მოჯგირალა
1. მოჯგირალა მის გოკონან, მუგოშინანთ, მარჩქილითი:
მოჯგირალა ირო ჸოფე კოჩიშოთი დიდი ნიბთი!...
სამოჯგიროთ მით გოკონან, ირ ნერო გასინჯითი, –
ვარა ანთას რჸუნან გიჩქუნ, მოჯგირელე ხვალე ვითი...
2. მუჭორე ურაჸუანთი, მიკვე მა, მოჯგირალასი!...
მოჯგირეს ჸოროფილიშო ხურგჷ ვაუღუ ნინალასი...
მოჯგირეში ოსხუნული მუთუნჷ ვარე ქიჸანასი...
ფუ მოჯგირეს, – მოჯგირეშენჷ მიქ ტყვიას ვეწაზადასი!
3. მოჯგირე დო ჯგირი ჯიმა ჟირი ხოლო მანგი რე...
ჟირხოლოქჷთჷ დუდჷ იჸვილე, არიჷანშ ვაგითირე –
მოჯგირეში მოსახვარეთ დუდითი ქუდიგირე –
მოჯგირეთით თინა ირგუ, ათეცალი მითირე!
4. მოჯგირალა ის ვაჯოხო, ნინათ უხურთქოლუე...
ღვას, თოლეფს დო პის აჯუდე, დუს ხე უფუჩონუე...
მოჯგირეს, მოჯგირექი დუდჷ ოკო ქუგულუე:
სი ჯოჯოხეთის ქენოლე დო ინა ოჩხონუე!!
5. მოჯგირალა თაში ოკონ, ფიფქრენქ, თქვათ ვათქუათ ვარი...
მარა ესი შურო ვაგუ მოჯგირალა ამუდღარი...
ასეიან მოჯგირალა ირი ნერო სამანცარი:
ვართ ხორცი, ვართი ჩხომი, ვართ ღვინი რე, ვართი წყარი!
6. მოჯგირეს ვახვიდ ღალატი, განი, ფერდი მოჯგირეშე...
მოჯგირალა დო ჸოროფა დოჩინელი რე ქრისტეშე!
გარზე მოჯგირეშჷ მენდულქი დუდი ოკო ინუგეშე...
მოჯგირექი მოჯგირალა დღასით ოკო ვად ჯვეშე.
7. ბოლოს ბთქუათ, გინოფთარგმათ რუსთაველიში დჷნაჩინა:
სუმ ნერი ლე მოჯგირეშე მოჯგირალაშ გჷმორჩქინა:
სიშორაში სიმონკა დო ირო ხოლოს თოლსი ჯინა...
მეჩამა დო ვარ სიხარბე, ირო ჩუქებაშჷ გოძინა...
თიშო ღურა დო დინაფა, თიშოთ შარას გილარინა!