მიჸორქ (შადორ პეტეფი)
მიჸორქ დო მიჸორქ, მუჭოთ
მეურს ბორჯი დო შვანი,
ხოლო უმოსო მიჸორს
სქანი შხვართალა ტანი.
სკან კიროკილი თუმა,
თოლეფი გიშერიში,
ღვანწკეფი ყანავათი
ჭყონტორო ვარდეფიში.
სქანი ჭვიჭვალი სახე,
სქანი ხელეფი სკვამი,
მა ოკო მიკებუდას
ბროლიშ კითეფი სკანი.
მა სი თინერო მიჸორქ,
ვამარაგადე ნინათ,
კარკაცი მიჸორს სკანი
ირზაფებუქუნ თინათ.
სკანი გოძიცა ართი,
ანათენს უკუმელას
მოწყენა ორუმუანს,
უმუნაფ თუთარჩელას.
მიჸორქ, მიჸორქ დო თაში
მეჸოროფებუქ ირო,
უსკანეთ თე ქიანა
მუთუნი ვარე ჩქიმო.
სიზმარო სი გიძახუქ
დო ცხადო სკანდე ვფირქენქ,
ჩქიმი დიდებაქ, სახელქ
სი ქუგუგალუ ირფელქ.
შემილებ სქანგურშენი
ირფერს ევოღე ხენი,
ჩქიმო მუთუნი ვარე
სი ვეშერწირენ ფერი.
სკანი წუხებათ ვწუხენქ,
სკანი ხიოლით ვხარენქ,
მა მუს ვინარტენქ მეტის, -
სკანი ჸოროფას ხვალე.
სკან აკაბუცხა წყენას
ჯაბება მოჸუნს ბრელი,
ჩილამურეფი ჩქიმი
ჭვემათ რე გინორთელი.
მიჸორქ, თინერო მიჸორქ,
თინერო გოლვაფირო,
მუჭოთ მითინი მითინს
ვაჸოროფებუ დიო.
მიჸორქ, ირნერო მიჸორქ
შილებე თაშით ვთქუათ:
მა ჯიმათ ვორექ სკანი
ჸოროფილით დო სკუათ.
ჩქიმ წირდე შურიშ ცირა
ჩქიმი თოლსინთე ჩილი,
სი ჩქიმ დათ რექ დო დიდათ,
სი ირფელი რექ ჩქიმი.
ჸოროფაშენი ბოლოს
ჯილდო ქორე-და, ართის,
თინა სი რხვადუ ხვალე
დო სი გინჲოგანქ მარდის.
ნერგის მით დარგუანსუნ
ნაჸოფის თინა გურე,
მარდი სი, თიშენ ნამდა
ჸოროფა ქუდმოგურე!