪᡝ ᠠᠯᡤᡳᠮᠪᡠᡵᡝ ᠪᠠᡳᡨᠠᠯᠠᡵᠠ ᡩᡝ ᡳᠨᡠ ᡝᡵᡝᠴᡳ ᡩᡠᠯᡝᡵᡝᠩᡤᡝ ᠠᡴᡡ᠉ ᡥᠣᡨᠣᠨ ᠪᡳᡤᠠᠨ ᠪᡝ ᠪᠠᡩᠠᡵᠠᠮᠪᡠᠮᡝ ᠸᠠᠵᡳᡶᡳ᠈ ᡠᠰᡳᠨ ᠨᡳᠮᠠᠯᠠᠨ ᡳ ᠪᠠᡳᡨᠠ ᠪᡝ ᡥᡠᠸᡝᡴᡳᠶᡝᠪᡠᠴᡳ ᠠᠴᠠᠮᡝ ᠣᡶᡳ᠈ ᡨᡝᡵᡝᠴᡳ ᡠᠰᡳᠨ ᡳ ᡥᠠᡶᠠᠰᠠ ᠪᡝ ᡨᠠᡴᡡᡵᠠᡶᡳ᠈ ᡨᡝᡵᡝᠴᡳ ᡨᠣᡴᠰᠣᠨ ᡩᠠᡨᠠ ᡩᡝ ᠠᡶᠠᠪᡠᡶᡳ᠈ ᡶᡠᠯᡠ ᠠᠨᡳᠶᠠᡩᡝ ᠵᡝᡴᡠᡳ ᡠᠰᡝ ᠪᡝ ᡴᡳᠮᠴᡳᠮᡝ᠈ ᠨᡠᡥᡠ ᠨᡠᡥᠠᠯᡳᠶᠠᠨᡩᡝ ᠠᠴᠠᡵᠠᠩᡤᡝ ᠪᡝ ᡳᠯᡤᠠᠮᡝ᠈ ᡥᠠᡥᠠᠰᡳ ᠪᡝ ᡨᠠᡵᡳᡵᡝ ᠶᠠᠩᠰᠠᡵᠠ ᡩᡝ ᡥᡡᠰᡠᡨᡠᠯᡝᠪᡠᠮᡝ᠈ ᡥᡝᡥᡝᠰᡳ ᠪᡝ ᠵᠣᡩᠣᡵᠣ ᡶᠣᡵᠣᡵᠣ ᡩᡝ ᡴᡳᠴᡝᠪᡠᠮᡝ᠈ ᡶᠠᡴᠰᡳ᠈ ᡥᡡᡩᠠᡳ ᡠᡵᠰᡝᡳ ᡩᡠᠪᡝᡳ ᠪᠠᡳᡨᠠ ᠪᡝ ᡶᡠᠰᡳᡥᡡᠨ ᠣᠪᡠᠮᡝ᠈ ᡝᡨᡠᡴᡠ ᠵᡝᡴᡠ ᡳ ᡩᠠ ᡴᡳᠴᡝᠨ ᡩᡝ ᡶᠠᡧᡧᠠᠪᡠᠮᡝ ᠣᡶᡳ᠈ ᡨᡠᡨᡨᡠ ᡧᡠᠮᡳᠨ ᡨᠠᡵᡳᠮᡝ ᠪᠣᠯᡤᠣᡳ ᠶᠠᠩᠰᠠᡥᠠ ᡩᡝ᠈ ᠵᡝᡴᡠ ᡝᡵᡝᠴᡳ ᡝᠯᡤᡳᠶᡝᠨ ᠣᡥᠣ᠉ ᠵᡠᠸᠠᡵᡳ ᡠᠶᡠᠨᠵᡠ ᡳᠨᡝᠩᡤᡳ ᡳᠯᠠᠨ ᠮᡠᡩᠠᠨ ᠶᠠᠩᠰᠠᡥᠠ ᡩᡝ᠈ ᠮᡠᡴᡝ ᠯᠠᠮᡦᠠ ᠴᡳ ᡤᡠᠸᡝᡥᡝ᠈ ᠮᡠᠰᡝᡳ ᠠᠯᠪᠠᠨ ᡳ ᡠᠰᡳᠨ ᡩᡝ ᠠᡤᠠᡥᠠ ᠮᠠᠩᡤᡳ᠈ ᡠᡨᡥᠠᡳ ᠪᡝᠶᡝᡳᠩᡤᡝ ᡩᡝ ᡳᠰᡳᠪᡠᡥᠠ᠉ ᠮᡠᠰᡝᡳ ᠠᠨᠵᠠ ᡥᠣᠮᡳᠨ ᠪᡝ ᠪᡝᠯᡥᡝᡥᡝᠩᡤᡝ᠈ ᠵᡳᠩ ᡥᠠᡩᡠᡶᡠᠨ ᡳ ᡥᠠᡩᡠᡵᡝ ᡝᡵᡳᠨ᠈ ᠮᡠᠰᡝᡳ ᡥᠠᡶᡠᡩᡠᠨ ᡩᡝ ᡨᡝᠪᡠᡥᡝ ᠠᠮᠰᡠᠨ᠈ ᠶᠠᡵᡤᡳᠶᠠᠨ ᡳ ᡤᡝᠮᡠ ᠰᠠᡳᠨ ᠪᡝᠯᡝ ᠮᡠᠰᡝᡳ ᠴᠠᠯᡠ ᠮᡠᠩᡤᠠᠨ ᡳ ᠠᡩᠠᠯᡳ᠈ ᠴᠠᡥᡳᠨ ᡨᠣᠨ ᡳ ᠠᡩᠠᠯᡳ ᠣᡥᠣ᠉ ᡝᡨᡠᡴᡠ ᠪᠣᠰᠣ ᡴᡠᠪᡠᠨ ᠨᡳᠩᡤᡝ ᠪᡝ ᠸᡝᠰᡳᡥᡠᠯᡝᠮᡝ ᡶᠠᡴᠰᡳ ᠰᠠᡳᡴᠠᠨ ᠪᡝ ᡥᡳᡥᠠᠯᠠᡥᠠᡴᡡᠪᡳ᠈ ᡨᡝᡨᡠᠨ᠈ ᠶᡝᡥᡝᡨᡠᠨ ᡳ ᡩᡝᡳᠵᡳᡥᡝ ᡥᠣᡨᠣᡳ ᠸᡝᡳᠯᡝᡥᡝᠩᡤᡝ ᠪᡝ ᠪᠠᡳᡨᠠᠯᠠᠮᡝ᠈ ᠮᠠᠮᡤᡳᠶᠠᡴᡡ ᠮᡳᠶᠠᠮᡳᡧᠠᡴᡡ ᠪᡝ ᡨᠠᡵᡤᠠᡥᠠᠪᡳ᠉ ᡩᠠᠮᡠ ᠪᠣᡳᡥᠣᠨ ᠴᡳ ᡨᡠᠴᡳᡵᡝ ᠵᠠᡴᠠ ᠪᡝ ᠰᠠᡳᡧᠠᡵᠠ ᠵᠠᡴᠠᡩᡝ᠈ ᡝᠨᡩᡠᡵᡳ ᠰᠠᡳᠨ ᠵᠠᡴᠠ ᠪᡝ ᠰᠠᠯᠠᠮᡝ ᠪᠠᠨᠵᡳᡥᠠ᠈ ᡝᡵᡳᠨ ᠣᠴᡳ᠈ ᠰᠠᡥᠠᠯᡳᠶᠠ ᡳᡵᠠ᠈ ᡴᠠᠪᠠᠩᡤᠠ᠈ ᡥᠠᠨᡩᡠ ᠣᠴᡳ᠈ ᠶᡝᠶᡝ ᡥᠠᠨᡩᡠ᠈ ᡧᠠᠨᠶᠠᠨ ᠪᡝᠯᡝ᠈ ᠵᡝ ᠪᡝᠯᡝ ᠣᠴᡳ᠈ ᡶᡠᠯᡤᡳᠶᠠᠨ ᡶᡳᠰᡳᡥᡝ᠈ ᡧᠠᠨᠶᠠᠨ ᡶᡳᠰᡳᡥᡝ᠈ ᠨᡳᠶᠠᠯᡤᡠ ᠣᠴᡳ᠈ ᡶᡠᠯᡤᡳᠶᠠᠨ ᠨᡳᠶᠠᠩᡤᡠ᠈ ᠰᡠᠸᠠᠶᠠᠨ ᠨᡳᠶᠠᠩᡤᡠ᠈ ᡥᡡᠯᡳᠮᠪᠠ ᠰᠠᡥᠠᠯᡳᠶᠠᠨ ᠵᡳᠮᠠ ᠮᠠᠯᠠᠩᡤᡡ ᠮᠠᡳᠰᡝ᠈ ᠮᡠᠵᡳ᠈ ᠠᡵᡶᠠ᠈ ᠰᠠᡥᠠᠯᡳᠶᠠᠨ ᠮᠠᠯᠠᠩᡤᡡ᠈ ᡧᡠᡧᡠ ᡶᡠᠯᡤᡳᠶᠠᠨ ᡶᠠᡴᠰᠠᠯᠠᡥᠠᠪᡳ᠈ ᡨᡠᡵᡳ ᡩᡝ ᠪᠣᡥᠣᡵᡳ᠈ ᡤᡳᠶᠠᠩᡩᡠ ᠪᡳ᠈ ᠰᠣᡤᡳ ᠣᠴᡳ᠈ ᠸᠠᡥᡡᠨᡩᠠ ᠰᠣᡤᡳ᠈ ᠮᠠᠴᠠ᠈ ᠰᡠᠸᠠᠨᡩᠠ᠈ ᠮᡠᡵᠰᠠ᠈ ᠰᡝᠩᡴᡠᠯᡝ᠈ ᡝᠯᡠ᠈ ᡝᠮᡦᡳ᠈ ᠣᡴᠵᡳᡥᠠ᠈ ᠴᡠᠰᡝ ᠮᠣᠣ ᡳ ᠠᡵᠰᡠᠨ᠈ ᡧᡠᡧᡠ ᡤᡳᠨᡨᠠᠯᠠ᠈ ᠰᡠᠰᡝᡵᡳ᠈ ᡥᠣᡨᠣ᠈ ᠮᡝᠨᠵᡳ᠈ ᡝᡳᠮᡦᡝ᠈ ᡥᡳᠩᠨᡝᠴᡳ᠈ ᡶᡠᡵᡤᡳᠰᡠ᠈ ᡩᡝᡵ ᠰᡝᠮᡝ ᠯᡝᡵ ᠰᡝᠮᡝ ᡶᡳᡴ ᠰᡝᠮᡝ ᡧᠠᠯᠠᡵ ᠰᡝᠮᡝ᠈ ᡨᡝᡵ ᠰᡝᠮᡝ ᡧᠠᡴ ᠰᡝᠮᡝ᠈ ᠨᠠᡵᡥᡡᠨ ᡶᡳᠰᡳᠨ ᠪᡠᡴᡨᠠᠨ ᠪᡠᡴᡨᠠᠨ ᡳ ᠪᠠᠨᠵᡳᡵᠠᡴᡡᠩᡤᡝ ᠠᡴᡡ᠉ ᡩᠠᠮᡠ ᠪᠣᡳᡥᠣᠨ ᠪᡝ ᡩᠠᡥᠠᡥᠠᠩᡤᡝ ᡠᠮᡝᠰᡳ ᠠᠴᠠᠨᠠᡵᠠ ᠵᠠᡴᠠᡩᡝ᠈ ᡨᡠᡨᡨᡠ ᡠᠰᡳᠨ ᡳ ᠪᠠᡳᡨᠠ ᠠᠮᠪᡠᠯᠠ ᠰᠠᡳᠨ ᠣᡥᠣᠪᡳ᠈ ᡠᠰᡳᠨ ᡳ ᡧᠣᠯᠣ ᡩᡝ ᠠᡶᠠᡵᠠ ᠪᡝ ᡨᠠᠴᡳᠪᡠᠮᡝ᠈ ᡨᡠᠸᠠᡴᡳᠶᠠᠮᡝ ᠰᡝᡵᡝᠮᡧᡝᠮᡝ ᡳᠰᡥᡠᠨᡩᡝ ᡨᡠᠸᠠᡧᠠᡨᠠᠪᡠᠮᡝ᠈ ᡤᡠᡵᡠᠨ ᠪᠠᠶᠠᠨ ᡝᠯᡤᡳᠶᡝᠨ᠈ ᠴᠣᠣᡥᠠ ᠮᠠᠩᡤᠠ ᡝᡨᡠᡥᡠᠨ ᠣᡶᡳ᠈ ᡶᡝᡵᡤᡠᠸᡝᠴᡠᡴᡝ ᠰᡠᡴᡩᡠᠨ ᠪᡠᡵᡤᠠᡧᠠᠮᡝ ᠴᠣᠯᡤᠣᡵᠣᡦᡳ᠈ ᠰᡳᡵᡝᠨᡝᠮᡝ ᠶᠠᡵᡠᠮᡝ ᠵᡝᠴᡝᠨ ᠠᡴᡡ᠈ ᡳᡵᡤᡝᠨ ᡳ ᡨᠠᠴᡳᠨ ᡤᡠᠯᡠ ᠠᡴᡩᡠᠨ᠈ ᡥᠣᠣ ᠰᡝᠮᡝ ᡨᡝᡵ ᠰᡝᠮᡝ ᡝᠯᡝᡥᡠᠨ ᡳ ᠪᠠᠨᠵᡳᠮᠪᡳ᠉
ᠯᡳᠩᡤᡝ ᡝᠯᡩᡝᠨ ᡶᡝᡵᡤᡠᠸᡝᠴᡠᡴᡝ ᠣᡶᡳ᠈
ᡩᡝᡵᡤᡳ ᠠᠪᡴᠠ ᡩᡝ ᡥᠠᡶᡠᠨᠠᡶᡳ᠈
ᡩᡝᡵᡤᡳ ᠠᠪᡴᠠᡳ ᡥᠠᠨ ᡤᠣᠰᡳᠮᡝ ᠵᡠᡳ ᠰᡝᠮᡝ ᡨᡠᠸᠠᠮᡝ ᠠᠨᡳᠶᠠ ᡤᠣᡳᡩᠠᡵᠠ ᠵᠠᡴᠠᡩᡝ᠈ ᡨᡠᡨᡨᡠ ᠮᡳᠨᡳ
ᡧᡳᡯᡠ ᡥᠠᠨ ᠮᠠᡶᠠ᠈ ᠨᡳᠶᠠᠯᠮᠠᡳ ᠮᡠᠰᡝᡳ ᡩᠠᡳᠴᡳᠩ ᡤᡠᡵᡠᠨ ᡩᡝ ᡶᠣᡵᠣᡥᠣ ᡤᡡᠨᡳᠨ ᠪᡝ ᡩᠠᡥᠠᠮᡝ᠈
ᠠᠪᡴᠠᡳ ᠮᡳᠩ ᡤᡠᡵᡠᠨ ᠪᡝ ᡝᡳᠮᡝᡥᡝ ᠮᡠᠵᡳᠯᡝᠨ ᡩᡝ ᠠᠴᠠᠪᡠᠮᡝ ᠮᡠᠰᡝᡳ ᡶᡠᠨᡩᡝ ᡤᡝᡨᡝᡵᡝᠮᠪᡠᠮᡝ ᠶᠠᠪᡠᡵᡝ ᠠᠨᠠᡤᠠᠨ ᡳ ᠰᠣᠣᡵᡳᠨ ᡳ ᠯᡳᠣᡯᡝᡳ ᠪᡝ ᠪᠠᡧᠠᡵᠠ ᡩᡝ᠈ ᠵᡠᠰᡝ ᡩᡝᠣᡨᡝ ᡳ ᡤᡝᠰᡝ ᠰᡳᠯᡳᡥᠠ ᠴᠣᠣᡥᠠ ᠪᡝ ᡤᠠᡳᡶᡳ᠈ ᡝᠮᡠ ᡩᠠ ᠰᡳᡵᡩᠠᠨ ᡥᠣᠨᠣ ᡤᠠᠪᡨᠠᠮᡝ ᠰᡠᡳᠯᠠᡥᠠᡴᡡ ᠪᡳᠮᡝ᠈ ᡩᠣᡵᠣ ᠪᡝ ᠠᠯᡳᡶᡳ ᠰᠣᠣᡵᡳᠨ ᡩᡝ ᡨᡝᡶᡳ ᠪᡝᡤᡳᠩ ᡩᡝ ᡤᡝᠮᡠᡥᡝᠯᡝ᠈ ᡴᡝᠮᡠᠨᡳ ᠮᡳᠩᡤᠠᠨ ᠵᡠᠯᡤᡝᡳ ᠶᡝᠨᡩᡝᡥᡝ ᠸᠠᠰᡳᡴᠠ ᠪᡝ ᠪᠠᡳᠴᠠᡶᡳ᠈ ᡨᠠᠩᡤᡡ ᠵᠠᠯᠠᠨ ᡳ ᡶᠣᡵᠣᡤᠣᠨ ᡨᠣᠨ ᠪᡝ ᠪᠠᡳᠴᠠᡶᡳ᠈ ᡨᠠᠩᡤᡡ ᠵᠠᠯᠠᠨ ᡳ ᡶᠣᡵᡤᠣᠨ ᡨᠣᠨ ᠪᡝ ᡴᡳᠮᠴᡳᠴᡳ᠈ ᡨᡝᠮᡤᡝᡨᡠ ᠰᠠᠪᡳ ᡩᡝ ᠠᡴᡩᠠᠴᡳ ᠮᠠᠩᡤᠠ ᠰᡝᡥᡝ ᠪᡝ ᠠᠰᡥᡡᡶᡳ᠈ ᡤᠣᠰᡳᠨ ᠵᡠᡵᡤᠠᠨ ᡳ ᡨᡠᠸᠠᡴᡳᠶᠠᠴᡳ ᠣᠵᠣᡵᠣ ᠪᡝ ᠠᡴᡩᠠᡥᠠ᠈ ᠪᡠᡥᡡ ᠪᡝ ᠠᠮᠴᠠᠮᠪᡳ ᠰᡝᡵᡝ ᡤᡝᡥᡝ ᡤᡳᠰᡠᠨ ᠪᡝ ᠮᡳᠯᠠᡵᠠᠪᡠᡶᡳ᠈ ᡝᠨᡩᡠᡵᡳ ᡨᡝᡨᡠᠨ ᡩᡝ ᠠᡶᠠᠪᡠᡥᠠ ᠪᠠ ᠪᡳᠰᡳᡵᡝ ᠪᡝ ᠶᠠᡵᡤᡳᠶᠠᠯᠠᡥᠠ ᡩᡝ᠈ ᡨᡝᠨᡳ
ᠠᠪᡴᠠᡳ ᡥᠠᠨ ᡳ ᡥᡝᠰᡝ ᡝᠨᡨᡝᡥᡝᠮᡝ ᠠᠴᠠᠪᡠᠮᡝ᠈ ᠮᡠᠰᡝᡳ ᡩᠠᡳᠴᡳᠩ ᡤᡠᡵᡠᠨ ᠪᡝ ᡤᠣᠰᡳᡥᠠᠩᡤᡝ ᡠᠮᡝᠰᡳ ᠵᡳᡵᠠᠮᡳᠨ ᠪᡝ ᠰᠠᡥᠠ᠉ ᠶᠠᠯᠠ ᠨᡝᡳᡥᡝᠩᡤᡝ ᠠᡴᡡ ᠪᡳᠴᡳ᠈ ᠠᡳᠨᡳ ᠪᠠᡩᠠᡵᠠᠮᠪᡠᠮᠪᡳᡥᡝ᠈ ᡩᡝᡵᡳᠪᡠᡥᡝᠩᡤᡝ ᠠᡴᡡ ᠪᡳᠴᡳ᠈ ᠠᡳᡩᡝ ᠪᠠᡥᠠᠮᠪᡳᡥᡝ᠈ ᡩᠠᡩᡝ ᠪᡠᠯᠠ ᡧᡠᠸᠠ ᠪᡝ ᡤᡝᡨᡝᡵᡝᠮᠪᡠᠮᡝ᠈ ᡝᡩᡠᠨ ᠪᡠᡵᠠᡴᡳ ᠪᡝ ᡶᡠᠨᡨᡠᠮᡝ᠈ ᠵᠣᠪᠣᠴᡠᠨ ᠰᡠᡳᠯᠠᠴᡠᠨ ᠪᡝ ᡩᠣᠰᠣᠪᡠᠮᡝ᠈ ᠠᡳᠰᡳ ᠵᠣᠪᠣᠯᠣᠨ ᠪᡝ ᡩᡠᠯᡝᠮᠪᡠᠮᡝ᠈ ᡠᠮᠠᡳ ᠠᠨᠠᠪᡠᡥᠠ ᡥᠠᠯᠠᡥᠠ ᠰᠣᠩᡴᠣ ᠠᡴᡡ ᠪᡳᠮᡝ᠈ ᠰᡝᠵᡝᠨ ᠪᡳᡨᡥᡝ ᡳ ᡝᠮᡠ ᠣᡶᡳ ᠶᠠᠮᡠᠯᠠᠨᠵᡳᡥᠠ ᠪᡝ ᠠᠯᡳᠮᡝ ᡤᠠᡳᡥᠠᠩᡤᡝ᠈ ᡠᡨᡥᠠᡳ ᡩᠠᠰᠠᠨ ᡳ ᠨᠣᠮᡠᠨ ᡩᡝ ᡥᡝᠨᡩᡠᡥᡝ ᡨᠠᠩ ᡥᠠᠨ ᡩᡝ ᠰᡝᠮᡝ ᡝᠯᡩᡝᠩᡤᡝ ᠣᡥᠣ᠈ ᡳᡵᡤᡝᠪᡠᠨ ᡳ ᠨᠣᠮᡠᠨ ᡩᡝ ᡥᡝᠨᡩᡠᡥᡝ᠈ ᡳᡵᡤᡝᠨ ᡩᠠᡥᠠᡥᠠ ᠰᡝᡥᡝᠩᡤᡝ ᡴᠠᡳ᠉ ᡝᡵᡝ ᡶᡝᡵᡤᡠᠸᡝᠴᡠᡴᡝ ᠮᡠᡴᡩᡝᠨ ᡳ ᠪᠠ᠈ ᠶᠠᠯᠠ ᡥᠠᠨ ᡳ ᡶᠠᠯᡤᠠ᠈ ᡨᡠᡨᡨᡠ
ᡥᡝᠰᡝᡳ ᠴᠣᠣᡥᠠ ᡴᠠᡩᠠᠯᠠᡵᠠ ᠵᡳᠶᠠᠩᡤᡳᠶᡡᠨ ᡨᡝᠪᡠᡶᡳ᠈ ᠰᡠᠨᠵᠠ ᠵᡠᡵᡤᠠᠨ ᡳ ᠠᠰᡥᠠᠨ ᡳ ᠠᠮᠪᠠᠨ ᠰᡳᠨᡩᠠᡥᠠ᠈ ᡳᡵᡤᡝᠨ ᠪᡝ ᡶᡠ ᡥᡳᠶᠠᠨ ᡩᡝ ᠵᡳᡵᡤᠠᠪᡠᠮᡝ᠈ ᡤᡡᠰᠠᡳᠩᡤᡝ ᠪᡝ ᡤᠠᡧᠠᠨ ᡨᠣᡴᠰᠣ ᡩᡝ ᠰᡝᠪᠵᡝᠯᡝᠪᡠᠮᡝ᠈ ᠨᡳᠶᡝᠩᠨᡳᠶᡝᡵᡳ ᡨᠠᡵᡳᠪᡠᠮᡝ ᠪᠣᠯᠣᡵᡳ ᠪᠠᡵᡤᡳᠶᠠᠪᡠᠮᡝ᠈ ᠴᠠᠯᡠ ᡩᡝ ᠠᠰᠠᡵᠠᠮᡝ ᠰᡝᠵᡝᠨ ᡩᡝ ᡨᡝᠪᡠᠮᡝ᠈ ᡳᠴᡝ ᡨᠣᡶᠣᡥᠣᠨ ᡩᡝ ᡥᠠᡵᡤᠠᡧᠠᠮᡝ ᡳᠰᠠᠪᡠᠮᡝ᠈ ᠰᡳᠮᡝᠩᡤᡝ ᡴᡠᠮᡠᠩᡤᡝ ᡳ ᠶᠠᠪᡠᠪᡠᠮᡝ᠈ ᡨᡠᠮᡝᠨ ᠠᠨᡳᠶᠠ ᠣᡨᠣᠯᠣ ᡩᠣᡵᠣ ᠪᡳᠰᡳᡵᡝ ᠪᡝ ᡳᠯᡝᡨᡠᠯᡝᡥᡝ᠈ ᡨᠠᠩᡤᡡ ᠵᠠᠯᠠᠨ ᡩᡝ ᡳᠰᡳᡨᠠᠯᠠ᠈ ᡶᡝᡵᡤᡠᠸᡝᠴᡠᠨ ᡝᠨᡨᡝᡥᡝᠮᡝ ᠣᠵᠣᡵᠣ ᠪᡝ ᠪᠠᡥᠠᠪᡠᡥᠠ ᠪᡝ ᡩᠠᡥᠠᠮᡝ᠈ ᡨᡠᡨᡨᡠ ᡨᡠᡴᡳᠶᡝᠴᡠᠨ ᠠᡵᠠᡥᠠ᠈ ᡨᡠᡴᡳᠶᡝᠴᡠᠨ ᡳ ᡤᡳᠰᡠᠨ᠈
ᠠᠮᠪᠠᠯᡳᠩᡤᡡ ᠮᡠᡴᡩᡝᠨ ᡶᡠᡴᠵᡳᠨ ᡳᠯᡳᠪᡠᡥᠠ᠈ ᠠᠮᠠᡵᡤᡳ ᠰᡳᠮᡳᠶᠠ ᠪᡝ ᡩᠠᠯᡳᡵᠠᠪᡠᡥᠠ᠈ ᠠᠯᡳᠨ ᡩᡝᠨ ᠪᡳᡵᠠ ᠣᠨᠴᠣ᠈ ᠠᠪᡴᠠᡳ ᡶᡝᠵᡝᡵᡤᡳ ᡩᡝ ᡨᡠᠸᠠᡴᡡ ᡨᠣᡴᡨᠣᠪᡠᡥᠠ᠈ ᠠᠶᠠᠨ ᡨᠠᠰᡥᠠ ᠮᡠᡩᡠᡵᡳ ᡳ ᡤᡝᠰᡝ᠈ ᠠᠮᠪᡠᠯᠠ ᡶᡝᡵᡤᡠᠸᡝᠴᡠᡴᡝ ᠪᠠ ᠪᠠᠨᠵᡳᠨᠠᡥᠠ᠈ ᠠᠴᠠᠪᡠᠮᡝ ᡠᠯᠠᠨ ᡶᡝᡨᡝᠪᡠᡶᡳ᠈ ᠠᡴᡩᡠᠯᠠᠮᡝ ᡥᠣᡨᠣᠨ ᠰᠠᡥᠠᠪᡠᡥᠠ ᠠᠪᡴᠠ ᠨᠠ ᡩᡝ ᡩᡠᡵᠰᡠᠯᡝᠮᡝ᠈ ᠠ ᡝ ᠪᡝ ᠠᠯᡥᡡᡩᠠᡥᠠ᠈ ᠠᡳ᠈ ᠠᡳ ᡥᡡᡩᠠ ᠪᡝ ᡶᠠᡴᠰᠠᠯᠠᠮᡝ᠈ ᠠᠰᡥᠠᠨ ᡩᡝ ᡨᠠᡴᡨᡠ ᠪᡝ ᡩᠠᠪᡴᡡᡵᡳᠯᠠᡥᠠ᠈ ᠠᠮᠠᠪᡵᠠᠮᡝ ᡨᡝᠨ ᠪᡝ ᡳᠯᡳᠪᡠᡶᡳ᠈ ᠠᠮᠪᠠ ᡥᠠᠨ ᡳ ᡩᠣᡩᡵᠣ ᠪᡝ ᠪᠠᡩᠠᡵᠠᠮᠪᡠᡥᠠ᠈ ᡝᠮᠪᡳᠴᡳ ᠵᡝᠣ ᡤᡠᡵᡠᠨ ᡩᡝ ᠪᡳᠨ ᡴᡳ ᠰᡝᡥᡝ᠈ ᡝᠮᠪᡳᠴᡳ ᡥᠠᠨ᠋ ᡤᡠᡵᡠᠨ ᡩᡝ ᡶᡠᠩ ᡦᡝᡳ ᠰᡝᡥᡝ᠈ ᡝᡵᡝᠴᡳ ᠪᡝ ᡧᡠᡳ᠈ ᡴᡳᠩ ᡧᠠᠨ ᠰᡝᠮᡝ᠈ ᡝᠴᡳ ᡤᡝᠮᡠ ᡥᠠᠨ ᠰᡝ ᠶᡝᠨᡩᡝᠨᡠᡥᡝ᠈ ᡝᠯᡩᡝᡦᡳ ᡧᠠᠨᠶᠠᠨ ᠠᠯᡳᠨ ᡨᡝᠮᡤᡝᡨᡠᠯᡝᡶᡳ᠈ ᡝᠮᡠ ᡤᡳᡵᡳᠨ ᡳ ᠮᡝᡩᡝᡵᡳ ᡧᡠᡵᡩᡝᠨᡠᡥᡝ᠈ ᡝᠨᡨᡝᡴᡝ ᠣᠶᠣᠩᡤᠣ ᠠᡵᠪᡠᠩᡤᠠ ᠪᠠᠪᡝ᠈ ᡝᠨᡨᡝᡥᡝᠮᡝ ᠵᠠᠯᠠᠨ ᠵᠠᠯᠠᠨ ᠠᡴᡩᠠᠮᠪᡳᡥᡝ᠈ ᡝᡳᡨᡝᠨ ᠪᠠᠪᡝ ᡶᡠᠰᡳᡥᡡᠨ ᡝᠩᡤᡝᠯᡝᠮᡝ᠈ ᡝᡵᡨᡝᠯᡝ ᡩᠣᡵᡤᡳ ᡨᡠᠯᡝᡵᡤᡳ ᠪᡝ ᡠᡥᡝᡵᡳᠯᡝᡥᡝ᠈ ᡝᡵᡤᡝᠮᠪᡠᠮᡝ ᡠᠵᡳᠮᡝ ᡨᠠᠩᡤᡡ ᠠᠨᡳᠶᠠ ᠣᡶᡳ᠈ ᡝᠯᡤᡳᠶᡝᠨ ᡨᠠᡳᡶᡳᠨ ᡩᡝ ᠰᡝᠪᠵᡝᠯᡝᡥᡝ᠈ ᡝᡵᡝ ᡩᠠ ᠪᠣᡩᠣᡤᠣᠨ ᠪᡝ ᡤᡡᠨᡳᠨᠠᡶᡳ᠈ ᡝᠯᡝ ᠰᠣᠣᡵᡳᠨ ᡩᡝ ᡤᡳᠩᡤᡠᠯᡝᡥᡝ᠈
ᡠᠮᡝᠰᡳ
ᡝᠨᡩᡠᡵᡳᠩᡤᡝ ᡧᡝᠩᡯᡠ ᠮᠠᡶᠠ ᠰᡳᡵᠠᠨᡩᡠᡥᠠ᠈ ᡠᠪᠠᡩᡝ ᡳᠯᠠᠨ ᠮᡠᡩᠠᠨ ᡳᠰᡳᠨᠵᡳᡥᠠ᠈ ᡠᡵᡠᠯᡩᡝᡥᡝ ᠮᠣᡵᡳᠨ ᡨᡝᡵ ᠰᡝᠮᡝ ᡨᠣᡥᠣᠪᡠᡶᡳ᠈ ᡠᡴᠰᡳᠨ ᠴᠣᠣᡥᠠ ᠶᠠᡵ ᠰᡝᠮᡝ ᠶᠠᠪᡠᠪᡠᡥᠠ᠈ ᡠᠶᡠᠨᠵᡠ ᡩᠠᠪᡴᡡᡵᡳ ᡩᡝ ᠪᡳᡶᡳ᠈ ᡠᡵᡥᡠᡶᡳ ᠵᡳᡵᡤᠠᡵᠠ ᠪᡝ ᠠᡨᠠᠩᡤᡳ ᠪᠠᡳᡥᠠ᠈ ᡠᠨᡝᠩᡤᡳ ᡤᡡᠨᡳᠨ ᡳ
ᠮᡠᠩᡤᠠᠨ ᡩᡝ ᡩᠣᡵᠣᠯᠣᠨᠵᡳᡶᡳ᠈ ᡠᠴᡝ ᠨᡝᡳᡶᡳ ᡩᡝᠶᡝᠨ ᡩᡝ ᡥᠠᡵᡤᠠᡧᠠᠪᡠᡥᠠ᠈ ᡠᡵᡤᡠᠨ ᠰᠠᡵᡳᠨ ᡶᡝ ᡤᡠᡵᡠᠩ ᡩᡝ ᡩᠠᡤᡳᠯᠠᡶᡳ᠈ ᡠᠩᡤᠠ ᠰᠠᡴᡩᠠ ᡩᡝ ᡥᡡᠨᡨᠠᡥᠠᠨ ᡩᠠᡵᠠᠪᡠᡥᠠ᠈ ᡠᠵᡝᠨ ᡴᡝᠰᡳ ᠪᡝ ᠪᠠᡩᠠᡵᠠᠮᠪᡠᠮᡝ᠈ ᡠᠯᡠᠰᡠ ᡳᡵᡤᡝᠨ ᡩᡝ ᡳᠰᡳᠪᡠᡥᠠ᠈ ᡠᠮᠠᡳ ᠨᡠᡵᡥᡡᠮᡝ ᡴᡝᡩᡝᡵᡝᡵᡝᠩᡤᡝ ᠸᠠᡴᠠ᠉ ᡠᡵᡠᡳ ᠵᡠᠯᡤᡝ ᠪᡝ ᠠᠯᡥᡡᡩᠠᡥᠠ᠈ ᠠᠮᠪᡠᠯᠠ ᡝᡵᡩᡝᠮᡠ ᠠᡴᡡ ᡩᡝ ᠶᡝᡵᡨᡝᡧᡝᡥᡝ᠈ ᠠᠮᠪᠠ ᠰᠣᠣᡵᡳᠨ ᡩᡝ ᠰᡳᡵᠠᠮᡝ ᡨᡝᡥᡝ᠈ ᠠᠨᡳᠶᠠᡩᠠᡵᡳ
ᡨᠠᡳᠮᡳᠶᠣᠣ ᠸᡝᠴᡝᡵᡝᡩᡝ᠈ ᠠᠴᡳᠩᡤᡳᠶᠠᠪᡠᡶᡳ ᠸᡝᠰᡳᡵᡝ ᠸᠠᠰᡳᡵᡝ ᠪᡝ ᡝᡵᡥᡠᠨᠵᡝᡥᡝ᠈
ᡳᠯᠠᠨ ᠮᡠᠩᡤᠠᠨ ᠪᡝ ᠵᠣᠩᡴᠣ ᡩᠠᡵᡳ ᠠᠮᠴᠠᠮᡝ ᡴᡳᡩᡠᡵᡝᠩᡤᡝ ᡥᡳᠩ ᠰᡝᡥᡝ᠈
ᠠᠪᡴᠠᡳ ᡤᠣᠰᡳᡵᡝ ᡩᡝ ᠨᠠᠰᡥᡡᠯᠠᡶᡳ᠈ ᠠᠨᡳᠶᠠ ᡝᠯᡤᡳᠶᡝᠨ ᡩᡝ ᡨᡝᡳᠰᡠᠯᡝᡥᡝ ᠠᠮᠪᠠᡵᠮᡝ ᡩᠠᠰᠠᡨᠠᡶᡳ ᡝᠪᠰᡳ ᠵᡳᡩᡝᡵᡝᡩᡝ ᠠᡩᠠᠮᡝ ᠶᠠᡵᡠᡥᠠ ᡶᠠᡳᡩᠠᠨ ᠵᡠᡵᡠᠯᡝᡥᡝ᠈ ᠠᡧᡧᠠᡵᠠᠩᡤᡝ ᡝᡩᡠᠨ ᡨᡠᡤᡳ ᡳ ᡤᡝᠰᡝ᠈ ᠠᠴᠠᠪᡠᡵᡝᠩᡤᡝ ᡝᠰᡳᡥᡝ ᠨᡳᠮᠠᡥᠠ ᠠᡩᠠᠯᡳ ᠰᡳᡵᡝᠨᡝᡥᡝ᠈ ᠠᠨᡨᠠᡥᠠᠰᠠ ᡥᠠᡶᠠᠰᠠ ᡶᡝᠨᡳᠶᡝᠯᡝᡶᡳ᠈ ᠠᠮᠠᡵᡤᡳ ᠮᡳᠮᠪᡝ ᡩᠠᡥᠠᠯᠠᠮᡝ ᡧᡠᡵᡩᡝᠨᡠᡥᡝ᠈ ᡝᠨᡩᡠᡵᡳ ᡶᠠᠯᡤᠠ ᡩᡝ ᡳᠰᡳᠨᠵᡳᡥᠠ᠈ ᡝᡵᡝᠨᡳ ᠮᡠᠩᡤᠠᠨ ᠶᠠᠮᡠᠨ ᠪᡝ ᡥᠠᡵᡤᠠᡧᠠᡥᠠ᠈ ᡝᠯᡩᡝᠩᡤᡝ ᡶᡝᡵᡤᡠᠸᡝᠴᡠᠨ ᡤᡝᡥᡠᠩᡤᡝ ᠠᠯᡳᠨ ᠴᡳ ᡨᡠᠴᡳᠨᠵᡳᡶᡳ᠈ ᡝᡳᡨᡝᠨ ᠰᠠᠪᡳ ᠰᡳᠮᡳᠶᠠ ᠪᡳᡵᠠ ᡩᡝ ᡳᠰᠠᡵᠯᠠᡥᠠ᠈ ᡝᠮᠪᡳᠴᡳ ᡩᠠ ᠵᡠᡴᡨᡝᡥᡝᠨ ᡳ ᡤᡝᠰᡝ ᡝᡨᡠᡴᡠ ᡩᠣᠪᠣᠪᡠᡶᡳ᠈ ᡝᠮᠪᡳᠴᡳ ᠪᠠ ᠯᡳᠩ ᠨᡳ ᡤᡝᠰᡝ ᠵᡳᠪᡝᡥᡠᠨ ᡶᠠᡳᡨᠠᠪᡠᡥᠠ᠈ ᡝᠯᡩᡝᡴᡝ ᡨᡠᡤᡳ ᠵᠠᡴᡩᠠᠨ ᡩᡝ ᠪᡠᡵᡤᠠᡧᠠᠮᡝ᠈ ᡝᠶᡝᡵᡝ ᠮᡠᡴᡝ ᠪᡳᡵᡤᠠᠨ ᡩᡝ ᠴᠠᠯᡤᡳᡧᠠᡥᠠ᠈ ᡝᠨᡨᡝᡥᡝᠮᡝ ᡶᡝᡵᡤᡠᠸᡝᠴᡠᡴᡝ ᠸᡝᠨ ᠪᡝ ᡩᡝᡵᡳᠪᡠᡶᡳ ᡝᡵᡤᡝᠩᡤᡝ ᠵᠠᡴᠠ ᡧᠠᠩᡤᠠᠪᡠᡥᠠ ᠪᡝ ᡤᡡᠨᡳᠨᠠᡥᠠ᠈ ᡝᡵᡨᡝᠯᡝ ᠸᡝᡥᡝᡳ ᠮᠣᡵᡳᠨ ᠰᡳᠮᠠᠴᡠᡴᠠ ᠣᡶᡳ᠈ ᡝᠰᡳ ᠶᠠᠰᠠᡳ ᠮᡠᡴᡝ ᠰᠠᠪᡩᠠᡵᠠᠯᠠᡥᠠ᠈ ᡝᠨᡝᠩᡤᡳ ᡧᠠᠰᡳᡥᠠᠨ ᡶᠠᠵᡳᡵᠠᠨ ᡩᡝ ᡴᡳᡩᡠᡵᡝᠩᡤᡝ᠈ ᡝᠮᡠ ᠰᡠᡴᡩᡠᠨ ᡳ ᠰᠠᠯᡤᠠᠪᡠᡥᠠ ᠴᡳ ᠪᠠᠨᠵᡳᠨᠠᡥᠠ᠈ ᡳᠯᡳᠪᡠᡥᠠ ᡶᡝ ᡤᡠᠩ ᡩᡝ ᠵᡳᡥᡝ ᡳᠯᡳᠪᡠᡥᠠ ᡨᡝᡵ ᠰᡝᡥᡝ᠈ ᡳᡴᡳᡵᡳ ᡨᡝᡵᡴᡳᠨ ᡩᡝ ᠸᡝᠰᡳᠨᠵᡳᡥᡝ᠈ ᡳᡴᡳᡵᡳ ᡨᡝᡵᡴᡳᠨ ᠵᡝᡵᡤᡳᠯᡝᡥᡝ᠈ ᡳᠴᡝᠮᠯᡝᠮᡝ ᠶᠠᠩᠰᡝᠯᠠᡥᠠᠩᡤᡝ ᠸᠠᡴᠠ᠈ ᡳᡴᡨᠠᠮᠪᡠᡥᠠ ᠵᡳᡵᠠᠮᡳᠨ ᠴᡳ ᡩᡝᡵᡳᠪᡠᡥᡝ᠈ ᡳᠴᡝ ᠪᡳᠶᠠ ᡳ ᡤᡝᠰᡝ ᡤᡳᠯᠮᠠᡵᠵᠠᠮᡝ᠈ ᡳᠨᡝᠩᡤᡳᠰᡥᡡᠨ ᡧᡠᠨ ᡳ ᡤᡝᠰᡝ ᠵᡝᡵᡴᡳᡧᡝᡥᡝ᠈ ᡳᠴᡳᡧᠠᠮᡝ ᡨᠠᡶᡠᡴᡡ ᠴᡝᠯᡝᡥᡝᠨ ᠸᡝᡳᠯᡝᠪᡠᡶᡳ᠈ ᡳᠨᡝᡴᡠ ᡴᡠᠯᡠᠨ ᡩᠠᡥᠠᠰᡠᠨ ᠪᡝ ᡩᡠᡵᠰᡠᠯᡝᡥᡝ ᡳᠯᠪᠠᡥᠠ ᠪᠣᡳᡥᠣᠨ ᡳ ᡶᠠᠵᡳᡵᠠᠨ ᡥᡳᠶᠠᠪᡠᠨ ᠰᡝᠴᡳ᠈ ᡳᠨᡠ ᠮᠠᠯᡥᡡᠨ ᡝᡵᡩᡝᠮᡠ ᠪᡝ ᡨᡝᠮᡤᡝᡨᡠᠯᡝᡥᡝ᠈ ᡳᠯᡝᡨᡠ ᠪᠣᡩᠣᡤᠣᠨ ᠣᠮᠣᠰᡳ ᡩᡝ ᡨᡠᡨᠠᠪᡠᡥᠠᠩᡤᡝ᠉ ᡳᠴᠠᠩᡤᠠᠰᠠᡴᠠ ᡨᡠᠮᡝᠨ ᡨᡠᠮᡝᠨ ᠠᠨᡳᠶᠠ ᡝᠯᡥᡝ᠈ ᡝᡵᡝᠴᡳ ᠵᡠᠯᡝᡵᡤᡳ ᡩᡠᡴᠠ ᠪᡝ ᠮᡳᠯᠠᡵᠠᠪᡠᡥᠠ᠈ ᡝᠨᠴᡝᡥᡝ ᠰᠠᡵᡳᠨ ᠪᡝ ᡶᠠᡳᡨᠠᠪᡠᡥᠠ᠈ ᡝᠮᡩᡝ ᡥᠠᠨᠴᡳ ᠨᡳᠶᠠᠯᠮᠠ ᡩᡝ ᡥᡡᠨᡨᠠᡥᠠᠨ ᡤᡠᡵᡳᠪᡠᠮᡝ᠈ ᡝᠮᡩᡝ ᠠᠮᠪᠠᠰᠠ ᡥᠠᡶᠠᠰᠠ ᡩᡝ ᡳᠰᡳᠪᡠᡥᠠ᠈ ᡝᡵᡝᠨᡳ ᡶᡝ ᠰᡠᠰᡠ ᡳ ᠰᡝᠩᡤᡝ ᠰᠠᡴᡩᠠ᠈ ᡝᠶᡝᡵᠵᡝᠮᡝ ᡶᡠᠯᠠᡵᠵᠠᠮᡝ ᠣᠮᡳᠵᠠᡥᠠ᠈ ᡝᡵᡝ ᡤᡝᡵᡝᠨ ᠰᠠᡳᠨ ᡠᡵᠰᡝ᠈ ᡝᠰᡳ ᡤᡝᠮᡠ ᠮᠠᡶᠠᡵᡳ ᡳ ᠸᡝᡵᡳᡥᡝ ᠠᡥᠠ᠈ ᡝᡵᡤᡝᠮᠪᡠᡥᡝ ᡤᠣᠰᡳᠮᡝ ᠵᡳᡥᡝᡳ᠈ ᡝᡵᡳᠨᡩᠠᡵᡳ ᠮᡳᠨᡩᡝ ᡳᠰᡳᠨᠵᡳᡥᠠ᠈ ᡝᡵᡳᠨᡩᠠᡵᡳ ᡤᡳᠩᡤᡠᠯᡝᡵᡝ ᡩᠠᡩᡝ ᡤᡳᠩᡤᡠᠯᡝᠮᡝ᠈ ᡝᠯᡝ ᡤᡝᠯᡝᡵᡝ ᠣᠯᡥᠣᡵᠣ ᡤᡡᠨᡳᠨ ᠨᠣᠩᡤᡳᠪᡠᡥᠠ᠈ ᡝᡩᡝ ᡨᡠᠮᡝᠨ ᡨᡠᠮᡝᠨ ᠠᠨᡳᠶᠠ ᡩᡝ ᡳᠰᡳᡨᠠᠯᠠ᠈ ᡝᠨᡨᡝᡥᡝᠮᡝ ᠠᠮᠪᠠ ᡩᠣᡵᠣ ᠪᡝ ᠪᠠᡩᠠᡵᠠᠮᠪᡠᡥᠠ᠉
kemuni donjihangge, ama eme -i mujilen be mujilen oburengge, abkai fejergi ahūn deo de senggime akūngge akū. mafari -i mujilen be mujilen oburengge, abkai fejergi mukūn -i niyalma de haji akūngge akū, abka na -i mujilen be mujilen oburengge, abkai fejergi irgen tumen jaka be hairarakūngge akū sehebi. ere gisun be niyalma tome kicefi acambime, ejen oho niyalma de holbobuhangge ele ujen. tuttu seme, ilan gisun -i dorgi, geli mafari -i mujilen be mujilen obure be oyonggo obuhabi. ainci mafari -i mujilen be mujilen obuci, urunakū fukjin neihengge mangga seme gūnime, šanggan be tuwakiyarangge ja akū be safi, geleme geleme olhome olhome, abka de gingguleme irgen be gosime, tereci ahūn deo de durun ofi, gurun boo be dasirengge, uthai ama eme -i mujilen be mujilen obuhangge. irgen de uhe, jaka de acan ojorongge, uthai abka na -i mujilen be mujilen obuhangge, kungdzi -i henduhengge, ten -i wecen, boihoju wecen -i dorolon, juwari wecen, bolori -i jurgan be getukelehe de, gurun be dasirengge falanggū be tuwara adali kai sehebi. mafari juktehene, juwari wecen, bolori wecen -i kooli serengge, yargiyan -i nenehe han sai mujin be siraha baita be wasimbure amba enteheme, tuttu seme, enduringge niyalma amba daban -i jijuhan be dursuleme,eifu arara moo tebure be deribuhe ci ebsi, munggan de acanara kooli, han' gurun -i fon ci aifini uttu bihebi. musei gurun booi fukjin deribuhe mukden -i ba, uthai jeo gurun -i bin, ki -i ba, hūwang di forgon -i kiyoo šan alin -i adali. seibeni han mafa, ninju emu aniyai sidende, ilan mudan munggan de dorolome genefi, hiyoošun ginggun be akūmbuha. han ama soorin de tefi, eiten baita be icemleme, inenggidari šolo bahakū bime, jing wargi jecen de baita bifi, fidre ganara de joboho sere dade, wang oho fonde, han mafa -i hesei mafari munggan de dorolome genehe ba bisire jakade, tuttu juwan ilan aniyai dolo, ere dorolon be deribuhekū. mini ajige beye, amba doro be sirame alifi, erdemu acabume muterakū ojorahū seme, mafari -i jobofi deribuhe ilibuhangge be šumilame gūnime, inenggidari sithūme kiceme, enduri tetun be gingguleme tuwakiyambi. gūnici, mukden serengge, abkai banjibuha ten -i ba. enteheme munggan, hūturingga munggan, eldengge munggan colgoropi hargašaci acambime, aika beye wecere baita de nikenerakū oci, aini ginggun unenggi be tucibufi amagangga urse de tuwabumbini, uttu ofi, abkai wehiyehe sahahūn ulgiyan aniya bolori, hūwang taiheo be gingguleme eršeme, gemun hecen ci jurafi, musei fe gemulehe bade isinjifi, hiyoošungga gūnin be akūmbume, mafari -i songko be hargašaha. ere ildun de ilan birai akdun beki, irgen tumen jaka -i gulu nomhon, jeku usin -i huweki sain, eiten hacin -i bayan elgiyen be aname tuwafi, yargiyan -i abkai iktambuha gurun, han -i yendehe šošohon -i babe saha. seibeni kimcifi bodofi bin -i bade tehe seme, šoo k'ang gung, gung lio be maktaha, isifi waliyafi ki -i bade tebuhe seme jeo gurun -i tukiyecun de tai wang be uculehengge, gemu dergi abkai han -i enggeleme bulekušere, fejergi irgen de ejen da oho be cibtui gūnin isibuhakūngge akū bihebi, tuttu ofi jaka, fujurun irgebuhe de iletulebumbi. baita, tukiyecun araha de algimbumbi, ubade saci tetendere, ekisaka gisurerakū oci ombio. tuttu fujurun irgebuhe, fujurun -i gisun, ulgiyangga aniyai oron de teisulehe aniya, lirga usiha erde dulimbade oho erin, lakcan -i sirabun -i alioi de acanaha, šanyan šahūn -i ergi be aliha ucuri, sain inenggi sonjofi, girdan tukiyefi, deyere muduri gese morin tohofi, cinggilakū honggon tuhebufi, miyamihangge ter seme, yangselahangge ler seme, boconggo nioron -i gese temgetun guwendere še -i gese kiltan tukiyefi, ferguwecuke jecen -i babe šurdeme, girha usiha weisha usiha -i teisu be yabume, musei da gemulehe bade isinijifi, mafari munggan de ulaha wame wecehe, ferguwecuke sukdun be gūnime, erdemui selgiyen be hargašame, dorolon be yongkiyabume gūnin be akūmbuha manggi, doronggo soorin de wesifi, ambasa hafasa be yamulabuha, fukjin ilibuhangge umesi joboho be gūnime deribume toktobuha amba doro be kimcifi, ai, absi wesihun, ere yargiyan -i bo -i ba ci deribuhe dzi halangga yen gurun ci colgoroko, hoo ging gemun de tehe gi halangga, jeo gurun ci duleke seme ferguwehe seibeni ping hioi dergi ergingge be yadalinggū seme dariha, an cu wargi ergingge be dababuha seme basuha bihe, ereci eberi ningge, gurun juwan juwe ome fakcafi, goloi beise ninggun nadan ome acafi, mucihiyan -i gese iliha, hengke -i dendecehe ba oci, ele buya subsi hūlhi lampa, dabufi gisureci ojorakū bime, meng giyan, ping dzi, tai cung ni jergi urse, elemangga yoo han, lung di -i kamni, dabsun omo behe -i hūcin -i bayan, i ni deyen, tiyan liyang gurung ni saikan, ilan jurgan sunja salja jugūn -i ilgabuha be kūwasadame tucibuhengge, cingkai fisembume badarambume faksidame leolecehebi, tese ai hacin -i tukiyeceme gisurecibe, adarame abkai banjibuha han -i gemun, umai cing hūng, wei šu be baibuhakūngge de duibuleci ombini, tereci bithei saisa de fujurulame, nirugan dangse de baicafi, šu akū de manggašarakū, murušeme fujurun irgebuki seme, mujilen girkūfi gūnime gūnime araha, emke be bahacibe tanggū be melebumbi dere, musei daicing gurun -i tuktan fonde, golmin šanyan alin ci fukjin deribuhe ferguwecuke sukdun isahangge, umesi eldengge umesi hūturingga, tamun gebungge omo šurdeme jakūnju ba bi, yalu, hūntung, aihu sere ilan ula tucikebi, enduri gege abkai non, fulgiyan tubihe ašufi nunggehe de, enduringge jui banjiha, abka gioro seme hala bufi, wesihuleme aisin sehe. asihiyame geterembume teyerakū jirgarakū ojoro jakade, teni yehe, hoifa, jaifiyan, fusi -i ba be baha, tereci liyoo yang ni bade hoton weilefi, dergi ergi gurun -i da ohobi, abkai hūturi be jiramilafi, geli gungge be badarambuki seme ofi, abkai fulinggai juwanci aniya, haksan be tuwame dulimba de tere be bodome, šen yang ni ba be, yendere sukdun -i borhoho ba seme, uthai mukden -i hoton weilefi, furdan -i wargi ba be hahūraha, tuttu ere ba na be gisureci, udu cin gurun, han’ gurun ci deribufi, siran siran -i sui gurun, tang gurun, jai dailiyoo gurun, aisin gurun de isitala bihengge secibe, arbun dursun be kimcifi, musei gurun jing icemlere wesihun forgon, enteke ferguwecuke hūturi be alihangge dembei šumin, wesihun weisha usiha -i juwanci dulefun de teisulehebi, yargiyan -i tasha -i oron -i dogon -i enggelehe ba, sunggari birai elbehe babe alihangge, hadaha usiha ci sandalabuhangge umesi hanci, ere inu šoo be -i tere babyoe tuwame, foyodoho dari lo -i ba be joriha, fung cūn giyūn -i arga alibufi,lio heo -i yarume šanggabuha ci ai encu, tereci hashū ergi coohiyan gurun be hafitame, ici ergi šanaha de nikenefi, amargi šanyan alin be dalikū obufi, julergi looha bira be kūwaraha, amba mederi ulan -i gese ofi, calgime debeme bilteme delišeme, hoo seme eyeme, hūwai seme wasime, hūwanggar hūwalar seme sucuneme yonggor honggor seme torgime, šun be oboro usiha be silgiyara gese deserepi, terei deribun be kimcire de mangga, dergi ergi indahūn takūrara golo de akūnafi, amargi ergi honin adulara jecen de niketele, musei omohoi bigan fesheleme, musei odoli susu be badarambume, deken olhon, nuhaliyan niyo -i ba, šari siri alai usin, lakcaha jecen de -isitala neifi, amba juktehen de fiyanji obuhangge, tumen ba funcembi, ubai alin oci, tiyeliyan, siliyan dabagan, pingpi, hiyanung alin, muca, simun dabagan, dungšun, jurutu alin, colgorokongge dukdureme cokcohon, dabkūrilahangge jurcenjeme sehehuri, haksan ningge hekdereme hailashūn, fiyentehejehengge fiyereneme gakarashūn, kes ningge cokcorome šokšohon, enggeleshun ningge gukdureme cokcohon, šun biya be huwejeme dalime, tenggin ula de sekiyen ofi ekiyehengge, ferguwecun be isafi sireneme colgoroko bime, geli saikan be yongkiyabume den wesihun ohobi, tuttu duin bethe juwe ashanggai duwali, amba weji luku orho de bisirengge, erei dolo der seme banjihakūngge akū, bethenggei duwali oci, tasha, yarha, lefu, nasin, tahi, cihetei, buhū, sirga, gio, miyahūtu, niohe, jarhū, temen, gurgu, dobi, malahi, manggisu, elbihe, dakda dakda sere alakdaha, jorho singgeri, akjambulu, kurene, seke icangga bime gincihiyan, ereci gūwa, ihan, morin, honin, ulgiyan -i jergi inenggidari baitalarangge oci, gašan falga de fihetele, deducere -ilicarangge der sembi, ashanggai duwali oci, ulhūma, nuturu, niongniyaha, niyehe, lamun gūwasihiya, weijun, bulehen, muke tashari, fakū de tomoro kūtan, wakan, dudu cibin, fiyorhon, saksaha, kūrcan, giyahūn, silmen, damin, itulhen, hoohan, gūlin, cecike, singgeri -i ubaliyaka suwayan mušu, geccen de deyere šanyan niongniyaha, geli šongkon serengge bi, sahaliyan ulai baci tucikebi, weji de dasihici, garu -i aksarangge putu pata, tala de forici, gūlmahūn -i burularangge bukta bakta, ereci gūwa, kuwecihe, jeleme, turi cecike, karka cecike, ijifun niyehe oci, bur bar sor sar seme, dekdeme deyeme debsitembi, orho oci, hamgiya, suiha, amtangga okjiha, ulhū, darhūwa, ficakū orho, darhūwa orho, elben, nono, ji -ilha, suihei gese bulha orho, erin be sara mailan, forgon be ejere mooyen ilha, damu orhoda serengge, ilan ilan -i garganafi, sunja sunja -i abdaha banjirengge, yala na -i ferguwecuke sukdun be bahafi, dorgideri tusa arara gungge de acanaha, geli fiyelesu, niyanciri hamgiya, banda hara, abuna, mailan -i use, sirenehe mailan, gemu nimeku be dasaci ombi, bujan oci, sunjata sata -i jakdan, tumen aniyai mailasun, dabkūri hada de abka be dalime, luk seme weji banjinafi, hali be elbeme, niowanggiyakan šunggayan singgeri šan moo ci colgoropi, niohokon ayan fodoho moo be emilembi, amba jalgasu moo, jakūn minggan aniya be niyengniyeri obumbi, aniya goidaha musiha moo baitakū turgun de jabšabuhabi, fularjara guilehe, fulahūri toro niowari niowari, šahūkan hangki moo, suwayakan gūrgin moo gilta gilta, alin -i enirhen uhuken bime sunggeljeme ofi, šusiha araci sain, amida nimalan mooi niyahara be gaifi, biyoo de ulebuci ombi, olhon ba -i sain jaka labdu seci, mederi dorgi hacingga jaka geli elgiyen, mujuhu, haihūwa, jelu, anwan, saragaji nimaha, onggošon, takū, dafaha, šanyan nisiha, ooca, hūwara, ajin, laha, uyašan, duwara, meihetu, fakcaralame kamcire kalfini, dekdereleme -irure tubehe, loho yangselaci ojoro fethe noho dulan nimaha, burgai sisifi fiyakūci acara niomošon, golmin emu juda isire ihan nimaha, uše -i gese usata bisire giyaltu, wehe de latuci ojoro salu bisire niomere, selei ninggiya -i gese angga banjiha hadahan nisiha, jai sangguji, malta, mederi eihen, geošen, namu ulgiyan, lekerhi, huthuhi, mederi dorgon -i jergingge, colkon boljon de tucime dosime, mukei weren de dekdeme irume bi, niowanggiyan muduri kukulu sehehuri ilici tugi dekdembi, fulgiyan muhūlu uncehen midaljaci boljon milarambi, aniya goidaha tahūra de nicuhe banjifi, uyun hacin -i elden abka de jerkišembi, ferguwecuke saika borhofi, gu fiyahan banjimbi, udu alin -i nomun, na -i ejetun de seme akūname tucibume mutehekūbi, enteke sain ba absi ferguwecuke, ala bigan ubašambi tarimbi, usin seci ujui jai, boihon seci umesi huweki, hai ceng hiyan be šurdeme, g'ai ping hiyan de nikeneme, liyoo yang jeo be dabame, siowan ceng hecen be kamcime, hunehe bira be umiyesun, yenden -i ba be adasun -i gese obuha tondokon amba jugūn necin neigen, šehuken bigan tala bur bar seme, sain ferguwecun -i ambula borhome isahangge, yala hija hujuku -i gese
abka na -i wembume hūwaliyambuha ba. abkai han gosime dergi baru tuwafi, ubade daicing gurun de bufi,tumen aniya de isitala han' gurun -i pei fung ni gese ba obuha. aika boihon -i kemneku moo -i kemneku be jafafi bodome onco golmin be kemneme, mishan jušuru be dahame yohoron bira be hafumbuha, arame deribuhe seme uculehe elhe oho seme irgebuhe babe oci, geli bahafi murušeme donjiha. abkai dulingga sure han -i forgon ci, ambarame iletuleme ambarame sirame, fe šen yang ni ba be dahame, musei ice durun be badarambume, abka be dusuleme na be kemneme, genggiyen -i ici forifi erin be ulaha, badarambume milarame jakūn duka nonggifi, tondolome mudalime uyun amba jugūn be hafumbume, uncehen -i fu be ter seme teksin, hoton -i kerumu be kes seme den obume weilehe,
muheliyen muhun be guwali julergi de iliburede, gincihiyan bolgo obume šurdeme fu kūwarame jafafi, gingguleme ihan tuwa be muhaliyafi mukdembume deijime gu alibume defelinggu jafafi, yūn ho kumun be deribume, biyooha jancuhūn usihai gese uihengge ihan be dobome, wa sukdun sukjiere be baime, juktere hacin be iletulehebi. gecen silenggi be fehuhede, niyengniyeri bolori forgošoro seme, hio seme, buru bara -i gese gūnime, bolgo gurung de deribume jukteme, silgiyame obofi tuilefi bujuhangge be dobome, mukei nure, untuhun sile -i wecere jakade,
wen dzung han,
šen dzung han uthai ebunjifi alime gaiha. abkai šurdejen -i da ujui usiha de teisulebume, han -i yamun be, wei yang gurung ni gese cin -i weilefi, akdun saikan, ilan deyen be dabkūrilafi abkai dukai gese jurulehe, isanjire duka be temgetulehe, isanjire dukai gebu ai seci, šu -i erdemui duka, coohai gungge -i duka inu, deyen -i gebu ai seci, dulimba de wesihun dasan -i deyen inu, sukdun be hargašara den taktu de, garudai gerudei sere hergen lakiyahabi, amargi gurung be, jaksangga ten usiha de teisulebume, acafi hūwaliyaka gūnin be gaime, genggiyen elhe gurung sehe, geli hūwaliyasun doronggo gurung, da gosin -i gurung weilefi, wen be gurun boo de selgiyehebi, damu gulu ofi elhe oho, cohome akdun ofi sain oho, aika fa jerguwen be yangselame foloho coliha biheo, aika mulu son be miyamime eldengge saikan obuha biheo, aika lung šeo alin -i tokdohon cokcohon abbe dasatafi weilehe biheo, aika garudai -i asha saraha gese den wesihun -i arara biheo. ere hono gūnin bifi kemungge malhūn oki sehengge waka bime, too tang ni forgon de lak seme acanahabi, wesihun dasan -i deyen be julesi forobume, juwan ordo be sar seme faidame weilefi, dacilame kemneme inenggidari aisilame inenggidari mutebume ejen amban -i emu erdemui sain be, yamun -i duka ci jakūn derei lakcaha jecen de isibume badarambuhabi. wesihun colo tukiyefi, sucungga aniya be toktobufi, abkai hūturi be aliha, tereci juwe galai teisu be toktobume, jakūn gūsai babe faksalame, suwayan, šanyan, fulgiyan, lamun be, gulu ningge kubuhe ningge obume, sunggartu usiha -i arbun be dursuleme, fu hi -i nomun -i ton be songkolome, suwaliyaganjara teherebure kūbulin be forgošome, uyun gurun ni ferguwecuke be jafame, amba enduringge -i fukjin kooli toktobuhangge, aššahadari abkai arbun de acanahabi, ere uthai halafi bithe temgetu arara de, fatha, bederi be tuwahangge adali bihebi, fiyanji dalikū ilibufi, ujen de tefi weihuken be kadalara jakade, fulehe gargan tanggū jalan de isitala, musei abkai fisen -i uksun be badarambuha. doro de aisilaha gungge oci fiongdon, eidu, hife serengge, gungge siyoo ho, jang liyang ci colgoroko, jai tehei hebešehengge bi, gidaha, fondolohongge bi ler seme der seme, teisu teisu hūsun bume faššahangge umesi labdu, tere garudai de nikehe, muduri fasiha gesengge oci, geli sejen de tebume hiyase -i miyalire gese ambula bihe, tereci gurun -i bithe be banjibufi, šu tacihiyan be deribume yendebume, jugūn be badarambume gisun be ubaliyambume, yaya hacin be dursukileme tucibure de, damu dahai serengge yargiyan -i acabume duilere tušan be akūmbume mutehe udu lakcaha jecen seme urunakū hafumbuha, uthai ser sere turgun seme inu iletulebuhe. jai teisu teisu beyei afara ba oci, wang oho niyalma de bakcin akū ofi, burdeme ciralaci tanggū hoton fakjin ufarabuha, temgetun -i joriha ici ilan jase selgiyehe bithe de toktoho, jurgangga ofi amasi tuwašahakū, baturu ofi kūwaran dabkūrilara be baibuhakū, erde duin mederi baingge be dahabutala eljehengge akū, minggan julge ci ebsi teherengge akū, tuttu jalan halame sirara hafan šangnafi, esei joboho faššaha de karulame nadan usihai fesin amasi jorime, bolori dulefi tuweri oho manggi, alai dorgi de abalame, musei coohai agūra be dasataci, hūwasar serengge boconggo nioron -i gese wadan, ler serengge, gelfiyen nioron -i gese tuhebuku, hūwar serengge, talman ci colgoroko turun, šuwai serengge tugi de sucunara girdan, amargingge adaha sejen, julergingge yarure gajarcilarangge, musei ujin dahan be yalume, tere coliha sejen be baitalahakū bihe. jebele ergi bedereburakū dacun sirdan, dashūwan ergi taksiburakū ulga beri -i giyob seme gabtašarangge, akjan -i durgere gese, sireneme dahalarangge, usiha -i eyere adali, ede geli wang liyang ni julhū alibure siyan o -i sejen jafara be ai baibure babi. tereci uksilehe tanggū tumen cooha, sasa giyahūn be maktame, indahūn be cukuleme, orin be niolhumbume, tai šan alin be taktu noho sejen obuha sehe be basuha, amba mederi be akdalame, asu sarame yabuha sehengge, geli ai dabufi gisurere babi. tuttu der seme, ter seme, ler seme, far seme jorin be toktobufi gabtahadari tab sere jilgan -i sasa tuhebuhe bigan de hiyancilaha sesilehe mafuta be facabume, yeru de somime tomoho manggisu be dekdebume, fiyeleku de aihadara cumcurara bukun be aksabume, dakda dakda bigan -i gūlmahūn be bošome, meiren šadatala gala lusutele baha bime, feniyen feniyen -i gurgu, kemuni alin de sireneme bigan de sekteme, juwari orho -i gese fosor seme bi, tuttu ilan derei kara doroi abalame, yooni warakū be tuwabume, geli gocika, kordonggo hafasa de afabufi, yarha -i uncehen be tatame, tasha -i uju be gidame akdun -i lefu be jafame, bigan -i sakda be wame, baturu hahasi kas kis seme arbušara be tuwame, eshun gurgu -i ice niyarhūn be selame baha manggi, teni musei butaha amba gurgu be alibume, tere arcame wahangge be waliyafi, sonjoho uju jergi wahangge, yargiyan -i hashū ergi comboli -i feyeingge oci, mafari juktehen de baitalara jalin, katabufi moositun de tebure, šoloro citure de obufi, siramengge be antahasa de belhehe manggi, teni dorgi budai boode benehe, bahangge be salame šang isibure de tergeci, albasa -i jergi buya urse de akūnaha, ere cohome abka na -i aisi be dahame, coohai urse be niyancangga obume urebuhengge ofi, tuttu afaci etehe, wececi hūturi, be aliha, julgei otorilara, ulun gidara, sahadara, hoihalara dorolon be iletulehengge. ainahai tenteke ilan erin -i usin -i jeku be tookabuha, tanggū hala -i huweki usin be ejelehe. nimalan moo tebuhe babe susunggiyaha, sahadara abalara kūwaran be badarambuha, dzi hioi fujurun, šang lin yafan -i fujurun -i darihangge adali, bihebi. hošoi ejete feniyen feniyen -i acafi goloi beise olhošoho dade olhošome alban jafame hargašanjiha ginggun olhoba -i yamun de yabuha. eici hengkišeme gege jorire be baiha, eici mujilen hungkereme sargan jui sonjoro be baihangge de, uyun mudan deribure kumun, jakūn hacin -i amtangga booha -i sarilahabi, hū han ye -i dele hargašanjiha ci dulefi, giyei lii -i yamun de maksiha ci colgorofi, dorgi tulergingge be uherilefi emu boo ohongge, mini
mafari ci uthai uttu bihe kai. akdun obuci acara ba oci, dalingho sere ba, emu ikiri huweki sain onco leli, niyanciha ongko ler seme sekteme banjihabi, juwari forgon de jecen -i bade galman akū, niyengniyeri forgon de šeri muke bilgešeme delišembi, tuttu ofi, yohoron gocika morisa, banjiha fusekengge umesi labdu, tere kara, alha, suiha fulan, kūwa alha, jerde, tolbotu, kailun, boro fulan, keire, tosi, seberi, kūwa kara fulan, fulan, sarla, burulu ekisaka dedurengge dedumbi, kutur seme yaburengge yabumbi, damu foromime yabure de baitangga sere anggala, horon be algimbure baitalara de inu ereci dulerengge akū. hoton bigan be badarambume wajifi, usin nimalan -i baita be huwekiyebuci acame ofi, tereci usin -i hafasa be takūrafi, tereci tokson data de afabufi, fulu aniyade jekui use be kimcime, nuhu nuhaliyande acarangge be ilgame, hahasi be tarire yangsara de hūsutulebume, hehesi be jodoro fororo de kicebume, faksi, hūdai ursei dubei baita be fusihūn obume, etuku jeku -i da kicen de faššabume ofi, tuttu šumin tarime bolgoi yangsaha de, jeku ereci elgiyen oho. juwari uyunju inenggi ilan mudan yangsaha de, muke lampa ci guwehe, musei alban -i usin de agaha manggi, uthai beyeingge de isibuha. musei anja homin be belhehengge, jing hadufun -i hadure erin, musei hafudun de tebuhe amsun, yargiyan -i gemu sain bele musei calu munggan -i adali, cahin ton -i adali oho. etuku boso kubun ningge be wesihuleme faksi saikan be hihalahakūbi, tetun, yehetun -i deijihe hotoi weilehengge be baitalame, mamgiyakū miyamišakū be targahabi. damu boihon ci tucire jaka be saišara jakade, enduri sain jaka be salame banjiha, erin oci, sahaliya ira, kabangga, handu oci, yeye handu, šanyan bele, je bele oci, fulgiyan fisihe, šanyan fisihe, niyalgu oci, fulgiyan niyanggu, suwayan niyanggu, hūlimba sahaliyan jima malanggū maise, muji, arfa, sahaliyan malanggū, šušu fulgiyan faksalahabi, turi de bohori, giyangdu bi, sogi oci, wahūnda sogi, maca, suwanda, mursa, sengkule, elu, empi, okjiha, cuse moo -i arsun, šušu gintala, suseri, hoto, menji, eimpe, hingneci, furgisu, der seme ler seme fik seme šalar seme, ter seme šak seme, narhūn fisin buktan buktan -i banjirakūngge akū. damu boihon be dahahangge umesi acanara jakade, tuttu usin -i baita ambula sain ohobi, usin -i šolo de afara be tacibume, tuwakiyame seremšeme ishunde tuwašatabume, gurun bayan elgiyen, cooha mangga etuhun ofi, ferguwecuke sukdun burgašame colgoropi, sireneme yarume jecen akū, irgen -i tacin gulu akdun, hoo seme ter seme elehun -i banjimbi.
lingge elden ferguwecuke ofi,
dergi abka de hafunafi,
dergi abkai han gosime jui seme tuwame aniya goidara jakade, tuttu mini
šidzu han mafa, niyalmai musei daicing gurun de foroho gūnin be dahame,
abkai ming gurun be eimehe mujilen de acabume musei funde geterembume yabure anagan -i soorin -i liodzei be bašara de, juse deote -i gese siliha cooha be gaifi, emu da sirdan hono gabtame suilahakū bime, doro be alifi soorin de tefi beging de gemuhele, kemuni minggan julgei yendehe wasika be baicafi, tanggū jalan -i forogon ton be baicafi, tanggū jalan -i forgon ton be kimcici, temgetu sabi de akdaci mangga sehe be ashūfi, gosin jurgan -i tuwakiyaci ojoro be akdaha, buhū be amcambi sere gehe gisun be milarabufi, enduri tetun de afabuha ba bisire be yargiyalaha de, teni
abkai han -i hese enteheme acabume, musei daicing gurun be gosihangge umesi jiramin be saha. yala neihengge akū bici, aini badarambumbihe, deribuhengge akū bici, aide bahambihe, dade bula šuwa be geterembume, edun buraki be funtume, jobocun suilacun be dosobume, aisi jobolon be dulembume, umai anabuha halaha songko akū bime, sejen bithe -i emu ofi yamulanjiha be alime gaihangge, uthai dasan -i nomun de henduhe tang han de seme eldengge oho, irgebun -i nomun de henduhe, irgen dahaha sehengge kai. ere ferguwecuke mukden -i ba, yala han -i falga, tuttu
hesei cooha kadalara jiyanggiyūn tebufi, sunja jurgan -i ashan -i amban sindaha, irgen be fu hiyan de jirgabume, gūsaingge be gašan tokso de sebjelebume, niyengniyeri taribume bolori bargiyabume, calu de asarame sejen de tebume, ice tofohon de hargašame isabume, simengge kumungge -i yabubume, tumen aniya otolo doro bisire be iletulehe, tanggū jalan de isitala, ferguwecun enteheme ojoro be bahabuha be dahame, tuttu tukiyecun araha, tukiyecun -i gisun,
ambalinggū mukden fukjin ilibuha, amargi simiya be dalirabuha, alin den bira onco, abkai fejergi de tuwakū toktobuha, ayan tasha muduri -i gese, ambula ferguwecuke ba banjinaha, acabume ulan fetebufi, akdulame hoton sahabuha abka na de dursuleme, a e be alhūdaha, ai, ai hūda be faksalame, ashan de taktu be dabkūrilaha, amabrame ten be ilibufi, amba han -i dodro be badarambuha, embici jeo gurun de bin ki sehe, embici han' gurun de fung pei sehe, ereci be šui, king šan seme, eci gemu han se yendenuhe, eldepi šanyan alin temgetulefi, emu girin -i mederi šurdenuhe, enteke oyonggo arbungga babe, enteheme jalan jalan akdambihe, eiten babe fusihūn enggeleme, ertele dorgi tulergi be uherilehe, ergembume ujime tanggū aniya ofi, elgiyen taifin de sebjelehe, ere da bodogon be gūninafi, ele soorin de ginggulehe,
umesi
enduringge šengdzu mafa siranduha, ubade ilan mudan isinjiha, uruldehe morin ter seme tohobufi, uksin cooha yar seme yabubuha, uyunju dabkūri de bifi, urhufi jirgara be atanggi baiha, unenggi gūnin -i
munggan de dorolonjifi, uce neifi deyen de hargašabuha, urgun sarin fe gurung de dagilafi, ungga sakda de hūntahan darabuha, ujen kesi be badarambume, ulusu irgen de isibuha, umai nurhūme kedererengge waka. urui julge be alhūdaha, ambula erdemu akū de yertešehe, amba soorin de sirame tehe, aniyadari taimiyoo wecerede, acinggiyabufi wesire wasire be erhunjehe,
ilan munggan be jongko dari amcame kidurengge hing sehe,
abkai gosire de nashūlafi, aniya elgiyen de teisulehe ambarme dasatafi ebsi jiderede adame yaruha faidan jurulehe, aššarangge edun tugi -i gese, acaburengge esihe nimaha adali sirenehe, antahasa hafasa feniyelefi, amargi mimbe dahalame šurdenuhe, enduri falga de isinjiha, ereni munggan yamun be hargašaha, eldengge ferguwecun gehungge alin ci tucinjifi, eiten sabi simiya bira de isarlaha, embici da juktehen -i gese etuku dobobufi, embici ba ling ni gese jibehun faitabuha, eldeke tugi jakdan de burgašame, eyere muke birgan de calgišaha, enteheme ferguwecuke wen be deribufi ergengge jaka šanggabuha be gūninaha, ertele wehei morin simacuka ofi, esi yasai muke sabdaralaha, enenggi šasihan fajiran de kidurengge, emu sukdun -i salgabuha ci banjinaha, ilibuha fe gung de jihe ilibuha ter sehe, ikiri terkin de wesinjihe, ikiri terkin jergilehe, icemleme yangselahangge waka, iktambuha jiramin ci deribuhe, ice biya -i gese gilmarjame, inenggishūn šun -i gese jerkišehe, icišame tafukū celehen weilebufi, ineku kulun dahasun be dursulehe ilbaha boihon -i fajiran hiyabun seci, inu malhūn erdemu be temgetulehe, iletu bodogon omosi de tutabuhangge. icanggasaka tumen tumen aniya elhe, ereci julergi duka be milarabuha, encehe sarin be faitabuha, emde hanci niyalma de hūntahan guribume, emde ambasa hafasa de isibuha, ereni fe susu -i sengge sakda, eyerjeme fularjame omijaha, ere geren sain urse, esi gemu mafari -i werihe aha, ergembuhe gosime jihei, erindari minde isinjiha, erindari ginggulere dade gingguleme, ele gelere olhoro gūnin nonggibuha, ede tumen tumen aniya de isitala, enteheme amba doro be badarambuha.
ᡨᡠᠴᡳᠪᡠᠨ (tucibun)
[edit]ᡤᡳᠩᡤᡠᠯᡝᠮᡝ ᡤᡡᠨᡳᠴᡳ᠈ ᡧᡳ ᠵᠣᠣ ᡳ ᡶᡠᡴᠵᡳᠩᡤᠠ ᡥᡝᡵᡤᡝᠨ ᡳ ᡠᠯᠠᠨ᠈ ᡠᠮᡝᠰᡳ ᠵᡠᠯᡤᡝᠴᡳ ᡩᡝᡵᡳᠪᡠᡥᡝᠪᡳ᠈ ᡶᡠ ᡥᡳ᠈ ᡝᠮᡤᡝᡵᡳ᠈ ᠵᡳᠵᡠᡥᠠᠨ ᡩᡝ ᡨᡝᡵᡝᡳ ᠰᡝᡴᡳᠶᡝᠨ ᠪᡝ ᠨᡝᡳᡥᡝ᠈ ᡮᠠᠩ ᡤᡳᠶᡝᡳ᠈ ᠨᡳᠩᡤᡠᠨ ᡥᠠᠴᡳᠨ ᡳ ᠠᡵᠠᡥᠠ ᡩᡝ ᡨᡝᡵᡝᡳ ᡶᡳᠰᡝᠨ ᠪᡝ ᠪᠠᡩᠠᡵᠠᠮᠪᡠᡥᠠ᠈ ᠸᡝᠰᡳᡥᡠᠨ ᡨᡠᠸᠠᠮᡝ ᡶᡠᠰᡳᡥᡡᠨ ᡴᡳᠮᠴᡳᠮᡝ᠈ ᠪᡳᡨᡥᡝ ᡥᡝᡵᡤᡝᠨ ᠪᡝ ᡠᠯᡥᡳᠶᡝᠨ ᡳ ᠪᠠᡩᠠᡵᠠᠮᠪᡠᠮᡝ᠈ ᡥᠠᠴᡳᠩᡤᠠ ᡩᡠᡵᡠᠨ ᡶᠠᡴᠰᠠᠯᠠᠪᡠᡶᡳ᠈ ᠰᡝᡴᡳᠶᡝᠨ ᡠᠯᠠᠨ ᠪᠠᠨᠵᡳᠨᠠᡥᠠᠪᡳ᠈ ᡩᠠᠮᡠ ᠰᠠᡳᠨ ᠰᡝᠯᡝ᠈ ᠠᡴᡩᡠᠨ ᠸᡝᡥᡝ ᡩᡝ᠈ ᡶᡝ ᡩᡠᡵᡠᠨ ᡨᠠᡴᠰᡳᡴᠠᠩᡤᡝ᠈ ᡨᠣᠩᡤᠠ᠈ ᠵᡠᠯᡤᡝ ᠪᡝ ᡨᠠᠴᡳᡥᠠ᠈ ᡠᡵᠰᡝ᠈ ᡝᠮᡥᡠᠨ ᠪᠠᡥᠠᠨᠠᡥᠠ ᠪᡝ ᡨᡠᡴᡳᠶᡝᠴᡝᠮᡝ᠈ ᡠᠮᠠᡳ ᡴᡳᠮᠴᡳᠮᡝ ᠪᠠᡳᠴᠠᡵᠠ ᠪᡝ ᡴᡳᠴᡝᡵᠠᡴᡡ ᠣᠵᠣᡵᠣ ᠵᠠᡴᠠᡩᡝ᠈ ᠪᡳᡨᡥᡝᡳ ᡥᠠᠴᡳᠨ ᡩᡝ ᠪᠠᡳᠴᡳ᠈ ᡠᠯᡥᡳᠶᡝᠨ ᡳ ᠸᠠᠯᡳᠶᠠᡵᠠ ᡠᡶᠠᡵᠠᠪᡠᡵᡝ ᡩᡝ ᡳᠰᡳᠨᠠᡥᠠ᠈ ᡤᡳᠶᠠᠨ ᡳ ᠠᠮᠪᠠᡵᠠᠮᡝ ᠪᠠᡳᠴᠠᡶᡳ ᠠᠴᠠᠮᠵᠠᡶᡳ᠈ ᡨᡝᡵᡝᡳ ᡠᠯᠠᠨ ᡩᡝ ᡨᡠᡨᠠᠪᡠᠴᡳ ᠠᠴᠠᠮᠪᡳ᠈ ᠮᡠᠰᡝᡳ
ᡤᡠᡵᡠᠨ ᡶᡠᡴᠵᡳᠨ ᠮᠠᠨᠵᡠ ᡥᡝᡵᡤᡝᠨ ᡳᠯᡳᠪᡠᡵᡝ ᡩᡝ᠈
ᡝᠨᡩᡠᡵᡳᠩᡤᡝᡳ ᡩᡝᡵᡳᠪᡠᡥᡝᠩᡤᡝ᠈ ᠠᠪᡴᠠᡳ ᠰᠠᠯᡤᠠᠪᡠᡥᠠ ᠴᡳ ᠪᠠᠨᠵᡳᠨᠠᡥᠠᠩᡤᡝ ᠣᡶᡳ᠈ ᡶᠠᡴᠰᠠᠯᠠᠮᡝ ᠠᠴᠠᠪᡠᠮᡝ ᡥᠣᠯᠪᠣᠮᡝ ᠰᡳᡵᠠᠪᡠᠮᡝ᠈ ᡠᡥᡝᡵᡳᠯᡝᠮᡝ ᠪᠠᡴᡨᠠᠮᠪᡠᡥᠠᠩᡤᡝ ᠠᠮᠪᡠᠯᠠ ᡧᡠᠮᡳᠨ᠈ ᡩᠠᠮᡠ ᡶᡠᡴᠵᡳᠩᡤᠠ ᡥᡝᡵᡤᡝᠨ᠈ ᡠᡩᡠ ᡩᠠᠴᡳ ᠪᡳᡥᡝᠩᡤᡝ ᠪᡳᠴᡳᠪᡝ᠈ ᡴᡝᠮᡠᠨᡳ ᠠᡴᡡᠨᠠᡥᠠᡴᡡ ᠣᡶᡳ᠈ ᡨᡠᡨᡨᡠ ᠪᠣᠣᠪᠠᡳ᠈ ᡩᠣᡵᠣᠨ᠈ ᡴᠠᡩᠠᠯᠠᠨ᠈ ᡨᡝᠮᡤᡝᡨᡠ ᡩᡝ᠈ ᡩᠠᠮᡠ ᠠᠨ ᡳ ᡥᡝᡵᡤᡝᠨ ᠪᡝ ᠪᠠᡳᡨᠠᠯᠠᡥᠠᠪᡳ᠈
ᡥᡡᠸᠠᠩᡩᡳ ᠵᡠᠯᡤᡝ ᠪᡝ ᡴᡳᠮᠴᡳᠮᡝ ᡧᡠ ᠪᡝ ᠸᡝᠰᡳᡥᡠᠯᡝᠮᡝ ᡨᡠᠮᡝᠨ ᠪᠠᡳᡨᠠ ᡳᠴᡳᡥᡳᠶᠠᡥᠠ ᡧᠣᠯᠣ ᡩᡝ᠈
ᠪᡝᠶᡝ ᠵᠣᡵᡳᡧᠠᠮᡝ ᡨᠠᠴᡳᠪᡠᠮᡝ᠈
ᠮᠠᠨᠵᡠ ᡥᡝᡵᡤᡝᠨ ᠪᡝ ᠪᠠᡳᡨᠠᠯᠠᠮᡝ᠈ ᡥᠠᠴᡳᠩᡤᠠ ᡩᡠᡵᡠᠨ ᡳ ᠮᠠᠨᠵᡠ ᡶᡠᡴᠵᡳᠩᡤᠠ ᡥᡝᡵᡤᡝᠨ ᠠᡵᠠᡶᡳ᠈ ᠨᡳᡴᠠᠨ ᡶᡠᡴᠵᡳᠩᡤᠠ ᡥᡝᡵᡤᡝᠨ ᡩᡝ ᡨᡝᡳᠰᡠᠯᡝᠪᡠᠮᡝ᠈ ᡝᠮᠪᡳᠴᡳ ᠵᡠᠯᡤᡝ ᠪᡝ ᠶᠠᡵᡠᡶᡳ ᡨᡝ ᡩᡝ ᡩᡠᡳᠪᡠᠯᡝᠮᡝ᠈ ᡝᠮᠪᡠᠴᡳ ᡨᡝ ᠪᡝ ᡴᡳᠮᠴᡳᡶᡳ ᠵᡠᠯᡤᡝ ᡩᡝ ᠠᠴᠠᠨᠠᠪᡠᠮᡝ᠈ ᡤᡡᠰᡳᠨ ᠵᡠᠸᡝ ᡥᠠᠴᡳᠨ ᡳ ᡩᡠᡵᡠᠨ ᠪᠠᠨᠵᡳᠪᡠᡥᠠᠪᡳ᠈ ᠴᠣᠯᡤᠣᡵᠣᡦᡳ᠈ ᠪᡳᡨᡥᡝ ᡥᡝᡵᡤᡝᠨ ᡳ ᠠᠮᠪᠠ ᡨᡠᠸᠠᡴᡡ ᡴᠠᡳ᠈ ᠠᠮᠪᠠᠨ ᡶᡠᡥᡝᠩ᠈ ᠠᠮᠪᠠᠨ ᠸᠠᠩ ᡳᠣ ᡩᡠᠨ᠈ ᠠᠮᠪᠠᠨ ᠠᡴᡩᡠᠨ᠈ ᠠᠮᠪᠠᠨ ᠵᡳᠶᠠᠩ ᡦᡠ
ᡥᡝᠰᡝ ᠪᡝ ᠠᠯᡳᡶᡳ᠈ ᡠᡥᡝᡵᡳ ᡨᡠᠸᠠᡵᠠ ᡥᠠᡶᠠᠨ ᠣᡶᡳ ᡨᠠᠴᡳᠪᡠᠮᡝ ᠵᠣᡵᡳᡧᠠᡥᠠ ᠪᡝ ᡤᡳᠩᡤᡠᠯᡝᠮᡝ ᡩᠠᡥᠠᠮᡝ᠈ ᠪᡳᡨᡥᡝ ᠣᠪᡠᠮᡝ ᠪᠠᠨᠵᡳᠪᡠᠮᡝ ᠠᡵᠠᡥᠠ᠈ ᠠᠮᠪᠠᠨ ᠪᡝ ᡥᡠᠵᡠᡶᡳ ᡤᡡᠨᡳᠴᡳ᠈ ᡥᡝᡵᡤᡝᠨ ᡳ ᡩᡠᡵᡠᠨ ᠪᡝ ᡳᠯᡝᡨᡠᠯᡝᠮᡝ ᡨᡠᡨᠠᠪᡠᡴᡳ ᠰᡝᠴᡳ᠈ ᡠᡵᡠᠨᠠᡴᡡ ᠵᠠᠯᠠᠨ ᡩᡝ ᡨᡠᡨᠠᠪᡠᠮᡝ᠈ ᠪᠣᠣ ᡨᠣᠮᡝ ᡨᠠᠴᡳᡵᡝ ᠨᡳᠶᠠᠯᠮᠠ ᡨᠣᠮᡝ ᡥᡡᠯᠠᡵᠠ ᡶᡝᡵᡤᡠᠸᡝᠴᡠᡴᡝ ᠪᡳᡨᡥᡝ ᠪᡝ ᠠᡵᠠᡶᡳ ᠰᡝᠯᡤᡳᠶᡝᡵᡝ ᠣᡥᠣᡩᡝ᠈ ᡠᠯᠠᡵᠠᠩᡤᡝ ᡨᡝᠨᡳ ᡝᠯᡝ ᡤᠣᡵᠣ ᠣᠮᠪᡳ᠈ ᡤᡳᠩᡤᡠᠯᡝᠮᡝ ᡤᡡᠨᡳᠴᡳ᠈
ᡥᠠᠨ ᡳ ᠠᡵᠠᡥᠠ ᠮᡠᡴᡩᡝᠨ ᡳ ᡶᡠᠵᡠᡵᡠᠨ ᠪᡳᡨᡥᡝ᠈ ᠪᠠᠨᠵᡳᠪᡠᡥᠠᠩᡤᡝ ᠠᠮᠪᠠᠯᡳᠩᡤᡡ᠈ ᠠᡵᠠᡥᠠᠩᡤᡝ ᡶᡝᡵᡤᡠᠸᡝᠴᡠᡴᡝ᠈ ᡩᡝᡵᡤᡳᡩᡝ ᠣᠴᡳ᠈
ᠮᡠᡴᡩᡝᠨ᠈ ᠶᡝᠨᡩᡝᠨ ᠴᡳ ᠸᠠᠩ ᠨᡳ ᡩᠣᡵᠣ ᡳ ᠶᡝᠨᡩᡝᡥᡝ ᠮᠠᠩᡤᠠ ᠰᡠᡳᠯᠠᠴᡠᡴᠠ᠈ ᠪᡝ ᡨᡠᠴᡳᠪᡠᡥᡝ᠈ ᡶᡝᠵᡝᡵᡤᡳᡩᡝ ᠣᠴᡳ᠈ ᡨᡠᠮᡝᠨ ᠵᠠᠯᠠᠨ ᡩᡝ ᡳᠰᡳᡨᠠᠯᠠ ᠵᡠᠰᡝ ᠣᠮᠣᠰᡳ ᡳ ᡩᡠᡵᡠᠨ ᡨᡠᠸᠠᡴᡳᠶᠠᠨ ᠪᡝ ᡨᡠᠸᠠᠪᡠᡥᠠ᠈ ᠪᡳᡨᡥᡝ ᠣᠴᡳ᠈ ᡴᠣᠣᠯᡳ ᠪᠣᡩᠣᠩᡤᠣ ᠴᡳ ᠴᠣᠯᡤᠣᡵᠣᡴᠣ᠈ ᡤᡳᠰᡠᠨ ᠣᠴᡳ᠈ ᡧᡠᠩᡤᡳᠶᠠ ᡨᡠᡴᡳᠶᡝᠴᡠᠨ ᠪᡝ ᡩᡠᠯᡝᡴᡝ ᡥᡝᡵᡤᡝᠨ ᡠᡥᡝᡵᡳ ᡳᠯᠠᠨ ᠮᡳᠩᡤᠠᠨ ᡳᠯᠠᠨ ᡨᠠᠩᡤᡡ ᡠᠶᡠᠨᠵᡠ ᡶᡠᠨᠴᡝᠮᡝ ᠪᡳᡶᡳ᠈ ᡥᠠᠴᡳᠩᡤᠠ ᡩᡠᡵᡠᠨ ᠶᠣᠣᠨᡳ ᠶᠣᠩᡴᡳᠶᠠᡶᡳ᠈ ᡴᡡᠸᠠᡵᠠᠮᡝ ᠪᠠᡴᡨᠠᠮᠪᡠᡥᠠᠩᡤᡝ ᠮᡝᠯᡝᠪᡠᡥᡝᡴᡡ ᠣᡶᡳ᠈ ᡨᡠᡨᡨᡠ ᠪᠠᡳᠮᡝ ᠸᡝᠰᡳᠮᠪᡠᡶᡳ᠈ ᡤᡡᠰᡳᠨ ᠵᡠᠸᡝᡨᡝ ᡩᡠᡵᡠᠨ ᡳ ᠮᠠᠨᠵᡠ ᠨᡳᡴᠠᠨ ᡶᡠᡴᠵᡳᠩᡤᠠ ᡥᡝᡵᡤᡝᠨ ᡳ
ᠮᡠᡴᡩᡝᠨ ᡳ ᡶᡠᠵᡠᡵᡠᠨ ᠪᡳᡨᡥᡝ ᠪᡝ ᡝᠮᡨᡝ ᠶᠣᡥᡳ ᠠᡵᠠᠪᡠᡶᡳ᠈ ᠠᠴᠠᠪᡠᡶᡳ ᡨᠣᠪ ᠰᡝᠮᡝ ᠵᡝᠣ ᡤᡠᡵᡠᠨ ᡳ ᠸᡝᠨ ᠸᠠᠩ ᠨᡳ ᡩᠠᠪᡴᡡᡵᡳᠯᠠᠮᡝ ᠵᡳᠵᡠᡥᠠᠨ ᡳ ᡨᠣᠨ ᡩᡝ ᠠᠴᠠᠨᠠᡥᠠᠪᡳ᠈
ᠮᠠᠨᠵᡠ ᡥᡝᡵᡤᡝᠨ ᡳ ᡳᠴᡝ ᡩᡠᡵᡠᠨ ᠪᠠᡩᠠᡵᠠᡴᠠ ᡩᡝ᠈ ᠵᡠᠯᡤᡝᡳ ᡶᡠᡴᠵᡳᠩᡤᠠ ᡥᡝᡵᡤᡝᠨ ᡳ ᡶᡝ ᠰᠣᠩᡴᠣ ᡝᠯᡝ ᠶᠣᠩᡴᡳᠶᠠᡶᡳ᠈ ᡤᡠ ᡳ ᠠᠴᠪᡠᡵᡝ ᠨᡳᠴᡠᡥᡝ ᡳ ᡠᠯᡳᡵᡝ ᡨᡠᡤᡳ ᡳ ᠪᠣᠮᠪᠣᠨᠣᡵᠣ ᡠᠰᡳᡥᠠ ᡳ ᡤᡝᡵᡳᠯᠠᡵᠠ ᡤᡝᠰᡝ᠈ ᡤᡝᡥᡠᠨ ᡝᠯᡩᡝᡦᡳ᠈ ᠶᠠᡵᡤᡳᠶᠠᠨ ᡳ ᡶᡝᡵᡤᡠᠸᡝᠴᡠᡴᡝ ᡴᡝᠮᡠᠨ ᡨᡠᡨᠠᠪᡠᡥᠠᠪᡳ᠉ ᠰᡝᡳᠪᡝᠨᡳ ᡨᠠᠩ ᡤᡠᡵᡠᠨ ᡳ ᠯᡳᡳ ᠶᠠᠩ ᠪᡳᠩ ᠨᡳ ᠵᡠᠯᡤᡝᡳ ᡠᡶᡴᠵᡳᠩᡤᠠ ᡥᡝᡵᡤᡝᠨ ᠪᡝ ᠯᡝᠣᠯᡝᠮᡝ ᡥᡝᠨᡩᡠᡥᡝᠩᡤᡝ ᡥᠣᡧᠣᠩᡤᠣ ᠮᡠᡥᡝᠯᡳᠶᡝᠨ ᡝᠶᡝᠮᡝ ᡨᠣᡴᡨᠣᡵᠣ ᠠᡵᠪᡠᠨ ᠪᡝ᠈ ᠠᠪᡴᠠ ᠨᠠ᠈ ᠠᠯᡳᠨ ᠪᡳᡵᠠ ᡩᡝ ᠪᠠᡥᠠᠨᠠᡥᠠ᠈ ᡳᠵᡳᡵᡝ ᠸᡝᡴᠵᡳᡵᡝ ᡝᠯᡩᡝᡵᡝ ᡶᠣᡵᡤᠣᡧᠣᡵᠣ ᡴᡝᠮᡠᠨ ᠪᡝ᠈ ᡧᡠᠨ ᠪᡳᠶᠠ ᡠᠰᡳᡥᠠ ᠣᡵᠣᠨ ᡩᡝ ᠪᠠᡥᠠᠨᠠᡥᠠ᠈ ᠮᡠᡴᡩᡝᡵᡝ ᠰᡝᠯᡤᡳᠶᡝᡵᡝ ᠮᡠᡨᡠᡵᡝ ᠪᠠᡩᠠᡵᠠᡵᠠ ᠠᡵᠪᡠᠨ ᠪᡝ᠈ ᡨᡠᡤᡳ ᠵᠠᡴᠰᠠᠨ ᠣᡵᡥᠣ ᠮᠣᠣ ᡩᡝ ᠪᠠᡥᠠᠨᠠᡥᠠ᠈ ᡳᡴᡡᡵᡝ ᠰᠠᠨᡳᠶᠠᡵᠠ ᡩᡝᠶᡝᡵᡝ ᠠᡧᡧᠠᡵᠠ ᡤᡳᠶᠠᠨ ᠪᡝ᠈ ᠨᡳᠮᠠᡥᠠ ᡠᠮᡳᠶᠠᡥᠠ ᡤᠠᠰᡥᠠ᠈ ᡤᡠᡵᡤᡠ ᡩᡝ ᠠᡥᠠᠨᠠᠮᠪᡳ᠈ ᡤᠠᠯᠠᡳ ᡳᠴᡳ ᡥᠠᠴᡳᠩᡤᠠᡳ ᡴᡡᠪᡠᠯᡳᠮᡝ᠈ ᡤᡡᠨᡳᠨ ᡳ ᠴᡳᡥᠠᡳ ᡧᠠᠩᡤᠠᠪᡠᡥᠠᠩᡤᡝ᠈ ᡳᠯᠠᠨ ᡝᡵᡩᡝᠮᡠ ᡳ ᠰᡠᡴᡩᡠᠨ᠈ ᠠᡵᠪᡠᠨ ᡩᡝ ᡥᠠᡶᡠᡶᡳ᠈ ᡨᡠᠮᡝᠨ ᠵᠠᡴᠠ ᡳ ᠪᡠᠶᡝᠨᡳᠨ ᠮᡠᡵᡠ ᠪᡝ ᠶᠣᠩᡴᡳᠶᠠᡥᠠᠪᡳ ᠰᡝᡥᡝᠪᡳ᠉
ᡥᡡᠸᠠᠩᡩᡳ ᡤᡡᠨᡳᠨ ᡳ ᡩᠣᠯᠣ ᡧᡠᠸᡝ ᡥᠠᡶᡠᡶᡳ᠈ ᡤᠣᡵᠣ ᠪᡝ ᠶᠠᡵᡤᡳᠶᠠᠯᠠᠮᡝ ᡥᠠᠨᠴᡳ ᠪᡝ ᡴᡳᠮᠴᡳᠮᡝ᠈ ᠵᡠᠯᡤᡝ ᡨᡝ ᠪᡝ ᡴᡡᠸᠠᡵᠠᠮᡝ ᠪᠠᡴᡨᠠᠮᠪᡠᠮᡝ᠈ ᡝᡵᡝᠨᡳ ᡳᠯᠠᠨ ᡝᡵᡩᡝᠮᡠ ᠪᡝ ᡥᠠᡶᡠᠮᡝ᠈ ᡨᡠᠮᡝᠨ ᠵᠠᡴᠠ ᠪᡝ ᠶᠣᠩᡴᡳᠶᠠᡵᠠ ᠪᡝ ᡩᠠᡥᠠᠮᡝ ᡝᡵᡝ ᠶᠠᡵᡤᡳᠶᠠᠨ ᡳ ᡧᡠ ᠪᡝ ᡴᡳᠮᠴᡳᡥᠠ ᡴᠣᠣᠯᡳ ᠪᡝ ᠰᡝᠯᡤᡳᠶᡥᡝ ᠠᠮᠪᠠ ᡨᡠᠸᠠᡴᡡ᠈ ᠮᠣᡥᠣᠨ ᠠᡴᡡ ᡩᡠᡵᡠᠨ ᡨᡠᡨᠠᠪᡠᡥᠠ ᠸᡝᠰᡳᡥᡠᠨ ᠪᠠᡳᡨᠠ ᠠᠮᠪᠠᠨ ᠪᡝ ᠵᠠᠪᡧᠠᠨ ᡩᡝ ᠪᠠᡥᠠᡶᡳ
ᡤᡝᠩᡤᡳᠶᡝᠨ ᡨᠠᠴᡳᡥᡳᠶᠠᠨ ᡩᡝ ᡤᡳᠩᡤᡠᠯᡝᠮᡝ ᠠᠯᡳᡥᠠ᠈ ᡧᡝᠩᡤᡝ ᡝᠨᡩᡠᡵᡳᠩᡤᡝᡳ ᠪᠠᠨᠵᡳᠪᡠᠮᡝ ᠠᡵᠠᡥᠠ ᠮᡠᠮᡳᠨ ᠨᠠᡵᡥᡡᠨ ᠪᠠᠪᡝ᠈ ᠮᡝᠨᡳ ᡥᡝᠨᡳ ᠰᠠᡥᠠ ᡠᡵᠰᡝᡳ ᡨᡠᠯᠪᡳᠮᡝ ᠪᠣᡩᠣᠮᡝ ᠮᡠᡨᡝᡵᡝᠩᡤᡝ ᠸᠠᡴᠠ ᠪᡳᠮᡝ᠈ ᠪᠠᡥᠠᡶᡳ ᠪᡳᡨᡥᡝᡳ ᡩᡠᠪᡝᡩᡝ ᡤᡝᠪᡠ ᠠᡵᠠᠪᡠᡥᠠᠩᡤᡝ᠈ ᠶᠠᡵᡤᡳᠶᠠᠨ ᡳ ᡠᠮᡝᠰᡳ ᡩᡝᡵᡝᠩᡤᡝ ᠸᡝᠰᡳᡥᡠᠨ ᠣᡥᠣᠪᡳ᠉ ᡠᡥᡝᡵᡳ ᡨᡠᠸᠠᡵᠠ ᡥᠠᡶᠠᠨ᠈ ᠠᠮᠪᠠᠨ ᡶᡠᡥᡝᠩ᠈ ᠠᠮᠪᠠᠨ ᠸᠠᠩ ᡳᠣ ᡩᡠᠨ᠈ ᠠᡳᠰᡳᠯᠠᠮᡝ ᡨᡠᠸᠠᡵᠠ ᡥᠠᡶᠠᠨ᠈ ᠠᠮᠪᠠᠨ ᠠᡴᡩᡠᠨ᠈ ᠠᠮᠪᠠᠨ ᠵᡳᠶᠠᠩ ᡦᡠ ᡩᠣᡵᠣᠯᠣᠮᡝ ᡥᡝᠩᡴᡳᠯᡝᡶᡳ ᡤᡳᠩᡤᡠᠯᡝᠮᡝ ᡨᡠᠴᡳᠪᡠᠨ ᠠᡵᠠᡥᠠ᠉
gingguleme gūnici, ši joo -i fukjingga hergen -i ulan, umesi julgeci deribuhebi, fu hi, emgeri, jijuhan de terei sekiyen be neihe, ts'ang giyei, ninggun hacin -i araha de terei fisen be badarambuha, wesihun tuwame fusihūn kimcime, bithe hergen be ulhiyen -i badarambume, hacingga durun faksalabufi, sekiyen ulan banjinahabi, damu sain sele, akdun wehe de, fe durun taksikangge, tongga, julge be taciha, urse, emhun bahanaha be tukiyeceme, umai kimcime baicara be kicerakū ojoro jakade, bithei hacin de baici, ulhiyen -i waliyara ufarabure de isinaha, giyan -i ambarame baicafi acamjafi, terei ulan de tutabuci acambi, musei
gurun fukjin manju hergen ilibure de,
enduringgei deribuhengge, abkai salgabuha ci banjinahangge ofi, faksalame acabume holbome sirabume, uherileme baktambuhangge ambula šumin, damu fukjingga hergen, udu daci bihengge bicibe, kemuni akūnahakū ofi, tuttu boobai, doron, kadalan, temgetu de, damu an -i hergen be baitalahabi,
hūwangdi julge be kimcime šu be wesihuleme tumen baita icihiyaha šolo de,
beye jorišame tacibume,
manju hergen be baitalame, hacingga durun -i manju fukjingga hergen arafi, nikan fukjingga hergen de teisulebume, embici julge be yarufi te de duibuleme, embuci te be kimcifi julge de acanabume, gūsin juwe hacin -i durun banjibuhabi, colgoropi, bithe hergen -i amba tuwakū kai, amban fuheng, amban wang io dun, amban akdun, amban jiyang pu
hese be alifi, uheri tuwara hafan ofi tacibume jorišaha be gingguleme dahame, bithe obume banjibume araha, amban be hujufi gūnici, hergen -i durun be iletuleme tutabuki seci, urunakū jalan de tutabume, boo tome tacire niyalma tome hūlara ferguwecuke bithe be arafi selgiyere ohode, ularangge teni ele goro ombi, gingguleme gūnici,
han -i araha mukden -i fujurun bithe, banjibuhangge ambalinggū, arahangge ferguwecuke, dergide oci,
mukden, yenden ci wang ni doro -i yendehe mangga suilacuka, be tucibuhe, fejergide oci, tumen jalan de isitala juse omosi -i durun tuwakiyan be tuwabuha, bithe oci, kooli bodonggo ci colgoroko, gisun oci, šunggiya tukiyecun be duleke hergen uheri ilan minggan ilan tanggū uyunju funceme bifi, hacingga durun yooni yongkiyafi, kūwarame baktambuhangge melebuhekū ofi, tuttu baime wesimbufi, gūsin juwete durun -i manju nikan fukjingga hergen -i
mukden -i fujurun bithe be emte yohi arabufi, acabufi tob seme jeo gurun -i wen wang ni dabkūrilame jijuhan -i ton de acanahabi,
manju hergen -i ice durun badaraka de, julgei fukjingga hergen -i fe songko ele yongkiyafi, gu -i acbure nicuhe -i ulire tugi -i bombonoro usiha -i gerilara gese, gehun eldepi, yargiyan -i ferguwecuke kemun tutabuhabi. seibeni tang gurun -i lii yang bing ni julgei ufkjingga hergen be leoleme henduhengge hošonggo muheliyen eyeme toktoro arbun be, abka na, alin bira de bahanaha, ijire wekjire eldere forgošoro kemun be, šun biya usiha oron de bahanaha, mukdere selgiyere muture badarara arbun be, tugi jaksan orho moo de bahanaha, ikūre saniyara deyere aššara giyan be, nimaha umiyaha gasha, gurgu de ahanambi, galai ici hacinggai kūbulime, gūnin -i cihai šanggabuhangge, ilan erdemu -i sukdun, arbun de hafufi, tumen jaka -i buyenin muru be yongkiyahabi sehebi.
hūwangdi gūnin -i dolo šuwe hafufi, goro be yargiyalame hanci be kimcime, julge te be kūwarame baktambume, ereni ilan erdemu be hafume, tumen jaka be yongkiyara be dahame ere yargiyan -i šu be kimciha kooli be selgiyhe amba tuwakū, mohon akū durun tutabuha wesihun baita amban be jabšan de bahafi
genggiyen tacihiyan de gingguleme aliha, šengge enduringgei banjibume araha mumin narhūn babe, meni heni saha ursei tulbime bodome muterengge waka bime, bahafi bithei dubede gebu arabuhangge, yargiyan -i umesi derengge wesihun ohobi. uheri tuwara hafan, amban fuheng, amban wang io dun, aisilame tuwara hafan, amban akdun, amban