სამარგალო, მარგალი
მიჸორცჷ სქვამი ოზე–კარი –
ბაიაშ ეშაქარგილი,
დიდ მაღაზა, ოკარიე,
ხულა, ჭიჭე ჯარგვალი.
ჯგირი ჸვანა დო ორტვინი,
ლატი გიშაბარგალი,
აგაფა დო ბარი, ბერგი,
საჯენი დო ფარგალი.
მიჸორცჷ ლანჭა დო ყებური,
ჩუანიში გვარგვალი,
ღუმუ, ხორცი, ხაჭაპური –
"სტოლიშ" გილახარგალი.
მუ ჯგირი რე ორკოლიშე
ღვინიშ გინოკარკალი,
ელარჯიში გეჸუნაფა,
ყებურცჷ ეკოღვარკალი...
სუმშა მიღი ათე დოზა,
უკულ გილეხარგალი!...
თეჯგურა რე სამარგალო,
ათენა რე მარგალი!