საახალწანო (გიორგი ხულორდავა)
ქიშულებუნო თე წანას
უშარ შარეფი კვათასჷ?
მუშ თია ვადუზარუას
არძა შქირენულ კათასჷ?
ფირქენქ დო მორსხას შხვა გარზენს,
კოჩი კოჩიში მენდი რე,
თი არზი ვაგოსვანჯუანს,
ართ დღასჷ ოკო მედინენ.
თაშ რე ორინჯე, თე ანდა
ცოდაშ ოზალუ გორუა,
ჩქინ ნასოფა დო ნახანდას
მუშ წყითეს მიშმუწყორუანს.
მეურს ბორჯი დო ითებუ,
იკილოთ გური ნახაში,
მარა იშენთჷ ხიოლ რე
მაკუჩხურ ახალ წანაში.
2014წ. 29.ქირსეთუთა