მა დო სერი(გიორგი შენგელია)
ასე მუჟამს თეს ვჭარუნქუნ, შქა სერ იჭუ ართო ნდღულუ
სასინთოშე მასქური ირქენს, რზენიშ არიკ ვამაფულუ.
ან დო განსჷ ვაჩარცხინე შქართუნ თუთაშ მუნნაფინა
ორკეშ ვარდი მიკივალუ მასკურიში ნაშქურინა.
ტორონჯიშფერ სიმეტეფით ცა თეში რე გოლებირი
თეში რე გოფშა ართო გძნობათ მუჭოთ რითმათ თე წერილი.
ნაფულ სინთე დო ცა ფართო დუდ ბოლოშა მოლებური
მოწაწილ რე ჯგირობუათ, მუჭოთ ამსერ ჩქიმი გური.
ბრელ ხანი რე თე ნაფული გურს მა ტომბათ ალამტყობუ
მითინს თის ვაგუაგენქ ვართ მასკურსუ მიატყობუ
მუ უჩქუნა ჩქიმ მაჸალეფს გურს მუ ნარღი ალაპანჯუ
მუ დინორსხუ დინახალე სადღემუშოთ ალამსვანჯუ
მითინს თიშა ვეგიაგორე უჩა გურიშ ნასხუნაშა
ვართ ოსურშა გუმანდვინე ჩქიმ ნაჸოროფ ნაჯუნაშა
ვართ ლურენჯო მეკუსაფას ვართ თის ნამუს ქეკუოდინი
მითინს თინა ვენდაღინე გურს მუთ ტომბას ქინობდვინი
უდურულაფ სერიშ ბორჯიშ ორკეშ სერ ჩქუ მუშ მარჩია
ხვალე თის უჩქ ჩქიმ ნაფული ხვალე სერსჷ კაკაჩიას
უჩქუ ომბოლო მუჭო დოფსკიდ, მუჭო ვორდი ფელეკერი
ჩქი ჟირი ვორეთ თე ქიანას მა დო სერი, მა დო სერი.