ვავოდინუათ მარგალურ ნინა!
ინტერვიუ გაზეთის რედაქტორიწკუმა
ნარო კოლხარი (ნარიმან იაშაღაშვილი) გოხოლუნა პროფესიონალ მაჭარალ, დიდ მეჸოროფე მარგალურ ფოლკლორიშ დო მითოლოგიაშ.. ჭარილ აფ რომანეფ, კინოსცენარეფ, არაკეფ, ლერსეფ.., მუჭო ქორთულო, თეშ მარგალურო ხოლო… ბრელ ხან ვარე მუთ გიშაშქუნ მარგალურ წიგნ „ჭიპიტოშ მუმულია“ ციკლიშე „სამარგალო იძიცანს“. გვალო მალას გიშურს მუშ შხვა წიგნეფ ხოლო, მუთ თავარ რენ, რომან „ბჟალაია თუთა“.
- პატონ ნარიმან, უწოხოლოშე მოკო ქიმგაგახვამათ მარგალურ გაზეთ „ტორონჯიშ“ გიშულა, მუჭო ფიქრენთ, ქიმიღენსო ჩქიმ მაკითხირეფ თე გაზეთის?
ჩქიმ აზრით ოკო ქიმიღას, უმოსო სამარგალოშ რეგიონიშ მახორუეფქ, შილებე დუდშე ბრელს ოძიცექ აუას მარგალურო ჭარილქ, მარა ოკო ქიმიარჩქვანან. შხვა შარა ვარე.. მუთ თავარ რენ, ოკო ვავოდინუათ ჩქინ ნინა.
- მარგალურ გაზეთ ხვალე თეშენ იჸინო საჭირო, ნინა ვავოდინუათინ?
- ჩქიმ ბრელ ოკო ბჭარათ მარგალურ მითოლოგიაშე, ფოლკლორიშე...
მუსხე რე დინაფილ მის უჩქუ. ჯვეშობურ საარაკო ამბეფ იჸი ენა თუ ლერსეფ, ბირეფ თუ ლეგენდეფ... ხვალე ოჩოკოჩშე დო ტყაშმაფაშე თისხე საინტერესო არაკ დო ლეგენდა რე... თენა ირფელ ოკო დობშაყარუათ დო ქიდიბტუათ საწმოხონოთ.
- ხო ქიშილებე მარგალურ გაზეთ დო წიგნეფიშ გიშულა კალკანეფს მიორჩქუდას, თენა ირფელ მარგალურ სეპარატიზმ ვარდასიან?
- ეს თინა ფიქრენს მისუც დუდს ბორია ურქესინ მუნერო შილებე? ხვალე მარგალურო ვარ, შონურო დო ლაზურო ხოლო ოკო იჭარუდას წიგნეფ დო გაზეთეფ. ქორთულ ნინაშენ ირფელ თის ჯგირობუაშ მეტ მუთუნ ვამოუღ, ხო ქორშუნა მუს ჭარუნდ დიდ ქორთუ პოეტ აკაკი წერეთელინ? ჩქი ოკო ქიმკვოჯინათ მარგალურ ნინასია, ენა ჯვეშ კოლხარეფიშ ნინა რენია, ქორთულ ნინა მარგალურ სიტყვეფით ოკო გევოფშათ დო გუვასკვამათია.
- ენა აკაკიქ თქუ, მარა ის უკულ დახერდე ოშ წანაქ მიკილ, ასე ქიგეგენანო?
- დემოკრატეფქ ოკო ქიგეგან, მუშენდა ქუჯინით, ისპანეთის კატალონიურ დიალექტით ხოლო გიშმურს გაზეთეფ, ჟურნალეფ დო წიგნეფ, საფრანგეთის კორსიკულო, ბურდუნდიულო... გერმანიას ბავარიულო, იტალიას სარდინიულო დო სიცილიურო, მარა მითინ ვეჩიებ ენა მუნერო შილებენია, მეტ უმოსე კატალონეფ დუდს ესპანიარეფო თვალუნა, ბავარალეფ გერმანარეფო დო თაშ იშო... ჩქი იშენით იმპერიულო მაფუნა შურ წაულილ, თესხე წანას თოლეფელაფორილო უჯინედით ჩქინ უზისხირე რინასინ თიშენ.
- თაშ ქოფთქუათინ, იწკმა ხო შილებე კახეთარეფქ კახურ დიალექტით ჭარანინ?
- შილებე მუსხე მაჭარალეფ რენა კუთხურ დიალექტის ხვარენან. ენა უმოსო არზენს ალფერს ქორთულ ნინას, ნამუც უმოსო იმდიდრებუნ.
-მარგალურ ნინას ბრელ რე თიცალ სიტყვეფ, ქორთულო ვეთარგმინენ, ვარა თისხე, ნამუც ბრელ მარგალს შურო ვაუჩქუნ.
- ნამუც ქორთულო ვეთარგმინენ, მუჭო დიდ აკაკი იჩიებუნ, ოკო გემშებღათ ქორთულ ნინაშა, მარგალურ სიტყვა „მერეხი,“ „პანჯი,“ ქორთულო ხოლო თაშ რდასინ სიტყვა მიკორე - „მიკორთელი“ ქორთულო სიტყვა „წკვარამქ“ მუს ადგილ ქიდიტუ ქორთულ ლიტერატურას. საჭირო რე სერიოზნულო ქუმოვბკიდათ ხე საქმეს. მარგალეფს ნამუთინ მარგალურ ვაუჩქუნ ოკო ქიდიგურუას. მა დიდ იმენდ მიღუ ამარდეცალო გონწყუმილ ზუგიდიშ უნივერსიტეტიშა.
- მუჭოთ მიჩქუნან, ჭარილ რე ქორთულ - მარგალურ ლექსიკონ.
- ჭარილ რე, მარა ვეუ დო ვეუ თიშ გიშაშქუმალაქ, მარა იმენდ მიღუნა მალას ქობძირუნთინ.
- თქვან მეტ ხოლო მითინ ქოჭარუნსო მარგალურო?
- მუჭო ვარ, ჭარუნა.
- თე გაზეთიშ ძირაფაშ უკულ ჩქიმ აზრით ბრელ დიჭყანს მარგალურო ჭარუას დო კითხირს.
- ღორონთქ გირჩქილან, ეშ მუ სარკო კათა ვორეთ თე მარგალეფ, ვართ ბჭარუნთ, ვართ ბკითხულენთ, მარა იშენთ ბრაგადანთ. მუ მიშალენა ხეს ბჭარათ დო იბკითხათინ?.. დო მუთ თავარ რენ ხოლო ართშა ქოფთქუა, ჩქი ვამიღუნა უფლება ვოდინუათ ჩქინ ნინან! მეტ უმოსე თინა ხოლო ოკო ფშუდან, სამარგალო მუჭო უსკვამაშ საქორთუო რენ.
- მადლობა ინტერვიუშენ.
ინტერვიუ მეჸუნდ გია გოძილანძეს