მომქიონუ სისმარეფქუ
მომქიონუ სისმარეფქუ.
ჩქიმ მანგიორ სი ვარექუ.
გონჯამილი ხიბა რექუ,
შარეფც აკმაჭიფარენქუ.
სი სოთინი ვადოსქიდუქ
ხვალახობა მიკილეკუ.
დიო იშო ვაგალინე,
აშო მორთას იქილექუ.
ნამუს ოკო მიკაჩირთე
ორეკეშეფჲ მიკერეკუ.
ოხვამე რე, ნაოხვამუ,
ნოღა რე დო ნანოღუე,
ბრელი ქვარას დითმიტალენც,
ბრელსჷთ დიდა ვანოხუე.
სი აკა რდი დო ვართ ჟირი,
სი ფალი დო სი ვაჟღირი.
რინას ირო გიწენტებუქ,
ნასქირონა, ნახიხილა,
ტანი დჷნცხჷშფერი გაფუ
შური თუთაშ ნახვიხვილა.
მინ ფურინჯო ერჩქინელე,
მინი დიხას გილეხოხუ.
მუზმა წანა კუმა ჸოფე,
ეშე-ეშე მიგიროხუ,
პეულც რული გოუტირხუ,
დიხას ხოლო გოუდირხუ.
ჭარას ჩქიმდე მუშ ოჭიში
ართ დღას იშენ გოუდირკუ.
თაქჷ რდე დო მელე რდენი,
ეკირთე დო ელერთენი.
ეკაულარც ეკაჸუნე,
ირ განც სოდეთ ელერთენი.
თოლი თოლო ვანორთუე,
ბორჯი რინას ვანორდუე.
ჭვემა, ჭვემა ვაჸოფე დო
თირი თირო ვანოთუე.
ოდიარე ეცალირი,
შური, შურეფც მეცარილი,
ირიათონს ჩქიმი რინა
სუნჯიშორო მეცვარილი.