ქორძირი დო დოზაფრილც...
ართართ დღახუს ოფუტე აბედათის უტუ მიქას, ღურაშე გინუსკიიდუაფუ დაფოცებულ ცხენს გიმახვენჯი ეკატერინე ჭავჭავაძეშ ალმაჸვენჯი, ჟინოჯის ცირასკუა თამუნია ანჯაფარიხე. თიმ სერით თამუნიაქ უტუს მარდიშ გინაგაფალო მუში ხოლოშიანიშ იოსებ ანჯაფარიაშ ჸუდეს ოსორშო გაგმუნწყუუ. თაქ თამუნიას ჩონგურს ქეგუბირაფუ ნიკოლოზ ბარათაშვილიშ ლერსი, "ოჸუჯე“. პასუხო უტუს ქუბირუ მარგალურ საჸოროფო ლერსი.
ქორძირი დო დოზაფრილც
თელო დაჩხირ ქუმომინტე
სქან გურიში საგურეს
ჭიჭე ადგილი ქუდომიტე!..
ძია ბძირი, კაკა ბძირი
ქილორ ღორონქ ქუმოძირი,
ანწი ჩქიმი ვეჸიქიდა,
ქვერსემიას თე ობირე.
შორც მურიცხო ოხვიჩინა,
ხოლოს გურიშ ვარდი რექ,
უსქანეთი დობღურიდა,
ცოდაშ მეტი მარდის ვექ.
ძია ბძირი, კაკა ბძირი,
ქილორი ღორონთქ ქუმოძირი,
ანწი ჩქიმი ვეჸიქიდა
ქვერსემიას თე ობირე.
ჸოროფა დო ჯიმალობა
ართი შურით ფთასი მა,
თე ქიანას მითინ ვაპუნც
სქან დუდიში ფასი მა.
ძია ბძირი, კაკა ბძირი,
ქილორი ღორონთქ ქუმოძირი.
ანწი ჩქიმი ვეჸიქიდა,
ქვერსემიას თე ობირე.