მოსკოვს ართი ფაცხა ბძირი
მოსკოვს ართი ფაცხა ბძირი,
სახელი ჯოხოდ ლაკადა,
მინიბლი დო გიბჯინიო
სიმართლეს ბრაგადა
სამარგალოშ ოცქვაფურს
ქორაგადანდ თამადა.
კიდას ნაბადი ქიმკობუდუ,
ველუნდ ბაბუში ლეკური,
კუნთხუს ოჭნახ ქიკნოდგუდუ,
შქას ლაგვანი მეფური.
თეურე ხერკეთ ქეშმუღუდეს
ნოშქერჯგუა ადესა,
უხვამუო ვეტენდეს
მოჯგირე დო ნათესეს.
წკირს მოგაფილი თუ დო ქოთომი
შხურშხინუნდუ მარგალურო,
კუმაქ თოლს ქუმომფერუ,
გურქ მიდამირთ უჭკომურო...
ხომლა ჸვალი დო კუპატეფი
იწონუანდ დუსუ ცხვინს,
ლაკადური ჭითა ზაფანა
იშო გეითორჭუნდუ ჩხვინს.
სუფრას თეში ამშვენენდ
მარგალური სადილი,
- ლეჭკერე დაძმარებული
დო ჯგირი ლებია ზადილი,
ელარჯი, საცივი, ჭვიშტარი
დო ჯგირი ლებია ზადილი,
ელარჯი, ჯგირი დოგაფილი,
შხურშხინაფილი თუში ხორცი,
თინა ჸომურს გეწაწაფილი.
კიციში ჩხე- ჩხე ხაჭაპურეფი
მილმანდღულუდ თეში პის...
მარგალჯგუა პიჯიშ გემო
შურო ქუღუნო მითინს.
მუშ მასქვამათ იბირდეს
ფაცხა მიორს მარგალური
ქუგუგალეთ მარგალეფი,
მუჭო გამიხარით გური
მომეწონ ლაკადაქ ,
ირფელ ჯგირი დო ირფელ სქვამი,
ფთქვი- ჯგირი საქმე აკეთი დო
სო გოკონი თექ იხვამი.""
გურით რხვმანთ, გეხარით,
თქვანი ჭიჭე ოხორეთ.
მართალო მუთ ჯგირი ვორეთჷნ,
ჩქი მარგალეფი ვორეთ...