კინ მაჟირაშა მა თაქ გობრჩქინექ
Jump to navigation
Jump to search
ორთა ფსუალეფს უფათქუანცჷ,
ფირქეფ მუკობუ ცას წილამურო.
ჩეჯაშ ნოჸელეფს გილაღვარღვალჷ
ათე ნაბირა ჩხე ჩილამურო.
ჩქიმი ლერსეფი ცაშ ობინეხეს
მუკოჭვიანა ჸურზენ-ჸუბერო,
მუ შვანც ღორონც შურც დურთინუანქჷნ,
კინე გინმოშკვანც დიხაჭუბერო.
ჭარა ხაბოშე მოკერკელუანც,
ფუთქურ მოლებულ მუჭოთ ქუასჷ.
ათე ბორია სუას მეპტახუნც,
ამარ მოლიმ დო მიქინძუანსჷ.
ირო მისხუნუ დღალეფ მობრდენი,
ბრელ მიძირუ დო ბრელით ბდინაფუ.
სოლე მობრთინ დო სოლე იბდენი,
ირფელ ართიანც ქიმენქირაფუ.
შურიშ ტორონჯი ცაშე მიჯინე,
თექ ხოლო ნოღვე ირფელც აკართუ.
მა თი შარასჷ თოლი ქუკინდე,
თანთე მუნაფას ნამუთ აკათუ.
ამარ გევორექ რზენიშ ოხურგეს,
შურ მიკიჩხილიტ, სო რე ფაფალას.
კინ მაჟირაშა მა თაქ გობრჩქინექ,
თოლიშ მერქას დო წუნიშ მამალას.