პილაშ ცხენი
პილას ცხენქი დუღურუ დო
აწ მუჭო რე აპირენს,
ხუთი დღაშა მახალ ცხენს
ახუთიშა აქირენს.
პილას თექ აღოლუნი,
ათენა რე მაკვირენს...
ართ დღას ქუქირებუდ
ჩქინ ანტიფა გვათუას.
ნოქალაქშა ქემერთუ დო
შარა ოკო ათუას,
ცხენქ ულას გეურკუ დო
კუდელს ქემუქვათუანს.
ანტიფა:
-ბინაშა ძიუთ ქემებრთი დო
აწმუჸოთა ნაცალა,
ჸუჯეფ გეგლუჸოთამუ დო
ბორკეფ ქუუცანცალანს,
მუქ აღოლუნ, ვემებხვადი,
ქუმოშქურუ მა ძალამს,
ვადოღურას ე ოხერქ,
მეულა ქუდუმაცალას...
საქმე ჯგირო ვემიშუნი,
ხეთე ულას გივანწყი დო
აქ მშვიდობა დიიბჩინი.
გოჭკადილშა ქუმოვრთინი,
ქუორწყექ დიიბჭვინი,
ბრელს ქუგუგონებუდუ,
ხე ბირგულშა გიიბშქვინი.
პილა:
-დომჸვილიო ჩქიმი "ხაზნა"
ჩქიმ ფარაში მაჭკადალი,
მოჯგირე ვარ სი ჸოფექ
ჩქიმ ოჯახიშ მაჭყვადალი...
უცხენეთ მა ვებრგუქ,
მუჟამსი რექ მაგაფალი...
ჯაკელასი გეგიჭოფ
რაგადანს თაში დიიბჭვინი,
ხოლო მუთ მუგახუჯენ-
ოჯახის გიიჯინი.
ანტიფა:
-პილა, ჯაკელ შხვაში რე დო
ხე მობკიდათ ხოლო ჩქიმს,
ართი ჩხუ ქოპუნს, მარა
სიმინდი ხოლო ქომიჭირს,
შურო ქიმენდებუქუ და,
გინოგიგა დამორჩილს,
ი დროს მათი ქოგიჸიდე
თიცალი ცხენს ტანმორჩილს.
პილა:
-ვეგენდე, მუ შარა რე,
გვალო ვადგეგვიანას,
იცალ ცხენი, მა ვფიქრენქ,
ვაგაშიი ქიანას...
ირ დიხას თის ძირუნდი
ოგარსუ დო დიარას,
კუჩხი ქელაბტახუდუკო,
თინა გოთხინ თი მარას.