გჷრჷნი დო მაფშალია
მაფშალია რე მაბირეთ
ჟინი გილახუნილო;
გჷრჷნი მეურს მარჩქილეთ
ჸუჯი ილაწურილო.
დუდი მეუღუ მაჩინეთ
დო მააშინჷ ნდურილო:
-- "მორიკულო რე ბირა სქანი;
"იბრჩქინე, თეში რენ დო ვარი,
"ირიართო გოცქვანანი,
"სი რექჷ დო მითინი შხვანი;
"რთხორე, მორჩქილუე ბირა.
"ის ოსქუნი, მიღუ თინა:
"ოჯინალო -- თოლი გვირა,
"ორჩქილარო -- ჸუჯი ფირა".
ცქუმალირი მაბირექ
ქოდიიჭყჷ მუშებურა;
მუჭო ჯგჷრი მარჩქინექ,
თეშ იბირჷ ირიჯგურა,
დო მის უჩქჷ, იბირჷ მუდა!..
ირ სქჷლედჷ ირჩქილედჷ
თუდონი დო ჟინი:
ჩიტეფქჷთი გაამანჯეს
ჭვიტაფი დო რშვინი,
ირი ორინს ქჷდარულუ
იშ ბირასი ჸოროფათ,
მათხილექჷთი ქჷდაჸუნუ,
ართი აძირე ჩხოროფათ.
მათხილექ ქოდოდუ ლარჭემეფი,
მუში ირ დღაში მაბირე;
შარას გილარე მეშარეფი:
რენა თიში მარჩქილე.
მაფშალიაქ გასურუ ბირა.
გჷრჷნქ დოუშქუ ჸუჯი ფირა,
იჭყჷ დუდი ღუზილო ჯინა,
შინუ, ოსქუდუნი თინა:
-- "ენა ჰაჰადეე ქორე,
"მა სი თინო ქოგიწოლე;
"მარა მუმულს გიაწონე,
"იშ გენაწონს ენა მორე?
"იში რჩქილას მა სი რთხორე,
"ვარა ვა რე ოხიოლე.
"გურაფა ღურაშა რე ირო:
ირჩქილეე თიში ჯგირო,
"ჭყოლოფუათ მიღი ჟინო,
"დო გობაღჷ ინა ჩინო".
ენა მუჭო გეეგონუ,
მაფშალიაქ გეებორუ,
სუა გილე ქიგეფორუ,
ოში გვალას გეგინოლუ.