ჟირ ძღაბი
დინი დინი ტობაშა, ნანა ჩქიმიშ ქორაშა
ჟირ ძღაბ ქოჸოფე. თელო უმინჯური რდეს. ლაზუტის ბარგუნდესინ თეშ ართ გვერი ქოძირეს. დიდ ძღაბის აშქურინუ დო ინტუ. ჭიჭექ გვერის ბერგი ართ ქოგიაშქუ, გვერქ ბოშო გინირთუ. ჭიჭე ძღაბი გეჭოფუ.
თენეფს ჟირ ბაღანაქ გეურჩქინდეს. ბაღანეფ ჯგირო არდუნა. დიდ ძღაბი მითინქ ვე ჭოფუ. ჭიჭეშ ონჯარუდუ: “თის ქომონჯი დო ბაღანეფ ქოჸუნს, მა შურო მითინ ვა მიჸუნს”ია იჩიებუდუ.
ართ დღას ჟირხოლოქ ოქუმშა იდეს. ოქუმწკალა არ ტობა რდუ. დიდ ძღაბიქ: “თე ტობას მუ დიდ ჩხომეფ რე”ია თქუ. ჭიჭექ: “აკა ქობძირა”ვა დო მიკაჯინუნ. დიდ ძღაბიქ ოჭიშის ეკუჯიკუ დო ჭიჭე ძღაბი ტობას ქინარაგუ. ჭიჭე ძღაბი იშქვიდუდუნ თეშ ართ დიდ ჩხომქ გერჸინტუ.
დიდ ძღაბიქ ჸუდეშა ხვალე ქომორთუ. ბოშ ბაღანაქ: “ნანა სო რე?”ია კითხუ. დიდ ძღაბიქ: “სქან ნანაქ დიშქვიდუ, ანწი სქან ნანა მა ვორექ, ნანა მა დომიძახი”ია უწუ.
ბაღანაქ ინგარუ, ინგარუ დო ქოდარულუ. ართ ბადიდ კოჩიქ ქოგიაძირუ. ბადიდიქ ნანა მუშის მუქ აღოლუნ ქუწუ. ბაღანაქ ოჭკომალ გეჭოფუ დო ტობაშა მიდართუ. ოჭკომალეფს ტობას თითო-თითოთ დინმაჸოთანს დო “დინი დინი ტობაშა, ნანა ჩქიმიშ ქორაშა”ვა რაგადანს.
თაშ ირ დღას გილურს, ოჭკომალს ტობას დინმარღვანს დო “დინი დინი ტობაშა, ნანა ჩქიმიშ ქორაშა”ვა იჩიებუ. მუშ ბაბაქ გიჩაკვირუ: “ბაღანა მუს იქჸნსია”ვა დო ართ დღას ბაღანას კითხუ: “სი თაშ მოთ იქჸნქ?”ია. ბაღანაქ: “ჩქიმ ნანას ოჭკომალს დინმურღვანქ”ია უწუ. კოჩიქ: “ანწი სქან ნანა იჸინო? სი ბაღანა ვა რექ, თეჯგურა მუთუნ ანწ ვა ქიმინა, ჩქი ვა მოპწონან”ია უწუ. ბაღანაქ: “ექ ართ დიდ ჩხომ რე, ეთინა ომიჭოფიდა მეტშა ვა ფქიმინუნქ”ია უწუ.
კოჩიქ ბაღანაშ ხათრიშ გურიშენ ტობაშა მიდართუ. დიდ ჩხომი ოჭოფუ დო ბაღანას ქომუღუ. ბაღანაქ ჩხომი ოკოხარუ დო მუშ ნანა გაგმიჸონუ. არძოს ახიოლუ. დიდ ძღაბი ყ’უდეშე გეგნორაჸეს. თიშ უკულ შხვა დარდი ვა შიბუნა.