კვარია დო მელა
სოდე რდჷ დო სოდე ვარი:
ჟი გვალა დო თუდო ბარი,
კოჩი რდჷ დო მუთუნჸ შხვანი, --
კვარიას მეჩჷ ნოკვეთჷ ჸვალი.
კვარიაქ გეჭოფჷ ჸიონით,
ნჯაშა იშელჷ ქიონით;
ქვარა ჭვირი აფუ შქირენით,
ჭკუმუა ოკო ხიოლითჷ.
ეთექ ოკო ჩხონდასჷნი,
ჸვალი უღუნ დო ჭკომასჷნი.
ჩე რე, ჭკუმუას ორწყე ცოდათ,
ნჷნძგჷთ მარგება მიოჩქჷ მოდათ.
მუდოს კვარჲა სარზენს თესჷ,
მელა ორწყე შორშე ჩესჷ;
მოტყობუნსჷ, უმარდჷ ბრელსჷ;
ვა ურქენსჷ კუჩხი დო ხესჷ.
მელა კვარჲას მარდს ოგანსჷ,
ცქუმალათჷ გურს ურძღანსჷ,
იშ ჸოროფა, ცქუმალასჷ
ათენერო რაგადანსჷ:
-- "კისერი-დუდამო ხანტურელი,
"სუა გვალო ჭარჭულერი......
"მუ გიწუა მა ბჷრელი?
"სი თელი დი შხვა ღურელი.
"ხონარი -- ანგელოზიცალი;
"მიჩქჷ, მითა გიჯგუ შხვანი.
"ძირე მჲარო ჯგჷრი დღანი,
"მორჩქილეე ბირა სქანი!"
კვარიას მუდოს უჩქჷდჷ ბირა?
პიჯი გაანჯჷ დო დიძახჷ -- "რირა!"
გუტუ ჸვალსჷ პიჯი დო ნინა,
მელას ოკოდჷნი თინა:
ჸვალიშ ეჭოფუა, ნტინა.