მალიმორიშ მულაშა
წყარს გელაფირ ბჟაში ცხენსუ გეგნუტკვარუ ლაგამი,
ქვერსემიას ქინონწყველე იში ოლუ–ქართანი.
გური თეში ქინოფშირუ, მუჭო დიხას ლაგვანი,
მითა მირე ჯვეშეფიშე ხვამათ აკოსანთანი.
კილანემსუ უტკვარუანს წყარ დო ბორჯიშ ზარანდი,
კიბირს გოძუ ღვინიშ ზიათ მესქილადირ მართალი.
ვარჩქინდუნო მალიმორი, ქუგაღობას ქართანი,
შქაკავათაშ სქილედემსუ შხვა უღუნა გართალი.
აში მისუ აკანწყუე ნაფულეში ფაქვაში,
ვარა მისუ ეიანწყე საღორონთო ნახანტი,
ძვალო მითიჩხირჩხინანა ჸვერე ინჭას კადაში,
თუთაშეფი ქარგილაფუ მურიცხონიშ კარკანტის.