ხობიწყარი
ნჷმ იშინჷთა, ხობიწყარი,
ნჷმ ჩარგაზა სქვამი ჭალემს,
ლანქერქ ვაგგათამამასჷ,
ქუჯინი ჭიჭე მაჸალეფს!
დოუშქვი ჭიჭე შერი ფოფორსჷ,
ვაპუჭონა ჯა დო ქუა
დო კანკალა ღალუემს
ირო ჩხვინს ვაუჩხვაპუა!
სი ლანდღვე რექ, ლებაღინე
წყურგილეფი ვემშელანდღვა,
თინემსჷთი წყარი ჯოხონი,
გიჩქჷდასი სქანი გარდა!
ვეზილიტა, ხობიწყარი,
ვახუშუა ჯა დო ქუა,
კინჷ გიწოლე მაჟიაშა,
წყურგილემც ჩხვინს ვაუჩხვახუა!
არძა ღალჷ წყარი ორე,
ართი ჸურე უღუ არძას დუდი,
არძა მეურსჷ თექ, სოთი ართი
უჩა ზღვა რე არძაში ჭკუდი.
ვაგიზინდა თით, ხობიწყარი
ღუნჯი(შენაკადი) ვაგურთუდა,
გურჷ ქუჩი თის მუგელჷნი!
დიძახსჷ(შენაკადი) გურქუ ქუმურთჷდა,
ვარა მა ქოფშჷ, თიშ, ძალათ
ხასილა გაფუდუ ტახილინი
დო ქარჩახეში(ღელე) როხი ღალიშა
ეშე ორდი ბაჸილინი?
ვეზილიტა, ხობიწყარი,
დეწყნარი დო დოწკონდინდი,
ვარა გეშალჷ კალმახეფქჷ,
გეშირილ აფუ ჩვამას ჩხვინდი.
ვეზილიტა, ხობიწყარი,
დუდი ვეჩინა ხვალე გვალო,
ვარა ტორონჯქჷ, მაფშალიაქ
ჭყენჭყონი დოგორ ყანჩაცალო.
დეკვირი, არძა სქანნერი ქორდას
ჯა დო ქუაშ მახუშალი,
მინდორს ჭაშღერჷ ვეგჷლასქჷდჷდ,
საჭირო ვეჸიდ ოხუშალი,
ვარდა ჭახანს სი ღორონთქჷ
კოჩო გინგორთინუასი,
სქანით ქოძირჷ, მუ ოკონი
სქანი ნაშარიშჷ თინუასი!
ვარა ჭე ხანს წკონდა ქორდე
ბრელი შხვა დიდ წყარიცალო,
მინდორეფშა ეკილენდჷ
არძო ლანდღვემს მაღორჯალი,
ნჷმ იშჷნთა, ხობიწყარი,
ნჷმ ჩარგაზა სქვამჷ ჭალემც,
სუფთა წყარემს ვაუჩხვაპუა,
ქუჯინი ჭიჭე მაჸალემც.