სი დუგორულეს– ვარექ ღურელი!
გილეცოდილუ რინაშ მაჯინე, ცაშ იშო ხოლო, შხვა ცაშ წვანჯი რე.
ინიკილოთუ გური ოგურეს, ურის გიოხე სქანი ნოქური.
თენთილ რინაშე მუკოსოფილი ჸათე ქიანას ოკო აგურე.
თია–საღალე მიდაიღეს, ჸუჯშა ვალეშქვი, აკოიღეს,
თიბორც თილითი სქანი ოხორე, აკოჩერტილი შხვაში ნოღა რე.
თინჩი ქიგგოდვეს, მოიფოთეს, აჸვავაია მუშენ ვაღვარე.
ნარღმოგვერგვილი სოლე მეულუ, აკუჟვიტუნა სქანი პეული,
თიშ უკულიან მუთა გაძირე, სქან შარა ბონას ვემურც, კანწი რე.
თოთინაფილი უჩა დღალეფი ჩქიმ თოლეფიშა ვალეკვანწინე.
შურიშ რგიალი, რინაშ სოფინი, ირფელ იძირე, დიხა გოთე რე.
ინმოჯინინი ათე ჩხე გური მერეთმოსულათ იშო მოთირე.
თოლნოთე სქანი ქაშაბლიებუ, დო კონწარ ცელი ეშე მოთინე.
თოლფირსილიე, განჯი, გოკურცხი, წანეფც, მეუღუ შური ბანდილი,
სქანი თოხუმი ვემიოდინუა, ამდღა ლანდი რექ თუთაგურელი.
მა დო სი ართო ოკო იპუათ, სი დუგორულეს– ვარექ ღურელი.