მუ ჯგირი რე სამარგალო!
მუ ჯგირი რე სამარგალოშ მერეკელა თუთარჩელა,
ოჭმარეში ბჟაშ ჩხორია, სელეგინი ღუმუ ჩელა,
შხვიშხვინაფილი კოკუჩი ნეძიშ ბაჟას დინონწყილი,
ართ ყურწუა ჭაჭაშ ონტკა, ორკოლითი უჩა ღვინი.
მაფშალიაშ ღურჭული დო ზესქვეფიში ჭურჭულუა,
ბოშეფიში ბურჩინი დო ძღაბეფიში ტკარჩალუა,
ჯა ჸურძენით დოყვაყვილი, ცა მურიცხით მოჭკვაჭკვილი,
ოსურეფი, ქომოლეფი, სამაყაროთ მოკვანწილი.
რიონიში ზუნთხი, ღლამი, ტეხირიში კალმახეფი,
ლიმონი დო ფორთოხალი გვიან ბშინე გამაღეთი,
მენჯისი დო ლებარდესი ნამუ უჯგუ თითო ცალო?
დოცუმილი მიდურქი დო კინ ირთუქი ჸილოცალო.
მუ სკვამი რე თიში ნინა სირმაშ ძაფით ეკნაბინა,
თე ნინაშა რაგადანდუ ჯვეში რომი დო ათინა.
მუ ჯგირი რე თიში „კუჩხა“, „ჩელა“, „ძაბრა“, „ოდოია“,
ჸვანას ბერგით მოველირით გუჯუია, გიგოია.
დიდაშ ხეში ფუჩონაფა, მუმაშ თოლით გოჭყორინი.
გიჸორდანი სამარგალო, დღას ვეფირქათ შხვადო რინი.