ხარხიში გენია
,,ირკოჩ(ი) ფიქრენც, მუ ორთჷნი
შხვა კოჩიში უჯგუშისჷ“
–მუგოშინანთ ერკებულო,
მის–მი მუთუ უჯგუნ თისჷ.
ართგან კათა ვაწუხენცჷ,
დუდ(ი) მეუღუ დიდი ჭკვერო,
ირო ქვარას ალაჯინე,
ქააფუნო ვანი რძღელო;
საქიანო ეიონწყჷმ(უ);
დუც(უ) მეუძჷ ორთუმელო;
გოკურცხუნი, თქუანც ,,–მიბგი,
ართი კვალა, ართი ლელო!..“
მაჟრა ფა რე ნულიშ გიმე,
ხანგეფი დო ლენჩეფიში,
ხაკუცეფი, ხირმიშთეფი
აბრაგი დო ქენჩეფიში.
ათე ფა ოგვაჯე რე,
ირინერი შერეფიში.
მასმა ფა რე ჟი ნორმა,
დიდი უღუ ასა–გასა,
ოკითხუო თის გეუხე,
თელქიანა, თელი მასა.
თე ჟი ნორმა გენია რე,
თელქიანაშ(ი) მარსხებელი,
მარა თენა უფონდიკეს
ვაუჩქ, მი რე მარგებელი;
შხვა უჭკუეთ მიოჩქჷ დო
თვითონ ვა რე სარგებელი.
ნული ნორმა სიბუგე რე
ორსიმინანც ხვათაფალო,–
სადილი დო საკაკალო,
ათენეფი ზეშ–კეკი რე,
მაჯინე რე ზეფირიში,
ჟირპიჯალას გეგაფილი,
იშო–აშო ფეფინიში.
ვაგეგებუ მერთელეფი,
ბოროტი დო კეთილიში,
ვართ(ი) ურაშა მიოთინანც,
ვართ(ი) მინჯე რე ხენდილიში.
გენია ურას დოხენდჷნც,
ბუგა ხენდილც ონტინუანც,
ბუგა შარას გილასჷნცჷ,
გენია შარას გოწურუანც,
ბუგაშ გური ჰოდია რე
გენია პოპორც გონჩურუნცჷ.