ხაჯალური
კირბეფშენი თე აია
ერებამო აბორჯესუ, ჰეი!
ღურა გინორჩელაია
ონატრელო გამფორჩესუ, ჰეი!
ქუჯიშენი ჭიჭე კოლხას,
ცინდათ ვამწობირგულაფუ, ჰეი,
დუდის მინმაჩაბახუნა,
ჩალამეფი ბირკულჷ მაფუ, ჰეი!
გუბაზშენი ლაზიკონა
წირღით ქეითაკვენწელესუ, ჰეი,
მარდიანჷ რე გოზიკონა _
სუმარჷ ყებურს მენძელენსუ, ჰეი!
ცოტნეშენი სამარგალოქ
შქვილს ოკონა გითოლენდას, ჰეი,
თუთა, თეში გოვარკალე,
ჯიკშა დუდი გითოლედას, ჰეი!
ზვიადშენი ოდიშისუ
გეიშუღესუ შქაგურჷ-ძვალი, ჰეი,
მითინ ვაიწინს ბოდიშისუ,
შარა ვარე ვაკურცხანი, ჰეი!
გურიშენი ჭიჭონდითუ,
ურიჩონეთ ქუალეფსუ,
მეხეფიში მახინწალო
მეპუნქ ჸურუ სქუალეფსუ, ჰეი!
ხენცფექ ბრელი რაგადუ,
ქანა გეკორაბადუ,
კოჩის ბარჯგო მიოშქვანს,
მარა ხინჯიქ ვაგადვუ,
ინგირი დო რიონჷ შქას,
მოცქულეფცუ მიოშქვანს,
ხვალე თინას ვაკადვუ,
მიდგა ბირგულს მიოშქვანს, ჰეი!
საწმოხონოთ ანთასეფს
ართი სქუა აკათუ,
ანთას მირიპოტუ დო
უჩათ გეგნიკაკათუ,
აკა მა მიჩქჷ ხვალახე
მუშენჷ მეურთჷ ჭაკათუ,
ინგირჷ ხეთუ ვეჭოფე,
ინგირჷ ზღვასუ აკათუ, ჰეი!
სამარგალო ქვინჯი რე,
ლაზიკონა ჯინჯი რე,
ღორონთიშა ოვლარი
შონე _ ჩელა ხინჯი რე,
საქორთუო ტომბა რე,
დო ოთხხოლო კონკა რე,
ჩქინი ლური დო კურცხა _
მინჷ ქექე, მინჷ _ მონკა რე, ჰეი!