დამორჩილი (ზაალ ჯალაღონია)
დამორჩილქ გამნორთუა,
ოსინთეშე ქუნთმორაგადუ
გოწარწალერ ბორიაქ.
მათ გებდირთი
დო გალე გიმიბლი.
დამორჩილი ქიგიდიარდჷ
შქირენულ კირიბცალო.
ქიფხუტოლე დო გამნიპონ
ჩქიმ სადგიმშა.
იაკამ თოლ ქუმომნათუ.
ართო ლილჷ დო თანთე,
თირატატიაჯგურა მიკინებუდჷ ხეს.
შხიფ დო გარაგანქ
გემონჟვილეს უკულ.
გურც ქალეხუ უჩა ქუაქ,
უგუსოფუქ დო უტახუქ.
სერეფც ხოლო უტახუნდი,
უთანუანდი,
ინოტკვაჩილ ცაშ ფოტა
გეშებღი დო ქიგნვოფორი ირფელც.
ჩქიმ სქილედი ხოლო დოფობრი.
ფსიაცალო წყარმალუს ვართუქ,
თევრე მემიღჷ დუდი.
მარა ხუ იშენ მაფჷ მეჭოფაფილ
ჩე კირიბშა
დო თინათ ქუმოურც ჩქიმდა,
კინ ჩქიმ ოზეს ფა დო ჩანარეფც
ქიმიაჸუნუ.
ფურცელერ დამორჩილი
დო აფუნც ირო ჩქიმ
ხოლოს მაჸვენუ.
ჩქიმ მორსხე დო შიბი,
ცა დო დიხა შქას.