အသုဘဘာဝနာ
အသုဘဘာဝနာကို ပွားများလိုသော ပုဂ္ဂိုလ်သည် အသုဘဆယ်ပါးတွင် တစ်ပါးပါးကို အာရုံပြု၍ ဖြစ်စေ၊ ၃၂ ကောဠာသကို အာရုံပြု၍ ဖြစ်စေပွားများရာ၏။
အသုဘဆယ်ပါး
[edit]ဥဒ္ဓုမာတကံ– သေသည်မှအထက်, နှစ်ရက်သုံးရက်ကူးသဖြင့် ဖူးဖူးရောင်ပုပ်, စက်ဆုပ်ဖွယ်ရာ မသာ လောင်းပါတကား။ ဝိနီလကံ- ဖြူနီသဘော, ရောနှောစပ်တွဲ, ညိုမဲမဲပုပ်, စက်ဆုပ်ဖွယ်ရာ မသာလောင်းပါတကား။ ၀ိပုဗ္ဗကံ- ပြည်တစိုစို, ပေါက်ကွဲယိုလျက်, စက်ဆုပ်ဖွယ်ရာ, မသာလောင်းပါတကား။ ဝိစ္ဆိဒ္ဒကံ- ထက်အောက်နှစ်ရပ်, မဆက်စပ်အောင်, ဖြတ်အပ်ပြီးလျက်, စက်ဆုပ်ဖွယ်ရာ, မသာ လောင်းပါတကား။ ဝိက္ခာယိတကံ- ခွေး, လင်းတ, ကျီး, အသီးသီးတို့, နည်းမျိုးစုံပြား, ဖုံဖုံအားဖြင့်, ခဲစားအပ်လျက်, စက်ဆုပ်ဖွယ်ရာ, မသာလောင်းပါတကား။ ဝိက္ခိတ္တကံ- လက် ခြေ ခေါင်း ကိုယ် ဖရိုဖရဲ ထိုထိုကြဲသဖြင့် ပစ်လွင့်အပ်လျက် စက်ဆုပ်ဖွယ်ရာ မသာလောင်းပါတကား။ ဟတဝိက္ခိတ္တကံ– ကျီးခြေမယွင်း, ဓားဖြင့်မျှဉ်း၍, ညှဉ်းအပ်ထိုထို, လက်ခြေကိုယ်တို့, ဖရိုဖရဲ, ထိုထို ကျဲသဖြင့်, စက်ဆုပ်ဖွယ်ရာ, မသာလောင်းပါတကား။ လောဟိတကံ– သွေးများထွက်ယို, တစ်ကိုယ်လုံးပေ, လိမ်းကျံနေသော, စက်ဆုပ်ဖွယ်ရာ, မသာလောင်းပါတကား။ ပုဠုဝကံ- ပိုးလောက်တွေပြည့်, ကျိကျိတက်နေ, ထွက်စေတတ်သော, စက်ဆုပ်ဖွယ်ရာ, မသာလောင်း ပါတကား။ အဋ္ဌိကံ- အရိုးစုပေါင်း, တစ်ချောင်းဖြစ်စေ, အသရေယုတ်, စက်ဆုပ်ဖွယ်ရာ, မသာလောင်းပါ တကား။
၃၂-ကောဋ္ဌာသပါဠိ
[edit]အတ္ထိ ဣမသ္မိံ ကာယေ
၁။ ကေသာ လောမာ နခါ ဒန္တာ တစော။
၂။ မံသံ နှာရု အဋ္ဌိ အဋ္ဌိမိဉ္ဇံ ဝက္ကံ။
၃။ ဟဒယံ ယကနံ ကိလောမကံ ပိဟကံ ပပ္ပာသံ။
၄။ အန္တံ အန္တဂုဏံ ဥဒရိယံ ကရီသံ မတ္ထလုင်္ဂံ။
၅။ ပိတ္တံ သေမှံ ပုဗ္ဗော လောဟိတံ သေဒေါ မေဒေါ။
၆။ အဿု ဝသာ ခေဠော သိင်္ဃာဏိကာ လသိကာ မုတ္တံ။
မြန်မာပြန်
ငါ၏ကိုယ်မှာ—
၁။ ဆံပင် မွေးညှင်း ခြေသည်း လက်သည်း သွား အရေ။
၂။ အသား အကြော အရိုး ရိုးတွင်းချဉ်ဆီ အညှို့။
၃။ နှလုံး အသည်း အမြှေး အပြင် (အဖျဉ်း) အဆုတ်။
၄။ အူမ အူသိမ် အစာသစ် အစာဟောင်း ဦးနှောက်။
၅။ သည်းခြေ သလိပ် ပြည် သွေး ချွေး အဆီခဲ။
၆။ မျက်ရည် ဆီကြည် တံတွေး နှပ် အစေး ကျင်ငယ်တို့သာ ထင်ရှားရှိကုန်သည်တကား။
အသုဘရှုလင်္ကာ
[edit]၁။ သုံးဆယ်နှစ်ဖြာ၊ ကောဋ္ဌာသာ၊ ရွံရှာစက်ဆုပ်ဖွယ်။
၂။ ဤကိုယ်ခန္ဓာ၊ ပုပ်ညှီစွာ၊ ရွံရှာစက်ဆုပ်ဖွယ်။
၃။ ကိုးပေါက်ဒွါရာ၊ ပုပ်ရည်ဖြာ၊ ရွံရှာစက်ဆုပ်ဖွယ်။
၄။ ရေရောင် ဆီရောင် တန်ဆာရောင်ကြောင့်၊ ကိုယ်ရောင်မဟုတ်၊ အကောင်ပုပ်၊ စက်ဆုပ်ရွံရှာဖွယ်။
၅။ သေသည့်အထက်၊ သုံးလေးရက်ကြူး၊ ဖူးဖူးရောင်ပုပ်၊ အကောင်ယုတ်၊ စက်ဆုပ်ရွံရှာဖွယ်။
၆။ ရှင်ပုပ်သေပုပ်၊ ဤနှစ်ပုပ်၊ စက်ဆုပ်ရွံရှာဖွယ်။
၇။ နေ့ရှိသမျှ၊ သက်သေပြ၊ ရှုကြရွံရှာဖွယ်။
၈။ ပဋိကူလံ-ပဋိကူလံ=ကိုးပေါက်သောဒွါရကြီး၊ မွေးညှင်းပေါက် ဒွါရငယ်၊ အသွယ်သွယ်တို့မှ အပုပ်ရေ အပုပ်ခဲ၊ အပုပ်ချွဲ အပုပ်ပြည် အပုပ်ညီ အပုပ်ကျိတို့ဖြင့် တစိစိ တစိုစို အမြဲယို၍နေသော ဤကိုယ်နာမ်ရုပ်၊ အကောင်ပုပ်ကြီးတို့သည်-
စက်ဆုပ်ရွံရှာဖွယ်ကြီးပါတကား။
စက်ဆုပ်ရွံရှာဖွယ်ကြီးပါတကား။
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse