ელარჯი დო გებჟაქლია
ხელეფჭირაკილი დადის,
ჸუნდუ ართი ჩხოუ ჭკოლა,
რინტუ მარაკას მითორდჷ
ყებურს გიოცენდუ ნწოლა...
ჯარგვალს არძა იბნტირედით,
ვოჯანუდით ხასლა-ხასლას,
მოგიმუანდეს ხვიხვინია
ჸვალმინთაშა მიშნალასა...
ვამოჭყორდუდ ირი დღასჷ
ჩქინ ჭარგაში დიარაფა,
ვარდა, ირო მოონდღიეთ
ჯიმწყარიშა მეჸუნაფა...
ჭარგას ფუჯი მეუხედჷნი,
გვალო იშვენდ თიშ ნაბონა,
ჩხოუში ტჷ ტიბ წყარითი
ქუგაფნანო მუნაბონა..
ტჷშე მურსჷ ბჟა დო წაქა,
ფუჩხოლია, ხვიხვინია,
ებრო, მარწვენ, ჸვალი ხუმლა,
ძამს მიჸორდეს ბიხვინია...
ელარჯი დო გებჟალია
ქომსხუნუდეს ირფელიშა,
ჭყინტ ჸვალ მიკოწაწაფილი
ჸვალმინთაში სუნელიშა...
ბჟა მანტუნ ფერ სელეგინი,
ჭიჭეთ ენოჯიმაფილი,
ჩხე ღუმს ეშახაშილი დო
გვერდო მიშადინაფილი...
ჟიშე მუთი ქოიწითი
ირფელი რე ტჷში მარდი,
ჭიჭანობას ცქინ ოფუტეს
ირკოჩ ტჷთი ვორეთ ნარდი...