გურამიში ზუკოლი
კოჩანიერ კოჩი ორე:
შხვაშოთ რინა ვაზოგუნი;
გეიწომიღით ნარაგადუ,
გამიგონით მა ზუკოლი.
გურამი.
გიჩქუდანი კოჩი-სკუა, კაბამი
რდას, მიდგა რენი;
რინას მუ ჟამს ოჭიშუა შხვაში
დაჩხირს უბარენი?
თეში მეტო ვაიჩქუნო,
გეშალუქი უგვარენი,
კოჩიში ბედიში ანგელოზი
ცალთოლამი, ჸუნგა რენი?!
ბორჯი ხეშე ვაგუტუა, რინას
მოზოთ უგორი ხანი;
ნახანდილა სკანი ყებურსუ
ონდო ტუტა გუგორღვანი
დო ნაშიბუ უმარდულო მუშენი
ოკო გიორხანი?!
სონდაროთი ახალი რექ ქათუმონკე
თი ოღალი.
არძას მუში შარა უღუ: ჯიმა
ორდას, ქოთ და რენი;
გამიგონით თე ზუკოლი მანგი
ვორექ სოდგა რენი.
რინ-ოღალე სირჩინუეს, ბორჯი
მუჭომი მონკა რენი...
სოდე ორექ სი მართალი, სკანი
ბედი ონგარენი?!
ირო ჸოფე, ო დო იჸი, ბჟა სონდარო
ვადოშკირტუ;
ოსოიდგე ისოფენი ღურა იშენი
ვადგოჩირთუ;
ღურუ ხოლო ღურუს გაჩქუ,
გური თელო ვადოშინდუ,
უხონუ დო უთასუო ქუმგაკათუ
დამორჩილქუ.
დეფიქრანი არძოს ბთხულე:
მოჯგირე დო კერძი რდასი,
მინი ჸოფე უღურალე, ულუ
ბორჯი გერძუდასი?!
დამორჩილშე ზოთონჯიშა
ნიტე ბრელი მეძუდასი,
დიხა მუსი აგოტენსი, თიში
ვალი გერძუდასი.
ბოშიშოთი წარე ორე ბორჯიში
გინოზილიტუა,
მარა არძოში უფრაში რე
ყებურიში შქირიტუა;
მოხვადასინი ქოთქუანა: გამაგვარი
ქუდიტუა,
თეშენიე: მახორობა, კერძი-მოჯგირე,
ქოთი სკუა.
წკონდა თოლით ქიგიჯინით,
რინაში ბოლო ვაჩეშხამათ;
თი ბედით დო უბედობათ
სოთინი დიხას ვეგლაძ შარას;
ბრელშა ნაჭვის ქომურჩქილეთ,
მორგე ორე ელაჩამათ.
შხვაში ოსურიში მენდო ლოგინს
ლების ვეგლარჩანა.
მუჭო იჸი, აბა მორო, გურიში
აზრი ვაგგანდენი?!
ირჩქილით დო გამიგონით
მუთი მაფუ რაგადელი;
კოჩი-სკუა დღასი ვეჸი
სკუა კოჩო ვაგარდენი,
უკოჩანე რინას უჯგუ დიხას
ჟიდო თაქ ვარდენი.
ოსოიდგე ისოფე დო ნინათ
სიტყვა ლაწკარენი
ო დო ჯგირიში მანგიორო შხვაში
რინა ანწარენი...
მუ კოჩანა ბაღანეფი
ღეჯიშორო დანწკარენი,
კოჩიშ სკუათ ოკო მორდე
მით ქიანას აწარენი.
ვედე ოკო ღულა შარათ,
ქოიჩქუდა ვარე თინუ.
უკოჩობაში ოღალესი
ქათაღურუქ, სოიშა ნთირუ?!
მუ ჟამს ნინას წკონდას თქუანქ,
რინა ეთით გალექინუ,
დიშკირიტი თი დაჩხირი,
გურს სატანა ალერგინუ.
მენცარობა ენა ვარე,
ბრელი ვაკო ათეშ რჩქინას:
სკანი რინაში მაჭყვიდალო
ეშმაკეფი ვათირჩქინა,
ბორო ვეგიძიცინუა,
ბრელი ტერით ვაგირჩქინა,
ცირა-სკუა, ბოში რდენი
ჸუდეს ხვალე ვადნირჩინა.
გიჩქუდასი: ქომოლსკუა,
მით ჸოფილი ბოში რენი
ბოლოს მუთუნს ვაწგოდირთუ
ხატალითი დოშურდენი,
თის ეცადი სკანი რინათ
თია შარა დოშირენი,
ჯგირქ გაღოლას გიკვენდასი,
გლახაწკუმა ქორშუდენი.
P. S. ბრელი რაგადი მოკო
მარა, ვაკუნტორე, ქოთ მოჩქარუ;
აჯამემსი მორდება დო მით
გამიგენს თიშო ბჭარუ,
გონებაში მონაწისი დუდელემსით
თქვანო ბჩხვარუ,
მოკო მორთათ თე ციაშა,
იზუკოლათ თის გოხვარუთ.