ოთხი გაღიერი მაჸალე დო მაჯინი
რდჷ ართი კუ, ნამუსჷთ ჸუდე წყარმალშა აფუდჷ ენოკეთებული. თე წყარმალშე ვართ ეფერი შორს რდჷ ომანე, სოდეთ ართი მეჩხვერე ჭუკი მილარედჷ. თინეფიშ გოხოლუას, წყარმალიშ ძგას, მიარე ჯალეფშე ართ-ართის ყვარია ამახორანდჷ. თე კუ, ჭუკი დო ყვარია ჯგირი მაჸალეეფი ორდეს ართიანიშ. ირი დღას, სუმხოლო, წყარმალიშ ძგას აკმოხვადუდეს ართიანს დო ლაჸაფენდეს. დუც ირო ჯგირო ეთმირთუანდეს.
ართი დღას, მუჟამც წყარმალიშ პიც ეკოლაჸაფენდესინ, მუდგარენი ოშქურანჯი ხონარქ ქელასიმეს. თინერი პიჯი ურჩქუდჷ, მიდგარენი მუნეფიშ ჸურე მირულედუკო შურ-შურაითინ. თინა მაჯინკოჩო მირჩქინეს დო მაჸალეეფქ გიტყობეს ჰალამო. კუქ წყარმალიშ ტომბაშა ქინწყუ დუდი. ყვარიაქ, მუში ჸუდეშა მიდაფურინჷ, ჯალონშა. მეჩხვერე ჭუკიქ, ომანეშა ქიჸოთჷ დუდი აჭი დო გაჭით. მაჸალეეფი წიაკალო მუნეფიშ ჸუდეეფშე კილმეჯინედეს თიშ მიოხვამილაფარო, სოლე მიშჷ დო მუ რდჷ თე ხონარინ. შური გეშეკაშეს მუჟამცჷთ ქოძირეს, ნამდა თინა ჯინორი ვა ჸოფენ. თენა რდჷ ართი ერემი, ნამუთ შურს მაჸათანდჷ რგილი წყარიშ ოშუმუშან. კუქ, ჭუკიქ დო ყვარიაქ გაკილართეს მუნეფიშ ჸუდეეფშე ერემიშ აკახვამილაფუშა. მეწონეს თინეფს თე ერემქ დო დემაჸალუეს თინა. თაში ნამდა, სუმ მაჸალექ ოთხო გინირთჷ. თე ოთხი მაჸალეეფი, ირი დღას აგინძორენდეს წყარმალპიც აკოხვალამას დო ლაჸაფის. თაში იგინძორებუდჷ თენა მუსხი რენი თუთას.
ართი დღას, ბჟა ცაშ წვანც მუკახედჷ, მარა ერემს დიო ხოლო ვა მოურთუმუდჷ წყარმალპიჯიშა, ოლაჸაფუშა. შხვა მაჸალეეფი წყარმალპიც ეკოხედეს დო თე ერემშე ჯაბენდეს. თინეფქ გეგნოჭყვიდეს ყვარია მიდუფურინუაფუდესკო ტყაშ გალებუშა, ერემიშ ოგორუშან. ყვარია ედომშამ ტყას გილაფურინუნდჷ დო გორუნდჷ მუშ მაჸალეს, ერემს. ბოლოს, თოლი ქომუკინდუ ერემს, ნამუთ მაჯინიშ მოსას ქომიშახართელედჷ დო დიხას აშაჯანუდჷნ. ერემს მაჸალეშ ძირაფაქ შური მოუდგჷ. ყვარიაქ ერემს უწუ ვა დოშქურინაფედუკონ. პიჯალა ქომეჩჷ თის, ნამდა მალას, შხვა ჟირი მაჸალეეფწკუმა ართო დირთუდჷნ. ყვარიაქ ნჭუაფილო მიდაფურინჷ დოსქილადირ მაჸალეეფშა დო ქომაშინჷ თინეფს ერემიშ უბადოს მიშალაფაშ ამბე. ჭუკიქ ჰალამო ყვარიაშ ოჭიშის ქამასხაპჷ. ქოგაკირჷ თის ჯგირო დო მიდაფურინეს. კუ უკახალე ეკოჸუნდჷ თინეფს თუდო, გითოჸუნელო. ერემს ძალამქ ახიოლჷ ოთხოლო მაჸალეშ ძირაფაქ. დეპიჯეს თის, ნამდა გეგშირსხენდეს თე ჭიროთიშენ. სონდარო ერემს ადუდიშალენდესინ, ხონარქ ქელასიმეს მაჯინკოჩიშიქ, ნამუთ რულა-რულაიათ მინჭუაფუდჷ მუნეფჸურენ. ჭუკიქ ხათე გეგნოხვატჷ მოსა, გონწყჷ დო ერემქ ხათე გეშასხაპჷ თევრე. ერემქ, ჭუკიქ დო ყვარიაქ იინტჷ. სანარღოთ, კუ ვა რდჷ ინეფცალი ნჭაფიერი დო ქეკოსქიდჷ უკახალე. მაჯინკოჩი გარღვინჯებული რდჷ ერემქ ენტუნ თიშენ. მუჟამც კუ ქოძირუნ, გეგნოჭყვიდჷ თიშა გინუგაფუაფუდჷკო ერემიშ გამათ. მენოტყელექ უკახალე ქეკისქუ თინა დო ქოგიოთინჷ ჸუდეშა. ყვარია, ჭუკი დო ერემი, თავრე კუშ გიშარსხაშ შარეფს სხუნუნდეს.
შურ-შურაიათ ირულეს თინეფქ საროტეფით დო ჯინორს წოხოლეშე აწოულუეს. ერემქ საროტის ქოგილენჯირჷ დო დუდი ღურელო ქომითონუ. ყვარიაქ ერემიშ ასა-გასაშ ცვანგუა ქოდიჭყჷ, დასურო ღურელი ორდუკო თინან, თეშ. ჭუკი შურუბუმუო, გოხოლუას, ბართვის მითოტყობუდჷ. მაჯინკოჩიქ შარას ერემი ქოგილახვილუნ, ახიოლჷ ძამქ. ქოდაჸათჷ ბაწარია, ნამუდგათ კუ აფუდჷ ეკოსქუაფილინ დო ინჭუ ერემშა. ჭუკიქ ნჭუაფილო გაგითოსხაპჷ ბართვიშე, მეხვატჷ ბაწარია დო გადუდიშალჷ კუ. კუქ შური უქალუო გეგმისიონტჷ წყარმალშა დო გონჩურჷ ჸუდეშა. მუჭოთ ვარდუო ჯინორქ ერემს ქომიახოლუნ, გესოფჷ ეშე დო მუში გინძე წირღვეფით აჭი დო გაჭითჷ ირულჷ. იინტჷ თაშნეშე ყვარიაქჷთ. მეფურინუნდჷ თისხით, მუსხით მუში ფსუალეფშა დარქიებედუნ. ჯინორქ ქომეხვადჷ ნამდა მიღორუნ. გითაჸუნჷ დო ნარღით ეფშაქ ჸუდეშა მიდართჷ ხეჩოლერო. ოთხი მაჸალექ წყარმალპიც აკოხვადჷ ართიანს, მუჟამცჷთ ირნერ შქურინქ მუკილუნ. დიდო ბედინერეფი ორდეს კინი ართო აკიშაყარესინ. „რინა ჰამო რე, ირნერ უბადობაშ უმკუჯინუო, თიშო, მისით ჯგირი მაჸალეეფი ჸუნს მუში ალმარენჯონ“ თქუ კუქ. არძოქ ხუჯი ქიმეჩჷ თე ნარაგადის დო ინჭუეს ოლაჸაფუშა.