საოსუროშ გორუა
ქობკითხესუ მეშარეს:
სოვრეშენო მოურქი?
ფთქვი: ,,ოჭიში მირთენი,
თევრე დუმბარ ზღოურქი.
ბადიდეფი გეხენა
დუდი თირსუ დუთუნი,
,,ახალგაზრდა რექია,
ჭირსიაო მუთუნი?
,,ვარი მაქუ, მუ ჭირსი,
მარა ოსურს მებგორუნქ,
არძას თუთუნ მივარზი,
აბა ხვალე ვენმკორუქ.
ართიქ ზოჯუ: ,,კირცხისუ
მიჩქუნია პაპახე,
ოღალს თიცალს ეჭოფუნს,
სი ნანდულას ვაგაღე.
მაჟრაქ ზოჯუ: ნარაზენს
მიწონებუ თოდუხე,
ონჯუაშა დოშუნსუ,
ოჭმარეშე დოთუხე.
მასმაქ თუთუნ დოჯვარზუ,
,,მუხურშე პუნს ნათესე,
გვარო ცირდა რენია,
ღვინს მიკიღანს ხათეშე.
მანთხაქ ხელეფ გოფაჩ დო,
,,აფშხირენსუ ნერჩისუ,
ხარჩილახე ობუჯშე,
ვადინუანს ფერჩვისუ.
მახვთაქ ბრელი ლაბაშუ,
მამშვაქ ხოლო მუთაგა,
ვორწყექ შუშა ქუმურსუ,
ელაშუშუ მურთაგა.
,,დორო იბდათიავა,
ორთუმელო თქუანა,
ბადიდეფი ხენა დო,
თუთუმს უფათქუანა.