მაფშალიაქ ვაღურას
მაფშალიაშა მუში ჰამო ბირა მითინცჷ დო მუთუნცჷ ვემდაღინე. ,,მაფშალია" ხვალე ჰამო ნინაშა მაბირე ფშალონიში მახვენჯი ჩიტი ვარე. ,,მაფშალია" ჯოხო მარგალური ჰამო ნინასჷ. ადამიში ნინასჷ ნამუთი ოკეანე რე უშულიებუ, მუში ზიტყვეფიში სიბრელეთჷ დო სიფარსაკეთჷ. მითაჟამიში ჭყონიში ჯასჷ წვანდისჷ წჷმოხე მაფშალია დო ღურჭულანცჷ, მუში ჰამო ნინათჷ ურაგადჷ მუშ-მუში ნინაშა ირი შურდგჷმას დო შურუდგჷმუს.
ელეხჷშე დო მელეხჷშე, ბჟაეიოლჷ დო ბჟადალჷშე, ომუნე დო ობჟათეშე ქარ-ბორია ინქილუუ. ჭარკინტია იკვარკვანტჷ. ირფელი ართო იხუმინჷ დო იჭუმინჷ: გაგვარგვასჷნა, გაკიონტჷნა, გაზუმინჷნა დო გაგუმინჷნა ჯვეში ჯინჯმანგარი დიდი ჭყონცჷ დო თიში წვანდიში გიმმახვენჯი ჰამო ნინაშა მაბირე მაფშალიასჷ: ოკონა გამასოფანჷ ართიანცჷ დო თელო დოუთხინუანჷ მუშ-მუში შური. მარა ვართი ართიშა აღოლესჷ მუთუნქჷ დო ვართჷ მაჟიაშა. ჭყონქჷ ვეკართინესჷ დო ვეშაბულეკეესჷ, მაფშალიაქჷ ვეიაფურინესჷ.
ორწყე მაფშალია, მუსჷ გაქინძუუნა დო უკინწოლუანანი, მარა მუში ჰამო ბირასჷ ვათხუუ, ხოლო უმოსო უძინანაცჷ დო გინაფულენცჷ მუჭო, თე ხონარითჷ ხარენა ქიანაში არძო პატიოსანი, წესიერი, სინდისიერი დო კეთილი გურიშ მინჯელეფი, ჭიჭელეფი დო კაბეტეფი. თეშინერეფცჷ მუ გჷმალიენცჷ თე ქიანასჷ დო თინეფიში ხიოლითჷ, ალარინათჷ დო გურიში გამანგარებათჷ ხარენცჷ მაფშალია.
მარა მუ ოხვარჷნა ნამჷთინე შურიკუნტა, უგურე, უშურე, უჭკუე, გურუბადო დო შურბოროტი ვათანძარეფცჷ. ნამჷნეფცჷთი გურცუ უწყუნუანცჷ, ტვინცჷ უფუნუანცჷ დო შურცჷ უხუნუანცჷ თე მაფშალიაში უჰამაში ნინა დო მიანჭუაფუნა თიშა, ნამჷდა თე ნინა დო მაფშალია მოსპანჷნი. ჭვენცჷ ცაშე გიმანტჷრენი, ვალჷნცჷ, გურგინჷნცჷ,- ურგინჯუანა, უქინძუანა მითაჟამიში ჭყონიში ჯაში წვანცჷ გიმმახვენჯი უჰამაშო მობირე მაფშალიასჷ დო ოკონა ბირა მიოტებაფუანჷნი, დუდი მეთოლანი დო უგურყელი ქარ-ბორიაში ენაბუძოლეფი, გვალაში მამაღალა ოკეანეში პოპორცჷ გეჩანჷ დო წკურუმცჷ გჷთალუანჷნი სადღემუშოთჷ.
თენასჷ ირფელცჷ ურზჷ დიოდღარო მაფშალია, მუში მოჸოროფეფიში ხუჯიში მეჩამა ალარინათჷ დო დორხველი დუდიშ იმენდით. მუჟამჷ ვაუქინძუანდჷ მაფშალიასჷ, უჟამო ჟამიში ენაბუძოლა ბუძოლიეფი, მარა ურზჷდჷ დო ოკო გოურზასჷ ანწი ხოლო. თეში იმენდისჷ არზენცჷ ამდღარი დღაში სინთეში ჭიჭე ჩხორია. ნამუთი ცაში ოსინთეშე გიმიჭვიტინანცჷ დო ქიანაში სიმართე დო სინთეთჷ გობჟათუას პიანენცჷ. იმენდ რე: ტყურათჷ გაქინძუუნა, გაყვიანა დო გაღიანა მაფშალიასჷ დო მითაჟამიში ჭყონიშ ჯასჷ ტურა-მელეფი, თუნთი-ნგერეფი, ირი ჯგირობუაში ნტერეფი, გაღა წყუნაფილი, ხანგა-შტერეფი მუშის ვენდენანი, გითმიჩანა, შურდინაფილ რენანი თენეფი. მაფშალია ვაღურუ დო ჭყონიში ჯა ვახუმუ, ონდო მაფშალია ქიბირცჷნი! ჰამენი!
მამანტი ძაძამია - მაფშალიაში ართ-ართი წირსფალი