ჸოროფილიშ ლერსი
ქომირჩქილი, სქანი ჭირი, გაჭირებას პჭარუნქინი!
გაჭირება მუჭო ვარე ლეხი ვორექ, ბჯანუქინი.
უღორონთე ოკო ორდე, შურო ვა მოხვარუქინი!
დობღური დო კოჩი ვა რე, დიხას ვა ვობარუქინი.
გაჭირება თენა ორე, კოს თე-ცალი შეხვადუნი.
ენა ირო ქომიჩქუდუ, ჩქიმო მეტი დღა ვა რდუნი.
ჩქიმ დუდიში გაჭირებაქ ჩქიმი გურს დებადუნი!
მითინიში ბრალი ვა რე, ორე მუში ნებათუნი.
გიჩქუდასჷ, უჯგუში რე, გვალას დუდი მეპკვათუნი!
თქვათი ქიგეცოდებუთი, ამბე ჩქიმი შიტყვათუნი.
ფერი საქმე ვა მოჭირუ, გვალო მიეფუათინი.
გინოღალა ვეშემლებუ, მუ ეფერი ურთათინი.
ნიტე სქანი სინთელეთი, შურო ვაგიჩინენდიკო.
გაჩინებული თოლეფით შორშე ვა გიჯინედიკო.
ართი გურით მიგორდი დო გლახას სი ვა ფირქენდიკო!
ქოფხვადუნ დო ქომიღუდას, ჸუდეს ქუდოპტერედიკო.
მა იმენდი თქვანდა მიღუ, გვალას ღორონთ ვა ჭყორუდა.
გომიშინანთ, იმენდი რე, მითინქ ვეგნოიბირუდა!
მუში დუდი მიჸოთუ დო მათი ვე კომიდინუდა.
მა სიცოცხლე მუშოთ მოკო, თექჷ ქიიჸუდა?
სქან თოლი დო წარი უჩათ აკა ჯგირო ქენმოჯინი.
კალ-კალეშა გური მიჩი, ეგებ სოთინ მივორშვინი!
კაჟინა ხარბედია. სოფელი სახარბედიო. 1921