სავეკუო
სავეკუოშ გვალას ვორდი, მიფერუანდ ზღვაში ჰავა,
ირდიხასი ეკოპუნსი, შურობუმუ, სკანი ხვამა.
სკან ჸოროფა ქუთქუალუ ლერსო* ბადა ვეკუას,
ვადარინედ უსკანეთ დო მითინქ ვამუეფუასი…
სუმონეჩდომაჟრა წანას სავეკუო მიბლია,
ბწანსი, ჟიშე დოფხვამანდუ დიაკონი ილია,
ხიოლითი ცას ონჭუდუ ბადაშ ბოში ვასიკო,
ქიანას ბრელ დაკორდუდუ, სავეკუო ვარდიკო.
უცხო კათაშ ეკულა მარჭიხოლეფს გუკვირდეს,
ვეკუეფ ჸოფენანია დო უკულ იღურჭულუდეს,
ცას კამარას ორთუდეს დო ბუდეს გალაჸაფუდეს,
ოდაბადეს ცა ქუდო დო დიხა ჩაფლათ მაფუდეს.
წინაპრეფიშ საძვალეს ვებერთელა ცაცხვი ბძირი,
ხუთოშ წანელა რენია, თექ იხვამანდ ჩქიმი ძირი,
ვეკუა რეზოშ დოხორეშე ჩქინ ნოხორეს ქგვოჯინი,
გურსუ თინა მოჰამუდუ, ვორდი ოდაბადესინი…
მუშ ჸუდეს თამადალა ქოფთხუ შაქრო ვეკუაქ,
დინვოჯინ დო ქეშმაშინუ ვაჟაშ გერი ტოტიაქ,
მთელ დუნიას მიჩინენა ჩქი ილიაშ ნაჭარათ,
თუთას ხოლო ქელვანჭითი თიში მათემატიკათ…
კოჩარალეფიშ მანჯღვერ-ხუტა ვეკუა ჯიმა მაფ,
გურკაშ შთამომავალ ორე, გურკაშ შინას გალუაფ,
ელარინაშ უმუშო ნამთინ საქმე ვეუაფ,
გვარიშ საქმეს საწმოხონოს** ანგელოზეფ გალუაფ…
სავეკუო მევოტეთ დო მოჭირუნა მერეთი,
იჭუანდუ თეშენ გურსუ ჩქინ ვეკუა მელენტი,
ართი მაფუ უსქანეთ, შურობუმუ, სერ დო დღაში,
ეთმეირძანდუ სანთელს ირო, სი, ვეკუა ტატაში.
ართიანიშ მეჸუნათი გვარი ვოკურთხაფუათ,
თე საქმესი აჩქარება ვაფქიმინათ, ვაფთქუათ,
წმინდა გიორგიშ ლაშქარსი ყამა ირო იფრქუათ,
ეშმაკი დო მაზაკვალს კარი გეგნუკილუათ…
ვემვოტუათ სავეკუო, გვარქ ართო იბკათათ,
ოდაბადეს დუვართათ სანთლ-საკმელიშ შარათ,
მტერს მტერულო დოფხვადათ წმინდა გიორგიშ ხვამათ,
ღორონთიში ჭყოლოფუათ იფხვამათ დო იმრავლათ…
- ლერსო-ლექსად
- საწმოხონო – სასარგებლო