ბორჯი
ბორჯი, ირფელ სი გობარჷ,
ულირ, რენი დო მჷმალჷ,
სო რე, ბორჯი სი ვაჸოფექ,
სო ვემჲოხე სქანი ნალჷ?
მირსიოლუქ უმუხარცქო
ირო ართი ნერო მალჷ,
სი გიჩქ, სოდე მი ჩილათე,
სო მის უღუ ნაინალჷ.
სი რშჷ თინა, მუთი ვაშჷ
მითინც ცა დო დიხა შქასჷ,
სი უჯინედჷ სარიკოსჷ –
ბჟაშე დიხაშ მოხარცქასჷ.
სი ვარენო გიჯინუნი
დიხაშ პირველ დორთაფაშა,
სი გიჯინუ პირველ სერი,
პირველ დღაში გოთანაშა.
სი მითინცჷ პატის ვაცე,
სამართალი გიღუ თინჷ,
ხვალე ართი – სქანიწკალა
მითინც ხანდა ვაუდინჷ.
კოჩი მუში მოჯგირესჷ
ჯა დო ქუას ოჸოთანცჷ,
უბადოში ცქვაფა უჩქჷ,
ჯგირცჷ თხოზჷ, ოგორანცჷ.
არძო ფირქენც, მუ ორთჷნი
ირკოჩ შხვაში უჯგუშისჷ,
ბორჯის ვაუჩქ მეფერაფა,
ირკოცს არძენც მუშუშისჷ.