გურიშ ნწარე ჭუა მიღუ
გურიშ ნწარე ჭუა მიღუ
მუდგენ ელაფირი მა...
გოსარკუას ვეველუქ,
ცა მაფ მუნაფილი მა!...
ბრელი ბგორი დო ქიანას
ჯგირი ჭიჭე ბძირი მა!
ხანდილებას ვაგაურზი,
დობშურდ, დიიბშირი მა!
ბოშალაქ ქომიფურინუ,
სირჩინუექ მესურ(უ) მა,
ჩქიმი ვარდიშ ქუჩუჩებქ
დოხომ, დომიღურუ მა...
...ასეშახ შხვეფსი ვოგურუანდ(ი),
ასე მიჯგუ ჸურუ მა?
ჩქიმ ბედიშ ხვამარდიქ
ზღვაპის ქაკმაქვიშუ მა!
ცხოვრებაში დიარაშე
დროქი გაგმობთიშუ მა!
მოჯგირეფსით გუვოჭყორდინ,
ანწი ვარა მის ბშუქ მა?
ხვალო-ხვალე ქუდობსქიდი
ომბოლქ უმინჯურო მა...
დო ვორწყექი, ვავოცოდუქ
ე ქიანას შურო მა.
უმოჯგირეთ მუჭო გაბრზუქ,
მუ ბქიმინა, შური, მა?
ცას პუნდიო გორჩქინელი
ითამ უბედურო მა?