მიჸორქ (გიგა ქავთარაძე)
მუშ მადიდას მოხიოლუ რინა,
მიჸორქუ დო ვა მიჩქ, მუ ფქიმინა!
ხიოლით მაფ ეფშაფილი გური,
ირკოჩ მიჸორს, გოკონ ორდან ფური.
სკან სისკვამე, სკან თოლეფიშ ჯინა
მოხიოლ დო მათოფურუ ნინა.
ოზეს გემჩანს ვარდინ, ეთინა რექ,
ჩქიმ გურფალირს ულუანქ დო გარექ.
სკან გოძიცა მიფერუანს ჸვასუ,
სისკვამეშე ონირზუქუ ბჟასუ.
გოლოფა დღას პეულიშ რექ სუნჯი,
სკანდა მალუს, ჩქიმ გურს კარი გუნჯი.
ქარწიბშორო გიჭვიჭვანსუ ღვალეფ,
გოლოფა დღას ვაისკირუ ღალეფ.
იძიცანქინ გახოს ირფელ ფალუნს,
ფსკა პეულშე თოფურს გითმოჭვალუნს.
მა სკან გურიშ გოლვაფირი ცირა,
სკან ჸოროფაქ დუმოჭყაფუ ბირა.
ათე შურიშ ორტვინს დინომხექუ,
ბუძგურიეფ გამწოფაშქუ ხექუ.
გიჯინექ დო მოხიოლუ რინა
მიჸორქუ დო ვა მიჩქ, მუ ფქიმინა!