დღამაბრუო
დინცხო ქინოშქირტ ფურე ბჟაქ დალურიშ სირგილეს,
სით დეთხითხარი მერთელ ზღვაცალო,
ტვერო ქიგიაცირ ქამენიაშ ხომლა ბეჭილიაქ ვერჩხილს,
შქურნაფილ ჩხომცალო გოციუ სისმარემქ,
წენწო გინირთ ფერაია ჩინთიქ, იშ მუნაღელქ...
ქალაჭირკ ლუბას თუთარია უშქურეფქ,
იბლიშ გვინქ მუნულუ წვანე თოლემს,
სიშორას ასქირაფილს,
ჩელა ნაჩეფ დოიწკირ დო გოიხომუ
ბჟაშ ნავარვალა ქუალემქ,
ოკონ მუგოძდას ნახაფულეფი...
სი აქ გილევალუდინი,
სი გარულ თოლიშ ნაჭვი გონტუდუნი,
იში ნიში წყარ დო ბორიემს მეთხოზუდ,
ჸინიშ რაქას მიკმახორცქუდ უძირაფუ კოკიშ მაგორუ გური,
მანჯაშა მიკოქართილ ხოფემს ტახუნდ
ვერეხიშ ზარანდეფი დო ქვერსემიაშე ეშნასოფა მართუეფი,
სქან ამნახანტის გარაჸანდ მაზადუ ღურუ,
მი რე მარაგადე, სო მიკიტუ შური,
ვარი მიშ ნოშქერქილია კიდირს მიკაპონუ
წყითწყარიშ გოფითქილ დო ხაფულერი ჸვა,
ბორიაო?
იშ ნაფურცქინა ვაგინ ჭირაკილ ჸუს
დღამუთუნს ალიშ კიბირიშ მეგეს,
ვარი ვემირჩქილუანქო მუმაშ ნაჭყაცალო?
ქიმიოშურდიო ართინერი სერი დო გონთემს...
ა დო ა, მეხოლ დღამაბრუოქ,
მუდგა თოლ უწკურენ, გამკოიძირუანს
იში ორქოშ ენალუეფი დუს, ხოკოთ გოსულერს,
ვარი შხვაშ ქართას დოკირილ დო დოკარელს,
ვაიჩინასიო ბადიდიშ წყარიშელ თოლქ?..
ვამგაღორას ადამურ მარუაშ ნასქილედიქ,
აქ ეკაჸათანს და ეკაჸოთას მორთელ ზღვაქ
ჯვეშ წონწეფი დო ნახაფულეფი –
მერთელს ირთანს მოძირაფა დო სისმარეფი,
ეთექ ივალ ქირცხიშ გიშნაღელ შურიშ შული ფიორეფი...
ეთექ ირქენს ვარდიშ მონია საღორონთო,
ჩხოროფათ მესქვილ ალნადველიშ გუმაცხადე:
მეიჩირთი...
შხვა მუთა რე დღა მაბრუო,
შქვით დღას ეკოფულირო გორჩქინელი,
უდულიუ დო ხვამელი.