ეკლესიასტე
ეკლესიასტე — ჯვეშ აპიანაფაშ ჭიჭე კირიბი. მიკაჭარუაფუ სოლომონ მესიაკონს. ნამუქით სირჩინუეშ წოხოლე ქიგინ ნამუდა "მუთუნ ვარიში მუთუნ ვარ, ირფელ რე პოტიკი". დაჭყაფურ ზიტყვა რე "ბჟაშ თუდო" სოდეთ აკოშაყარელი რე მესიაკონეფიშ ნარაგადუეფი რინაშ რსიოლიშენ. ბჟაშ თუდო გითმარინალეფიშ თვალუა, წვალება დო წარწალი, ურწუმეფიშ უხიოლე შურდგუმა ეჸონაფილი რე მაღალ პოეტურ რანგიშა. ნამუთ ხვალე ჯგირ რინაშო ფირქენსჷნ, ჭყოლოფაშ იმენდი ვაუღუდას ოკო. სოლომონი ღურაშ წოხლე იჩიებჷ: ,,მაფა ვორდი იერუსალიმიში..."ეკლესიასტე ჯოხო თითონ სოლომონს (მარგ. ოხვამე, ქორთ. სალოცავი, ბერძ .ეკლესია,ლათ. კონსოლიუმ, ებრ. კაპილიდან).
მაართა დუდი
[edit]- ნარაგად ეკლესიასტეში, დავითიში სქიში, იერუსალიმიში მაფაში.
- მუთუნ ვარიში მუთუნ ვარ, თქუ ეკლესიასტექ, მუთუნ ვარიში მუთუნ ვარ, ირფელ რე პოტიკი.
- მუს არზენც კოც ხანდა, მუსუთ თინა ბჟაში თუდო ორთუნი?
- გამნარყი მეურც, გამნარყი მოურც, ქიანა ვეთირუ ნამთინ უკუნც.
- ელურც ბჟა დო დილურც ბჟა, დართუ მუში დაჭყაფუს დო კინი თევრე გელარწკინუნც.
- ოჩხანეშა მიქაქალ ბორია, გამკირთუ ბიჟღეთჸურე; ირთუ, ირთუ, გილეშხუმინ დო გაკვარკვანტ მუში წირეს.
- არძო მალ წყარი ზღვეფც აკათუ, ზღვა დღას ვეიფშაფუ; წყარეფი სოლე მიშესუნი თევრე მეულა.
- უჭყანე რე არძო ზიტყვა, ვეშულებ კოც ირფელიში თქუალა; თოლი ჯინათ ვერძღუ, ჸუჯი რჩქილათ ვეიფშაფუ.
- მუთ ჸოფენი თინა იჸუაფ დო მუთ მოხვალამენი, თინა მოხვადუ; მუთუნ ვარე ბჟაში თუდო ახალი;
- ქოძირნა მუდგარენც დო თქუანა: ა, ახალი, თენა ხოლო ჸოფედ წოხოლენ უკუნც.
- ვადოსქილადე თინეფიში შინი, მით წოხოლე ჸოფენანი თინეფიში, უკულიანიში ხოლო. მით იჸუაფუნი, ვაგიშინანც თინეფც ხოლო გიმაჸვენჯი.
- მა,ეკლესიასტე,მაფა ვორდი იერუსალიმიში.
- დიბჭყი ჩხირკუა გურგედვალირო დო გურიშჩამა ირფელიში მუთ მოხვალამე ბჟაში თუდონი; ათე მონკა საქმე მეურჩქინ უფალქ ადამიში სქის ოწვალებერო.
- გურშა ქიგიფშქვი ირ საქმე მუთ ქოჸოფე ბჟაში თუდონი; დო აჰა, ქიფჩინი–პოტიკი რე ირფელი დო ბორიაში ეკოთხოზინი.
- ღულა ვაგგათინე დო მერკე ვეგაფშინე.
- უწი ჩქიმ დუც აჰა, დობშაყარე დო გოუძინი რჩქინას არძოში უმოსო, მით ქოჸოფე ჩქიმ წოხოლე იერუსალიმსინი თინეფშე, დო ქახოლ ჩქიმ ღიაბიქ, უსანძღო მენცარობას დო რჩქინას.
- მუჟამცჷთ, გური ქუჩი მენცარობას, ურჩქინჯობა დო ბორუობასჷნი, ქიმეფხვადი მუთუნი არზი ვაუღუდ თეს ხოლო.
- მუშენ-და,მუზმათ დიდი რე რჩქინანი, დიდი რე ნარღი ხოლო. ბრელიში რჩქინა კოც ნარღის უძინანც.
მაჟრა დუდი
[edit]- უწი ჩქიმ დუც: მორთი, გამოფრსე ხიარულებას, ქიმვაჩამუქ ჰამო რინას მარა თენა ხოლო პოტიკი ჸოფე დო მეტი მუთუნი ვარ.
- ქიმეფხვადი:დუდიში ართუაფა დუდიში ღორება რე; მუ აქიმინე ხიარულებას?
- იფიფქრი: ღვინით გობრანგილი მაფუდას ხორცი დო ტვინი რჩქინათ მაფუდას ირო კურცხე, ქიგვოდირთუქ ბორუეფიში შარას სოიშა ვაბძირუნქ,მუ სიკეთე რე კოჩიშო თი ოქიმინალი, მუსუთი მუში შურდგუმას ირიათო ორთუნი.
- დიდი საქმე ქოფქიმინი: გევოგი დოხორე, დობრგი ბინეხი.
- გაგმუვონწყი ჩქიმო ბაღეფი დო წალკოტეფი, დობრგი ხილი ირნერი.
- გემშეპუნი ოწყარალი, ნერგეფიში ოჩხაპალო;
- ქუმოფშაყარე მოინალე ჭკორეფი, ბრელი რდჷ ჩქიმი გამნარყი დო მით ჩქიმი წოხოლე ჸოფე იერუსალიმიში მაფანი, თინეფშე უმოსი მიჸუნდ შხურეფი დო ჩხოულეფი.
- დობშაყარე არძო ქიანაში მაფაში ორქო დო ვარჩხილი, ქიგიბხუნე მაბირე კოჩეფი დო ოსურეფი დო ზისნახე ხასეფი, ხორციში საგემუანოთ.
- მით ჸოფედ ჩქიმ წიმოხონი იერუსალიმსინი თინეფიშე უმოსი სახელი დო ღმალა მიღუდ დო ჩქიმი ჭკუა მა მაინალდჷ.
- ვადამრკებ დუდიშა მუთ მობთხუ თოლეფქ/ინი, გური ხიოლენდ ჩქიმი ნასაქვარით დო ვამვარებ გურშა ხიოლი, თენა ირფელი ჩქიმი ნახანდიში საგამა ორდ.
- უკული გინვოჯინი ჩქიმი ნასაქვარცინი, ქიმეფხვადი: პოტიკი ჸოფე თენა ირფელი, ბორიაში დორქიას ნოგუე თი ხიოლი დო მუთუნი ვარე მორგე ბჟაში თუდო.
- მუ ქიმნას გიმაჸვენჯი მაფაქ, წიმოხიანც გაუთებ ირფელი ოქიმინალ-და.
- მუჟამც გეშამნწყი მუ რე სიჭკვერა დო სიბორუე დო ურჩქინჯობანი, ქობძირი ჭკუა.
- ჭკვერი კოჩი გინაფათ ორწყე, უგინაფ უკმელას გილევალ, მარა იშენით ჭარა ართი მუნოძვე არძოს.
- გურც უწი: მა ხოლო უგინაფუში ჭარა მობძჷ-და, მუშენი ვორდი შხვეფშე უმოსი ჭკვერი? დო კინი უწი გურც: პოტიკი ჸოფე თენა ხოლო დო მუთუნ ვარიში მუთუნ ვარ.
- ირო მითინც ვაგაშინე ვართი ჭკვერი დო ვართ ბორო; მიკილენც ბორჯი დო გაჭყორდუნა: ახავაი, ჭკვერი ხოლო ბოროცალო ნოღურუე.
- დო გიბჯოგე მა თე რინა, მუშენ-და კოლოქ მაჸუ ირფელქ მუთ რე ქიანასჷნი, ირფელი პოტიკი ჸოფე დო ბორიაში ეკოთხოზინი.
- დო გიბჯოგე ირფელი, მუსუთ მივოჭირინე ჩქიმი ხანდათ დო მუთ ოკო დოუტუე ჩქიმ გიმაჸვენჯისინი.
- კოც ვაუჩქ მის დასქიდ ჩქიმი ნახანდი, მუთ მა ჭკუათ მიშაყარუნი; ბორო იჸი დო ვარ ჭკვერი თიში მინჯე? ა, ხოლო პოტიკიში პოტიკი!
- დო ქიგუწკური იმენდი ჩქიმ დუც; მუთუნც ოკო ვეველდე საგამათ თი ნახანდიშე მუთ მა იბკილოთი თე ქიანასჷნი.
- ქოძირუნქ კოც, ნამუთ ხანდენც ჭკვერულო დო თე საქვარს მიშადვანც მუში რჩქინანს/ჷნი, მარა უკული თინერც გიოსქიდ ირფელი, ნამუსუთ შურო მუთუნი ვაუკათ თე ნაქიმინაშანი. პოტიკი რე თენა ხოლო დო დიდი უსამართობა. ორუ ბორუობას, მუჭოთ სინთე უკმელას.
- აბა მუ ოსქიდ კოც ხანდა დო კილოთიში საგამათ?
- თიში დღლეფი წვალება რე, ოქიმინალი – ნარღი, სერით ხოლო ვესვანჯ. იბურჯანც გური. ა,ხოლო მუთუნ ვარიში მუთუნ ვარ.
- კოჩიშო არძოში უჯგუში რე შვას, ჭკუმას დო ქიგემუანას მუში ნახანდინი, მარა თენა ხოლო ღორონთიში ხეს რე.
- მის აშვე დო აჭკომე, ვარა მის შეულებ გემუანო რინა თიში უმუშო?
- მისით უმარდუნი თის მეჩანც სიბრძნეს, რჩქინას დო ხიოლც: ცოდამც ნაშიბუში საგამათ ოწვალებერც ურჩქინანც, ნამდა ღორონთიში მოჸოროფეს გიოსქიდას მუნაგებუქუნი. პოტიკი რე თენა ხოლო დო ბორიაში ეკოთხოზინი.
მასმა დუდი
[edit]- ირფელც მუში ბორჯი უღუ თე ბჟაში თუდო.
- ბორჯი ერჩქინაში დო ბორჯი ღურაში, ბორჯი აკორღვაფაში დო ბორჯი აკნარღვეფიში გინოხინწუაში.
- ბორჯი შურიში ლაფაში დო ბორჯი სქილადაში; ბორჯი აკორღვაფაში დო ბორჯი კეთებაში.
- ბორჯი ნგარაში დო ბორჯი ძიცაში. ბორჯი რგუალაში დო ბორჯი ხიარულებაში.
- ბორჯი ქუალეფიში რღვაფაში დო ბორჯი ქუალეფიში შაყარუაში; ბორჯი ჸოროფილიში მოჸანჯაფაში დო ბორჯი თინეფიში დათხიებაში.
- ბორჯი ძირაფაში დო ბორჯი დინაფაში; ბორჯი ჩუალაში დო ბორჯი ხარჯებაში.
- ბორჯი ხარცქუაში დო ბორჯი ელაჭაფაში; ბორჯი დამუნჯებაში დო ბორჯი ჩიებაში.
- ბორჯი ჸოროფაში დო ბორჯი გოჯოგაფაში; ბორჯი ლჷმაში დო ბორჯი შვიდობაში.
- მუს ორგ შულადირც ხანდა მუში?
- ქობძირი ოხანდებელი ნამუთ ღორონთქ მეურჩქინ ადამიში სქის ოწვალებერონი;
- თიქ მუშ–მუში ბორჯის ირფელი კეთილო ქიმინ, ფულირიში მიოგორალო მორხინ კოჩიში ტვინი, მარა თი ზომაშა, ნამდა მითინქ ვაგუგას ღორონთიში ქიმინელც დუდი დო ბოლონი.
- მიჩქ, მუთუნი ვარე კოჩიშო გახარებაში უჯგუში.
- კოც, ნამუსუთ ვემიოკორდ ოშუმალი დო ოჭკუმალი დო ხანდაში საგამათ სიკეთეს ორწყენი, თენა მარდი რე, ღორონთიში ჭყოლოფუა.
- მიჩქ თინა ხოლო, ნამდა ღორონთიში გჷნარჩქინა იჸუაფ ირიათო, თის მუთუნიში მეძინა ვასაჭირ დო ვართი მორკება. ათაში ქიმინ ღორონთქ მუშა ოშქურუდანიინი თიშენი.
- მუთი ჸოფენი ბრელი ხანი რე ორდუნი. ანწი მუთ იჸუაფუნი, თინა ხოლო ჸოფილი რე. ულირც ღორონთი მიკითხენც.
- ხოლო ქობძირი თინა, ნამდა უსამართობას ქუდუხუნ ბჟაში თუდო; მართალიში არდგილი უსამართოს ქუდუკინებ.
- თიწკუმა ფთქვი გურც: ღორონთი გეიშასხუნუნც მართალი დო ტყუანს, მუჟამცჷთ ირფელც, ირ საქვარს ბორჯი ქიმიაკითხანცუნი.
- დო ხოლო ფთქვი გურც: ათაშ გამორსენც ღორონთი ადამიში სქის თიშენი ნამდა გური ქუჩას კათაქ, უღორონთეთ გვალო ტყარეფი რენანი.
- გური ქუჩას, კოჩი დო ნორტყეფიში ჭარა ართნერი რენი. თიში ღურა თეშის მოგენც დო არძოს ართნერი შური ენოდგ. კოჩი ნორტყეფშე უმოსი მუთუნით ვარე, მუშენდა ირფელი პოტიკი რე დო მუთუნ ვარიში მუთუნ ვარ თე ქიანას.
- ირფელი ართი არდგილიშა მეურც; ირფელი დიხაშე რე დო დიხათ გინირთუ.
- მიქ თქუას, კოჩიში შური ეშე მეურც დო ნორტყელიში თუდო უკმელაშავანი.
- ვორწყექ, კათაშო შხვა მუთუნ ვარე, მუში ნასაქვარით ვეგეხარდა; თენა რე თიში თია ბჟაში თუდო. მი ოძირანც ის მუში უკულიანც?
მაოთხა დუდი
[edit]- ხოლო ვორწყედი ნირზებას, მუთ ორე თე ბჟაში თუდონი; ა,დოთმოწენც ჩილამური დაჩაგრულეფიში დო მითინი ვანუგეშენც თინეფც; მაჩაგრებელიში ხეს რე ნძალა დო მითინი ვაყუნა იმენდიში მიმაჩამალი.
- თელიშე უმოსი ბედნიერო მიფრჩქინი ჭახანიშ წოხლე ნაღურა კათა.
- თელ დო ღურელიშე უმოსი ბედნიერი რე თინა, მითი დიო ვადაბადებენი დო ვაუძირ უბადობა მუთი თე ბჟაში თუდო მუთმოხვადუნი.
- თინა ხოლო ქობძირი, კოჩიში მონდომება ირ საქმეს, ართიანიში ჯინათ ჸოფე. პოტიკი რე თენა ხოლო დო ბორიაში ეკოთხოზინი.
- ბოროს გურშა ხელეფი ქიგუწკურუაფ დო მუში ხორცის ჭკუმუნც.
- ართი ხუ სიწყნარე უჯგ კალათიში ეფშა ხანდა დო ტყურაიანი ოქიმინალც.
- ხოლო უმოსო ქიბგინი, პოტიკი რე ირფელი თე ქიანას.
- ორე ხვალახე კოჩი, ვაყუნც მითინი ვართი ჯიმა, ვართი სქუა, მარა თიში ხანდას ვაუღ გაწყანა, ვერძღუ თიში თოლეფი მუნაწიში ჯინათ. მიშო ხანდენც დო სიგემუანეს მუშენი ირკენც? პოტიკი რე თენა ხოლო დო ფუყე საქმე.
- ხვალეიანი რინას უჯგუ ჟირი ორდანინი, მუშენდა სიკეთეთ მეუდირთუნა ხანდას.
- ქიდანთხეს და ართი იშენით გამწადგინანც მუში მაყალეს, მარა ვავა ხვალახე კოც, ქიდანთხუდა მი მეხვარებ?
- ართო ქიდინჯირესდა გოტიბუნა; ხვალახეს მუ ოტიბუანც?
- ართის მერუ მითინქდა, ჟირხოლო გეიაზადუნა. უმოსი გარზე რე ართიანც გინოწკუმონტილი ძაფეფი.
- ღატაკი, მარა ჭკვერი ბოში უჯგუ, რჩინ დო ბორო მაფას, ნამუთი ანწი მუთუნიში დუმაგურაფალი ვარენი.
- თინა ციხეშე ხოლო მაფათ გითილენც, მუში ქიანას ღარტაკი ორდუკონი ხოლო.
- ირფელი რდილც მუში მარდუ ყუნც თე ქიანას. თენა თიში შხვა რე. თიში არდგილც დეკინენც უკული.
- ვაუჩქ დათებუ ხიის, მით წუმოხონც ჸოფე დო მით თის გეყუნცუნი, ვემინატრუანა ართიანც. პოტიკი რე თენა ხოლო დო ბორიაში ეკეთხოზინი.
- ღორონთიში ყუჩა მეურქდა, ჩქარას ვედა, ფრთხილას ორდა, შესაწირი უგუნურეფიში ნერო ვეშეწირა. თინეფც ვაუჩუქნა გლახას ორთუნანი.
მახუთა დუდი
[edit]- ნინა ნუმ გისხაპუნც დო გურ გაჩქარენც ზიტყვაში ეკორაგადის ღორონთიში წოხოლე; ღორონთი ცას რე, სი დიხას რექ. ათეში გურშენი იბაღე კუნტას რაგადი.
- მუჭოთ სისმარც იბუძოლ ბრელი ამბეფინი თეში ბრელი ზიტყვაში რე რუნგაში ნარაგად.
- ღორონთც ქიდეპირებუქდა, ნუმ გინოდვა თიში ქიმინუას, მუშენდა უპიჯო კოჩი მუთუნშო ვერგ. მუსუთ დეპირებუქუნი შეასრული.
- შურო ვადეპირენი თინა უჯგუ, დანაპირი ვეშიასრული თის.
- ნუმ ორაგადაფუა სქან ნინას ცოდას ენგოყოთასნი თიჯგუა ზიტყვას.ჩილათირი ვორექიადო ვეცადა დუდიში მართებას ანგელოზებწკმა.მუშენი ოკო გუგანჭყორას ღორ–ონთქ სქან ხონარიში გაგონებაშენი დო მოსპას სქანი ხეში ნაქიმნა.?!
- ბრელი სისმარც ბრელი ტყურა ოხოლ; სი ღორონთიშა გოშქურუდას.
- სოთინ ღატაკიში დაჩაგრებას დო სამართალიში წაყუნებას ორწყექდა ვეგეკვირუა, მუშენდა მაღალც, მუში უმოსი მაღალი უჯინე, დო თინეფიშე უმოსი მაღალით ზოჯ–უნც ჟიდოშე.
- უჯგუში ქიანა რე თი ქიანა, სოდეთ მაფა სახენწიფოშო გოშქურუდას.
- ფარაში მოყოროფე ფარათ დღას ვერძღუ დო მღალაში მოყოროფე მუში მუნაწით. თენა ხოლო პოტიკი რე.
- ბრელი მუნაწის ბრელი მაჭკუმალი ყუნც. მუ გიოსქიდ თიში მინჯეს?! ხვალე ჯინა.
- ჰამო რე მოხანდე კოჩიში რული, გოკონი ჭიჭე ჭკუმას დო გოკონი ბრელი; რძღელი კოც ლური უდინ.
- ორე დო მიძირ მაწვალებერი უბადობა თე ქიანას:მინჯეში საზარალოთ დიხას ნთხორილი ქონება.
- მედინ თი ქონება, უბედურებაქ გამკოლდა დო ქუდოსქიდ თიში სქუა ცარიელო.
- ტარკალეთ დირთუ უკახალე, მუჭოთ რე გიმნაულა დიდაში სასქუოშენი თეში დო მუთუნი ვაში ხანდათ.
- თენა ხოლო დიდი უბადობა რე: მუჭოთ მორთუნი თეში მეურცუნი: მუ სიკეთე რე ტყურათ კილოთი.
- მუში დღალეფც უკმელას გათენც ნარღი დო ჭუათ გური ელაჭვილი.
- მარა ა, სო ვორწყექ მა სიკეთეს დო მოხუჯური საქმესუნი: შვას დო ჭკუმას კოჩქ დო იხიოლუას მუში ნახანდი დო ღორონღიში მუნაჩემი.თენა რე თიში წილი თე ბჟაში
თუდო.
- კოც ღორონთი არზენც ღმალას დო თიში მოხვარაში შნოს ხოლო, გეჭოფას მუში წილი დო გეხარას მუში ნასაქვარითინი; თენა ირფელი ღორონთიში ჭყოლოფუა რე.
- კოჩი ცხოვრებას ბრელიში გუმაშინე ვარე, მარა ღორონთი იშენით არზენც გურიში ხიოლც.
მაამშვა დუდი
[edit]- ორე უბადობა ნამუთ ბძირი მა თე ბჟაში თუდო დო მონკა რე თინა კოჩიშო.
- ქიმეჩანც ღორონთი კოც ღმალას, დიდებას დო ჰა, ირფელი უღუ მუთ ქუნატრებუნი, მარა ვამახვარებაფუანც დო შხვა, უჩინებ მიხვარენც ირფელც. პოტიკი რე თენა დო უბედურება.
- კოჩქ ბრელი წანეფც გარზას დო ოში სქუა ყუნდას, მარა გემოქ ვეიშაღინ რინაშა დო სასაფლაქ ხოლო ვაჭარდა, ფთქუა; ქოუჯგუდ სასქუოშე მოხარცქედ/კონი.
- ტყურათ დებად დო უკმელასა მიდართ, უკმელას დინწყუ თიში სახელქ.
- მარა მისით ბჟა ვაუძირ დო შურო ვაგუგონებუნი თი კოჩიშე უმოსი მოსვანჯელი რე.
- ჟირი ანთას წანას ვაღურას, მარა მუთუნი სიკეთე ვაძირას/ნი, დიდი უბედურება ვარე, იშენით არძო ართი არგილიშა მეურც.
- კოჩიში ირნერი ხანდა პიჯიშო რე, მარა შური დღას ვეიფშაფუ.
- ვარდა, მუთი უმონც ბრძენი ბოროს? ვარა ღატაკის ნამუსუთ უჩქ მუნერო გურზას რინასინი?
- თოლით ქოძირე თინა უჯგ გურით ეყუნას. თენა ხოლო პოტიკი რე დო ბორიაში ეკოთხოზინი.
- მუთ ქორენი ირფელც დიდი ხანი რე მუშ–მუში სახელი გეძუნი. კოჩი მუთუნი ვარენი თენა ხოლო რჩქინელი რე; მუში უმანგარაშიშა ნირზი ვეშულებ.
- ბრელი მუთუნი რე უიმენდობაში მათასალი. მუ ნძალა უღუ კოც.
- მის უჩქ მუ რე ჯგირობუა კოჩიშო თე მაღორებელ ქიანას, ნამუსუთ სისმარცალო ორწყენი?
მაშქვითა დუდი
[edit]- ჯგირი კოჩიში სახელი უჯგუ ჰამო შურამი ნელსაცხებელც; ღურაში დღა უჯგუ გორჩქინაში დღას.
- ონგარუშა ულა უჯგუ, ხიარულებაშა ულას, მუშენდა თინა რე კოჩიში ბოლო.
- წუხება უჯგუ ძიცას, დანარღებულიში გური კეთილი რე.
- ბრძენიში ფირქები ნარღიში ყუდეს რე, რეგვენეფიში–ხიოლიში ყუდეს.
- ბრძენიში საყალე მირჩქილუე თინა გისხუნუდას რეგვენიში ცქვაფაშა.
- რეგვენიში ძიცა ჩუანიში თუდო ფეცხიში რტკუმოლც გუ. პოტიკი რე თენა.
- გაჭირება ბრძენც გეიშარჩქინანს; ქრთამი ყორიდუნც კოჩიში გურც.
- საქმეში დათებ უჯგუ დაჭყაფუს; შურ ტონბა უჯგუ დუდმოძირკინაფილც.
- გურიშმულა ვეჩქარა, გურიშ მულა უჭკუო კოჩიშ გურც მულაძ.
- ვათქუა, წუმოხონი ამდღარც მუშენი უჯგუნია, ჭკვერული ვახოლ თე ნათქუელც.
- ჯგირი რე ჭკუა დო ღმალა, დიდი სარგებელი რე ბჟაში მაჯინეშო.
- ჭკუა გინატენც კოც დო ფარა ხოლო, მარა ჭკუას უმოსი ჭყანა უღუ. მისით თინა უღუნი უმოსის გარზ.
- ქედეკვირი ღორნთიში ნაქიმინას, მის გათინე თიში ნადირიკა?
- მუჟამცთ ხიარულება რენი, იბედნიერი, გაჭირებაში შვანც მოთხილებურო ქორდა,ჟირხოლო ღორონთქ ქიმინ ართიანიში სანძალოთ, კოჩქ თიში ვიშო მუთუნი ვაძირას/ნი თიშენი.
- ბრელი მუთუნი ბძირი თე მაღორებელ ქიანას:მართალი მუში სიმართლეს ქიმშადინაფე დო უბადოს დღა მეუღ მუში უბადობათ.
- ნუმ იყუაფუქ ნაბეტანი მართალი, მანგარო ნუმ დეჭკვერებუქ მუშო გოკო გვალო ეყონდენი.
- ნაბეტანც ნუმ უბადეენქ, ვაგებორა–მუშო გოკო დღაში მულაშა ღურა?
- ქოუჯგ:თეთ ორდა დო თით,ვართი უწუა ვარია დო ვართი მაჟრას: ღორონთიშა ოშქურუნი თინა დუც იშენით გეიშეღანც.
- სიბრძნე ჭკვერშო ნძალა რე, ნოღაში ვითი მოუნჩაშეშე უმოსი.
- სოთინ ვაძირ მართალ კოც, ნამუთ თინ საქმეს ორთ, მარა ცოდა იშენით ვემკუსუდუნი ფერც.
- არძა ზიტყვას ვაურჩქილა, სქანი მოინალეში გორაფა ვაგეგონენი თიშენი.
- სი ხოლო ბრელშახ გიგორაფ შხვაშა.
- თენა ირფელი თოლიში წოხოლე ჭკვერულო ქაწიბძირენი, ფთქვი: ბრძენი ვორექ მაქ;მარა იშენით შორს მაფ სიბრძნე.
- შორი რე მუთ ჸოფენი დო ტომბა რე იში ქვინჯი. მი გიანჭუ თეიშა?
- გურშა ქელებდვი ქიფჩინიკო სიბრძნე დო სიჭკვერე, ნამდა გური ქუჩიკო უჯგუშო ურჩქინჯობა დო უბადობასინი.
- ქიმეფხვადი, ღურაშე უმოსი საშქურო ჸოფე ოსურკოჩი, მახე დო ბონდღი რე თიში გური, ობორკალი რე თიში ხელეფი; ღორონთიში მოყოროფე გინასქიდ დო ცოდამც ქენიჭოფანც თინა.
- დო ჰა, მუს მეფხვადინი, თქუ ეკლესიასტექ; ართნერო ოკო მიაყუნე არზის ქიმიოგორუენი.
- არზიანც გორუნდ ჩქიმი გური, მარა ვემმაგორუ; ანთასიშე ართი ქომოლკოჩი ნოკათუე, მარა თინეფც შურო ვახოლუდ ოსური.
- ა, თენა ბძირი ხვალე ღორონთქ კოჩი მართალი ეიორჩქინ, მარა ინეფი მუნეფიში დუც ოწვალებერც უძინანა.
მაბრუო დუდი
[edit]- ბრძენც მი ელაზიმუ დო მი უჩანც გურც ორთაში გუნებას? სიბრძნე კოც უსინთუანც დო სახეს არზიანო გინუჩქვანც.
- გირაგადუქ, ქიმიაყუნი მაფაში ზოჯუას, ღორონთიშა მეჩამილი ზიტყვაში გეშა.
- ნუმ გილამ თიშე ნტება დო უბადო საქმეს ნუმ ეკაყუნუქ. თინა მუსუთ მინდომენც/ნი ირფელც ქოქიმინუნც.
- მაფაში ზიტყვა კანონი რე: მი გუბედ უწუას, მუს ორთუქია.
- წესით დ/მარნალც გლახა საქმე ვამოხვად; ბორჯის დო წესის ჭკვერი კოჩიში გური გინაფულენც.
- ირფელც მუში ბორჯი დო წესი უღ/, კოჩიში უბედურება თინა რე ნამდა;
- თის ვაუჩქ მუ მოხვადუნი; ვარა მი უწინც მუ მუნერი იყუაფუნი;
- მითინც ვეშულებუ ბორიაში გაჩემება, მითინი ვეგინანც ღურა დღაში მულას, მითინც ვაგუტენა ოლიმარ მინდორშე, ვერსხენც მუში სიგლახე თიში მინჯეს.
- თენა ირფელი ქობძირი დო ქიდვეეკვირი ირ საქმეს მუთ ბჟაში თუდო მოხვადუნი დო ხოლო ქობძირი კოჩი კოც ონირზუდ მუში დუდიში საზარალოთუნი.
- უკული ქობძირი უბადოში მაქიმნალეფი ნთხორილო, ნამუთ გლახაში ოქიმინაშა მიშეს წმინდა არდგილეფშა დო უკახალე ირთუდესუნი; გიჭყოლიდეს თინეფ ხოლო თი ნოღას სოდეთ თენერო ირჯებუდესუნი. თენა ხოლო პოტიკი ჸოფე.
- უბადოში მაქიმინალი უცბას ვაღებულენც სარჯელცუნი თიშენი რე კოჩი გლახაში ქიმინუასბედუნი.
- მა მიჩქ, ნამდა გლახაში ქიმინუა ოშიშა ეპატიებ უბადო კოც, მარა მარდი მიაჩამუ ღორონთიში მორწმუნეს, ნამუსუთ ოშქურ ღორონთშანი.
- ვემიაჩამუ მარდი შურუბადოს დო აგაგაცალო ხანკუნტა იყუაფ არძო, მისით ვაშქურ ღორონთშანი.
- რე ხოლო ართი უსამართლობა თე ქიანას: ნამთინეშა მართალი კათა ჯგირიში კეთებაშენი გლახათ გინუგანა სიკეთეს დო გლახაში მაქიმნალეფც კეთილეფც ოსქუნდუნი თი პატის ქიგედვანა. მიჩქ, თენა ხოლო პოტიკი რე;
- დო ვოცქვე მა ხიარულებას; შვას, ჭკუმას დო იხიოლუასუნი თიშ მეტი შხვა სიკეთე მუთუნ ვაჸოფე კოჩიშო თე ბჟაში თუდო. თენა ირფელი ოკათ თიში დღალეფც ნამუთ ღორონთქ აჩუქუნი.
- თიში უკული, მუჟამც გურშა ქელებდვი სიბრძნეში გაჩიმება დო ირ საქმეში ძირაფა მუთ ქიანას მოხვადუნი, ჩქიმ თოლეფც სერი დო დღაშით ლური ვამკონჭაფ.
- ქუგვოჯინი ღორონთიში საქმესინი ქობძირი, კოჩი ვემეხვად მუთუნც მუთ ქორე თე ქიანასუნი; მუდგა მინდომას დო გიმიძუასუნი, მუთუნც ვემეხვად; ბრძენქ თქუას ქიმებხვადიე, ღორებული იყი–მუთუნს ვარე მეხვამლაფირი.
მაჩხორა დუდი
[edit]- გური ქიგუჩი დო ქობძირი მუთ რენი ირფელი, ჭკვერეფიში ნასაქვარ ღორონთიში ხეს რე:ვართ ყოროფა, ვართ გოჯოგაფა დო ვართ შხვა მუთუნი, კოც ვაუჩქ.
- ართი ჭარა მოძ არძოს: მართალც დო მტყუანც, მარდიანც დო უმარდულც, სუფთას დო წიკვილც, შესაწირც დო შესაწირი ვარენ თის, კეთილც დო ცოდამც;
- უბედურება რე ართი ჭარა მოძ არძოს თე ქიანასუნი; ადამიში სქიში გური ეფშა რე ბოროტებათ დო სიხანგე რე თენეფიში გურც სოიშახ შურ უდგუნანი.უკული ღურუს ოსქიდ თინეფი.
- თელეფც ხოლო უღუ იმენდი, მუშენდა თელი ჯოღორი უჯგუ ღურელი ჯილოს.
- თელც უჩქუ დოღურუნი. ღურელეფც მუთუნი ვაუჩქ დო ვართი მუთუნი სარჯელი უღუ. გოჭყოლადას გინაჩამუ თინეფიში შინი.
- დინუ თინეფიში გოჯოგაფა, ნჯარი დო ყოროფა;ანწი დღას ვაღვენუნა მუთუნი წილი თე ბჟაში თუდო.
- გილართი ხიარულო დო ჭკუმი სქანი ქობალი, ხიარული გურით შვი სქანი ღვინი, ღორონთქ ქოიწონუანც ნასაქვარცდა.
- ირო სუფთა გიღუდას მუკაქუნალი დო მუკოლუაფირი გიღუდას დუდი.
- იგემუანი რინა ოსურწკუმა ართო, ნამუთ გიყორც თე ქიანას დო ნამუთ მერჩ ღორონთქ თე ობჟათესუნი; მუშენდა, თენა რე სქანი წილი თი ხანდაშე მუსუთი ორთუდი ბჟაში თუდონი.
- მუში ქიმინუა შეულებ სქანი ხელეფცუნი თინა ქიმინი; მუშენდა, ვართი საქმე, ვართი ოფირქებელი,რჩქინა,სიბრძნე ვაგაყუნუ თი უკმელაშა, სოდეთ სი მეურქუნი.
- თინა ხოლო მიჩქ, ნამდა მარულეში ნებაშა ვარე რულა, ვართი ქომოლობაშა რე ლიმა, ვართი რჩქინელი კოჩიში ნებაშა ვარე მარდი, ვართი ჭკვერი კოჩიში ნებაშა რე ღმალა; ირფელც ბორჯი ორთინუანც.
- მუში ბორჯის ვაგინაფულენც კოჩინი თიშენი, ბადეს მოხვამლაფირი ჩხომცალო დო რაგვის გეხართელი ჩიტიცალო იყუაფ უჩა დღაში მულაშა, თი დღა ხოლო ველუნი თეში ქიმატყობანც.
- ათე სიბრძნე ხოლო ქობძირი დო გურიში გაჩამალო მიბრჩქინი თინა.
- ორდ ართი ჭიჭე ნოღა დო კათა ხოლო ბრელი ვახორანდ თექი. ქუმადირთ ნოღას დიდი მაფაქ დო მუკი–მუკი ქუგუხუნუ მალიმორეფი;
- გამკორჩქინდ თექი მიდგარენი ღატაკი ბრძენქ დო ირსხ ნოღა მუში სიჭკვერეთ, მარა თი ღატაკი უკული მითინც ვაგოშინუ.
- ფთქვი: სიბრძნე ირფელიში უმოსი რე,მარა ღატაკიში სიბრძნეს მუთუნო ვემირჩქინანა დო თიში ზიტყვას ყუც მითინი ვათხინც.
- ჭკვერიში წყნარო მერაგადი უჯგუში რე ბორო მთავარის ღვარაფშე.
- ოლიმარი იარაღის სიბრძნე უჯგ; ცოდამი ქიანას ბრელი მარდის მეუდინუანც.
მავითა დუდი
[edit]- ლაბანამი ჭანჯეფი აფუჭენა დო ყორიდუნა სურნელამ ზეთის; ნამთინეშა ჭიჭე სიბორუე უმოსი ძვირფასი რე სიბრძნე დო დიდებაშე.
- ბრძენც გური მარძგვანიშე ელაძ, ბოროს–კვარჩხანიშე.
- ბოროქ სოდგა იდასუნი, ბოროთ დოსქიდ, არძოს ურაგად ბორო რენი თის.
- უნჩაშიქ გიგანჭყორდა, სქანი არდგილი ვემიოტუა, თვინიერც ბრელი ცოდა ეპატიებ.
- ორე ხოლო ბოროტება, ნამუთ მა ბჟაში თუდო ბძირი, ნამუთ უნჩაშიში ჩილათას ოკომოყუნდასუნი;
- ბორუობაქ დუდი გამწოჭოფ დო დინდარეფი თუდო ხენა.
- ქობძირი მოინალეფი ცხენეფც გეხედეს დო მთავარეფი მოინალეფცალო კუჩხით მიშესუნი.
- რობუში მანთხორალი ქენანთხუ მუში ნანთხორას დო კიდალაში აკმარღვაფალც გვერი ქაჩამ.
- მისით ქუა მეუზინდუნი თის ქუა მეტახუნც ოჭიშის; ჯალეფიში მაკვათალც ჯა გინაჩქვანც კილუანო.
- უკვათირი ბურჭული ველასირედა, უმოს ჭყანას მიდაიღანც; ჭკუათ ოკო იყუნე საქმე.
- დაგვიანებული შელორსა ნაჩამინას ვახვარ.
- ბრძენიში ზიტყვეფი მარდიანი რე, ბოროს მუში ნარაგად ოდინუანც.
- თიში ზიტყვეფიში დაჭყაფ სიბორუე რე დო შედეგი სიხანგე.
- ფოჩოს ბრელიში რაგადი უჩქ, მარა მითინც ვაუჩქუ მუ მაყუნუნი; მი უწინც მუში უკული მუ იყუაფუნი?
- ბოროს დოშულიდუნც მუში ხანდა, მუშენდა ვაუჩქ ნოღაშა მაულარი შარა.
- ვავა, სქანიშენი ქიანა, სოდეთ ბაღანა გეიხე მაფათ დო თავადეფი ოჭმარეშე იჭყანა ჭკუმასნი!
- ბედნიერი რე ქიანა, სოდეთ მაფა მითინიში მონა ვარე დო დიდებულეფი მუში შვანც ჭკუმუნა, ჭყანაქ ვემუდინანინი თიშენი დო ვართი სამხიარულოთ.
- ლალას ორთვალი ქენუცენც, ხეგეჭკურელიში ყუდეშა წყარი მინილენც.
- სახიოლოთ ინწყუაფუ დიარა; ღვინი ხიოლით ეიოფშანც რინას, ფარა ირფელიში მოპასუხე რე.
- სი ფირქო ხოლო ვაგორა მაფას, სქან ონჯირუს ხოლო ვაგორა დიდგვარიში კოც: მუშენდა ცაში მაფურინჯე ქიმუღანც ამბეს.
მავითაართა დუდი
[edit]- წყარც ქუყუნე სქანი ქობალი, ბრელი დღალეფიში უკული იშენით დოგორუნქ.
- ქიმეჩი ნაწილი ქონებაში შქვითის, ვარა ბრუოს, მუშენდა ვაიჩქ მუ უბედურება მოძ ქიანასუნი.
- მუჟამცუთ მუნაფა ეიფშაფუნი ჭვემას დიჭყანც; ჯაქ ეკირთ ოჩხანეს დო ვარა ბიჟღეთისდა სოდე ეკირთუნი თექი დოსქიდუ.
- ნამუთ ბორიას ოკვირუნი თის თასუა ვადაჭყინე; მით მუნაფას ელაჯინენი თის მუნაწი ვეიაჭოფე.
- მუჭოთ ვაიჩქ სოიშა მეურც ბორიაში შარა დო ვარა, მუჭო ელესახებ ქვარას ძვალეფინი, ეთეში ვაიჩქ ღორონთიში საქმე, ნამუქუთ ირფელი შექმნუნი.
- ოჭმარეს დოთასი სქანი თასი დო ონჯუას ხოლო ვამასვაჯუა ხელეფი,თიშენი ნამდა ვაიჩქ ნამ ბორჯიში ხანდა უჯგუში ორენი. მის უჩქ ჟირხოლოქ ართნერო
ჯგირქ იყუას.
- ჰამო რე სინთე დო სიამე რე თოლშო ბჟაში ჯინა.
- ბრელი წანა იცხოვრას კოჩქ დო იმხიარულასუნი, იშენით ოკო შუდას, ნამდა ქუმურც უჩა დღალეფი; ირფელი მუთ მურცუნი, პოტიკი რე.
- იხარი ჩქიჩქ, სოიშახ ლილ რექუნი, გეგემუანას სქან გურქ ბაღანობას,ქიმიაყუნი სქანი გურც დო თოლიში ნაძირეფუს, ოღონც გიჩქუდას,ირფელი ათეში
გურშენი პასუხის მორკითხენც ღორონთი.
- გელეღი გურშე ნარღი დო ხორცის ვემკუნჭა უგემური მუთუნი, მუშენდა ბაღანობა დო ბოშალა პოტიკი რე დო მაულარი.
მავითოჟირა დუდი
[edit]- ქორშუდას სქანი გორჩქინუ ბოშალას, სოიშახ წარე დღალეფი გოითანდუდას დო მუნოილუანდას წანეფი, ნამშენით თქუანქ მუშა მარგებე თინეფიანი.
- სოიშახ დეუკმელებუდას ბჟა, დღა დო თუთა დო მურიცხეფი, სოიშახ დიო ხოლო იძირე მუნაფა ჭვემაში უკულინი.
- სოიშახ დოშქურდუდანი დოხორეში მათხილარეფი დო მალიმორეფი დეძაბუნებდანინი, სოიშახ მიოტენდას წისქვილც საქვარც მაქუალეფი (მუშენდა გვალო ჭიჭე დოსქიდ თინეფი) სოიშახ სინთე დაკორდნა ოსინთეშე მაჯინალეფც;
- სოიშახ დიკილუდას შარაში კარეფ, მეჭყორდუდას სქიბუში რთაფა, სოიშახ ორნას ქეთიყოთანდანი ჩიტეფი დო მეჭყორდუდას ირნერი გალობანი.
- სოიშახ აშქურნენა სიმაღალაშა დო შარეფც შქურინი ქიგლადირთუნი,სოიშახ კალიეფი დემონკებუნა დო სოიშახ დოშქირტ საუკუნო ყუდეშა მაულარი კოჩიშ ეკმაყვენ–ჯი მანგარალეფიში გურც დაჩხირინი.
- სოიშახ მეხორცქდას ვარჩხილიში ჯაჭვი დო გოტირხუდას ორქოში ჭურჭელი, დიფუჩხოლუდას ორკოლი წყურგილც, სოიშახ ოწინარიში ბარბალი ქენანთხუდას ინჭასუნი.
- სოიშახ გინირთუდას დიხა მტვერო, მუჭოთ ჸოფენი დო შური ნამუთ ღორონთქ ენუბარუნი თინა იშო დართუდასუნი...
- მუთუნ ვარიში მუთუნ ვარ, თქუ ეკლესიასტექ, ირფელი რე პოტიკი.
- ბრძენი ორდ ეკლესიასტე დო ხიის ხოლო ქუდაგურუ სიბრძნე. გითიძიენდ, გითოჩხირკუნდ დო მუ ხოლო იგონენდ არიკეფც.
- გორუნდ ეკლესიასტე საჭირო ზიტყვეფც, მართალო იჭარ ჭეშმარიტი ზიტყვეფქ.
- ბრძენიში ზიტყვეფი წვანჯი მუწოთოლირი მასარეფი რე, ენოჭკადილი ლისმარეფი რე.
- ხოლო გიწინქ, სქუა ქგამგონე: წიგნეფიში ჭარუას დათებუ ვაღვენუ დო ნაბეტანი ფირქი დამონკენც რსხეულც.
- მიფრჩქილუათ ირფელიში დუდი დო ბოლო ღორონთიშა გოშქურდას დო დეცვი თიში მცნებეფი, რახანც თენა რე კოჩიშო მთავარი.
- არძო საქვარ სასწორც ქიგედვანც ღორონთი – კეთილს დო უბადოს დო ირფელც, მუთ ქორდ ფულირინი.