ნანაშ ნინა (ლუარა ბიგვავა)
მარგალქ დღას ვემიჸოთა
მარგალურიშ ყუმენი
მუდა ანთას წანეფიშე
გემოძახანს შუმერი.
აზრო დღას ვედეკინა
სკანდა მა შხვა იბსხუნენი
სკანით - ჩქიმი ნანაშ ნინა
მოკო ჯგირო დიბშუმენი.
ლასირელი მარგალურით
ღირსი რექი გოცქუენი,
უმინჯური სი ვარექჷ
მოკო თენა ქოიწუენი.
წელქ ვეჲაჭოფჷ, სკან მარკინეს
სოიშა მა ვემგოტუენი,
მარგალურო გიჭარუ ლერსის
შურ დო გურ ველგოჭუენი
არძო ზიტყვას დობშაყარა,
ნება ვამიღ დობჩუენი.
მარგალიტეფს ლერსით გებჭაჭჷ
ვადინე დო ვაცუენი.
ანწი ვარა ქორე თი დრო
ჩქიმ ზისხირსჷ ქოფუენი
სკან ნინათჷ ქიბიბრე დო
ორაგადე ქობთქუენი.
დიდაშ კიდირიცალო ჰამო
მარგალური ნანაშ ნინათ
ართშა ქიმეიფერუენი,
ხვალე თეშა ქომღირ რინა.